قۇقىق قورعاۋ قىزمەتكەرلەرىنىڭ جالاقىسى ءۇش جىلدا ءبىر رەت يندەكستەلەدى
بۇل تۋرالى ءماجىلىس دەپۋتاتى، زاڭناما جانە سوت-قۇقىقتىق رەفورما كوميتەتىنىڭ مۇشەسى گۇلنار بيجانوۆا ايتتى، دەپ حابارلايدى قازاقپارات ءتىلشىسى.
ءماجىلىس وتىرىسىندا «ق ر كەيبىر زاڭنامالىق اكتىلەرىنە قۇقىق قورعاۋ قىزمەتىن وتكەرۋ ءتارتىبىن جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەكىنشى وقىلىمعا شىعارىلدى.
«ءبىز قۇقىق قورعاۋ ورگاندارى قىزمەتكەرلەرىنىڭ وزدەرى ءۇشىن مەملەكەت ىنتالاندىرۋلار مەن ۋاجدەمەلەر جاساۋعا مىندەتتى ەكەنىنە سەنىمدىمىز. قىزمەتكەرلەر مەن ولاردىڭ وتباسىلارىن الەۋمەتتىك جانە قۇقىقتىق قورعالۋ جاعدايلارىن قامتاماسىز ەتپەي، ولارعا قويىلاتىن تالاپتاردى ارتتىرۋدىڭ ماعىناسى جوق ەكەنىن قايتالاپ ايتامىز. سوندىقتان زاڭ جوباسىنىڭ ءۇشىنشى بلوگى - ەرەكشە قيىن جاعدايداعى قىزمەتكەرلەر مەن ولاردىڭ وتباسىلارىن الەۋمەتتىك قامسىزداندىرۋعا ارنالعان»، - دەدى گ. بيجانوۆا ءماجىلىستىڭ جالپى وتىرىسىندا.
دەپۋتاتتىڭ ايتۋىنشا، قازىر شىعىنداردىڭ قوسىمشا اۋقىمدى بولىگىن قامتاماسىز ەتۋ مۇمكىندىگى بولماعاندىقتان، زاڭ جوباسىندا زەينەتاقىمەن قامسىزداندىرۋ، قىزمەتكەرلەرگە تۇرعىن ءۇي تولەمدەرى ماسەلەلەرىنە قاتىستى تۇزەتۋلەرىنىڭ ۇلكەن بلوگى قولداۋ تاپپادى.
«الايدا، ءبىز بۇل تاقىرىپتى ءوز جۇمىسىمىزدا قالدىرامىز. زاڭ جوباسىندا قۇقىق قورعاۋ ورگاندارى قىزمەتكەرلەرىنىڭ جالاقىسىن ءۇش جىلدا ءبىر رەت يندەكستەۋ تۋرالى باستامامىز قولداۋ تاپتى. مۇنداي تاجىريبە كوپتەگەن ەلدەردە بار. بيۋجەتتىڭ مۇمكىندىكتەرىن ەسكەرە وتىرىپ، جاڭا ەرەجە 2025-جىلدان باستاپ ەنگىزىلەدى»، - دەدى گۇلنار بيجانوۆا.
بۇعان دەيىن دەپۋتات قىزمەتتە قازا تاپقان جانە مۇگەدەك بولعانداردىڭ بالالارى قازاقستانداعى كەز كەلگەن ج و و- دا تەگىن وقيتىنىن ايتقان ەدى.
سونداي-اق، قاڭتار وقيعاسىنان كەيىن بيلىك وكىلىنە باعىنباۋ، كۇش قولدانۋ ءۇشىن جازا كۇشەيتىلدى.
