مامىر ايىندا ىسكەرلىك بەلسەندىلىك يندەكسى ءبىرشاما تومەندەدى - ۇلتتىق بانك
الايدا، ەكونوميكا گەوساياسي جاعدايدىڭ جانە ونىمەن بايلانىستى سالداردىڭ ىقپالىندا بولعان ناۋرىزداعى دەڭگەيدەن (48,2) يندەكس جوعارى قالىپتاستى.
ق ر ۇلتتىق بانكىنىڭ اقشا-كرەديت ساياساتى دەپارتامەنتىنىڭ ديرەكتورى رۇستەم ورازالين وسىنداي مالىمەت كەلتىردى، دەپ حابارلايدى قازاقپارات.
ىسكەرلىك بەلسەندىلىكتىڭ ءوسۋى ءوندىرىس سەكتورىندا بايقالدى: يندەكس 50,9 عا دەيىن كوتەرىلدى (ساۋىردە - 50,5).
قىزمەت كورسەتۋ سەكتورىندا جانە تاۋ-كەن ءوندىرۋ ونەركاسىبىندە ىسكەرلىك بەلسەندىلىك، تيىسىنشە، 48,8 گە جانە 48,3 كە دەيىن تومەندەدى.
قۇرىلىستا يندەكس 44,6 دان 46,2 گە دەيىن كوتەرىلدى. بارلىق سەكتوردا جەتكىزىلىم مەرزىمدەرى ۇزارعانى بايقالادى، قۇرىلىستا جۇمىسپەن قامتۋ جاعدايى ازداپ جاقساردى، ءبىراق تاپسىرىس كولەمى تومەن دەڭگەيدە قالىپ وتىر.
2022-جىلعى مامىردا كاسىپورىنداردىڭ اعىمداعى بيزنەس-جاعدايلاردى باعالاۋى وزگەرىسسىز قالدى.
تەرىس وزگەرىستەردى اتاپ وتكەن رەسپوندەنتتەر سانى بۇرىنعىسىنشا باسىم.
الايدا، كاسىپورىنداردىڭ بولاشاق بيزنەس- جاعدايلارىنا قاتىستى سەنىمى ايتارلىقتاي جاقساردى (كەلەشەك جاعدايلاردى باعالاۋ بيىلعى ساۋىردەگى 7,3 تەن 22,5 كە دەيىن ۇلعايدى).
«ناتيجەسىندە اعىمداعى جانە بولاشاق بيزنەس-جاعدايلاردى ورتاشا باعالاۋدى بىلدىرەتىن بيزنەس-احۋال يندەكسى بيزنەستى جۇرگىزۋدىڭ بولاشاق جاعدايلارىنا قاتىستى، اسىرەسە، قۇرىلىس سالاسىنداعى كاسىپورىنداردا وپتيميزمدى جاقسارتۋ ەسەبىنەن 9,2 (ساۋىردە - 2,2) قۇراپ، ايتارلىقتاي جاقساردى»، - دەلىنگەن حابارلامادا.
