يزرايل دارىگەرلەرى اتىراۋدا جەرگىلىكتى ارىپتەستەرىمەن بىرگە وتا جاسايدى

اتىراۋ. قازاقپارات - يزرايل دارىگەرلەرى اتىراۋدا جەرگىلىكتى ارىپتەستەرىمەن بىرگە وتا جاسايدى، دەپ حابارلايدى قازاقپارات.

اتىراۋعا يزرايل رەسپۋبليكاسىنان ءبىر توپ دارىگەر كەلدى. شەتەلدىك پروفەسسورلار ۆاديم كاپۋللەر مەن سايد يبراگيم وبلىستىق بالالار اۋرۋحاناسىندا، رافاەل ميللەر، ماكسيم سوكولوۆ پەن لەۆ گۋريەۆيچ وبلىستىق ونكولوگيا ديسپانسەرىندە جەرگىلىكتى ماماندارعا شەبەرلىك ساعاتىن وتكىزىپ جاتىر. يزرايل دارىگەرلەرى 31 مامىر-5-ماۋسىم ارالىعىندا اتىراۋلىق ارىپتەستەرىمەن بىرگە ناۋقاستارعا وتا جاسايدى. سونداي-اق، تۇرعىندارعا تەگىن كەڭەس بەرەدى. بۇگىن وبلىس اكىمى سەرىك شاپكەنوۆ يزرايل ەلىنەن كەلگەن دارىگەرلەر توبىمەن كەزدەستى.

«ادام بالاسى ءۇشىن ءبىرىنشى بايلىق - دەنساۋلىق. سوندىقتان تۇرعىندار ساپالى مەديتسينالىق قىزمەتكە كەدەرگىسىز قول جەتكىزۋى كەرەك. وسىعان وراي جەرگىلىكتى مامانداردىڭ ءبىلىمىن شىڭداۋ، سالاعا بىلىكتى مامانداردى تارتۋ، زاماناۋي تەحنولوگيالارمەن قامتاماسىز ەتۋ سەكىلدى جۇمىستار جالعاسىن تابادى. يزرايلدىك ارىپتەستەرىمەن جوسپارلانعان ءىس- شارا اياسىندا اتىراۋلىق دارىگەرلەر قاجەتتى اقپاراتتار الىپ، تاجىريبە جينايدى»، - دەدى سەرىك شاپكەنوۆ.

وبلىس اكىمىنىڭ باسپا ءسوز قىزمەتىنەن ءمالىم ەتكەندەي، بۇعان دەيىن 17-21-مامىر ارالىعىندا يزرايلدىك پروفەسسور يليا روزين وبلىستىق پەريناتالدىق ورتالىقتا سەمينار وتكىزگەن. وعان اتىراۋ قالاسى مەن اۋدانداردان 40 مامان قاتىسىپ، ونىڭ 34 ى سەرتيفيكات العان. ال، بۇل جولى 1 مىڭعا جۋىق مەديتسينا قىزمەتكەرىن وقىتۋ جوسپارلانىپ وتىر.

ەسكە سالا كەتەلىك، بۇدان بۇرىن اتىراۋدا ەلوردالىق دارىگەرلەر 5 بالاعا وتا جاساپ، 300-گە جۋىق كەڭەس بەرگەنىن جازعان بولاتىنبىز.

اۆتور: بەك مۇستافا