قازاقستان مەن قىتاي شەكاراسىنداعى بارلىق وتكىزۋ پۋنكتى جۇمىس ىستەپ تۇر - قىتاي سىرتقى ىستەر ءمينيسترى

نۇر-سۇلتان. قازاقپارات - قازاقستان مەن قىتاي شەكاراسىنداعى بارلىق وتكىزۋ پۋنكتى جۇمىستارىن جانداندىردى.

بۇل تۋرالى ق ر سىرتقى ىستەر ءمينيسترى ۋاڭ ي ايتتى، دەپ حابارلايدى قازاقپارات ءتىلشىسى. «ينۆەستيتسيالار سالالارىنداعى ىنتىماقتاستىق كوميتەتى، ىنتىماقتاستىق جونىندەگى كوميسسيا، وڭىرلىك ىنتىماقتاستىق فورۋمى سىندى تەتىكتەردىڭ الەۋەتىن ارتتىرامىز. ەكىجاقتى ىنتىماقتاستىق ساپاسىن ءارتاراپتاندىرىپ، نىعايتامىز، ارتتىرا تۇسەمىز. ءوزارا ءتيىمدى ىنتىماقتاستىقتى مۇلتىكسىز دامىتىپ، جاڭا سالالارى مەن مۇمكىندىكتەرىن قاراستىرامىز. قىتاي- ەۋروپا باعدارىنىڭ وتكىزۋ قابىلەتىن بارىنشا قامتاماسىز ەتىپ، ترانسكاسپي حالىقارالىق كولىك ءدالىزىنىڭ الەۋەتىن اشا تۇسەمىز. كولىك باعدارلارىن ءارتاراپتاندىرامىز»، - دەدى ۋاڭ ي ق ر پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇحتار تىلەۋبەردىمەن كەزدەسۋدەن كەيىنگى بريفينگىدە.

سونىمەن قاتار ول ەكى ەل 5G، ۇلكەن دەرەكتەر، جاساندى ينتەللەكت، سيفرلىق قارجى، ترانسشەكارالىق ەلەكتروندى ساۋدا، جاڭاراتىن ەنەرگيا كوزدەرى سالالارىندا جاڭا ءوسىم نۇكتەلەرىن قۇرۋعا دا باسا ءمان بەرەتىندىگىن اتاپ ءوتتى.

«قازاقستان مەن قىتاي شەكاراسىنداعى بارلىق وتكىزۋ پۋنكتى جۇمىستارىن قالپىنا كەلتىردى. اۋە قاتىناسىن جاڭعىرتۋ ماسەلەسىندە دە ىلگەرىلەۋشىلىك بار. ەكى ەلدىڭ اۋە كومپانيالپارى تاياۋ ۋاقىتتا اپتاسىنا 2 رەيستەن ورىندايتىن بولادى. بۇل دا ەكى ەلدىڭ حالقىنا پايدا اكەلەدى»، - دەدى قىتاي سىرتقى ىستەر ءمينيسترى.

اۆتور: مارلان جيەمباي