الماتى ۋنيۆەرسيتەتتەرىندە وقۋ اقىسى قانشاعا ءوستى

الماتى. قازاقپارات - قازاقستانداعى ۋنيۆەرسيتەتتەر پاندەميادان سوڭ ءداستۇرلى وقۋ فورماتىنا اۋىستى.

بارلىعىندا دەرلىك وقۋ اقىسى كوتەرىلدى. سونداي-اق، الەمدىك ج و و- لارمەن تىعىز بايلانىس ورناتىلىپ جاتىر.

قازاقپارات ءتىلشىسى الماتىداعى ءبىرقاتار ۋنيۆەرسيتەت تۋرالى باستى مالىمەتتەردى ۇسىنادى.

ءال-فارابي اتىنداعى قازاق ۇلتتىق ۋنيۆەرسيتەتى قابىلداۋ كوميسسياسىنىڭ مالىمەتى بويىنشا، بيىل ءبىلىم گرانتى كونكۋرسىنىڭ شەكتى بالىنا قاتىستى وزگەرىس بولادى.

ال، شەكتى بال ۋنيۆەرسيتەت تاراپىنان بەلگىلەنەدى. اقىلى بولىمگە ءتۇسۋ ءۇشىن ۇ ب ت ناتيجەسى كەمىندە 65 بال، «قۇقىق» ءبىلىم بەرۋ باعدارلاما توبى بويىنشا 75 بال بولۋى كەرەك.

بۇل رەتتە ۇ ب ت- نىڭ ءاربىر ءپانى مەن شىعارماشىلىق ەمتيحان بويىنشا كەمى 5 بال جيناۋ قاجەت.

ايتا كەتسەك، «جۋرناليستيكا» مەن «فيلوسوفيا جانە ساياساتتانۋ» فاكۋلتەتتەرىندە بىرنەشە باعىتتا شىعارماشىلىق ەمتيحان بار.

دوكتورانتۋراعا تۇسەتىندەرگە قوسىمشا مەملەكەتتىك ءتىل بويىنشا «KAZTEST» تەستىلەۋى جانە سۇحبات ەڭگىزىلدى. ازىرگە وقۋ اقىسى قانشاعا وسەتىنى تۋرالى اقپارات جوق.

ديرەكتورلار كەڭەسى 2022-2023 وقۋ جىلىنا ارنالعان اقى مەن جەڭىلدىكتەر ءتىزىلىمىن ماۋسىم ايىندا بەكىتەدى. ۋنيۆەرسيتەتكە شەتەل ازاماتتارى وقۋعا تۇسە الادى. ولاردى قابىلداۋ ونلاين فورماتتا جۇزەگە اسىرىلادى.

باكالاۆريات، ماگيستراتۋرا جانە دوكتورانتۋرا باعدارلامالارىنا ونلاين-تىركەلۋ جىل بويى اشىق. تىركەۋ كەزەڭىنەن كەيىن ونلاين فورماتتا قولجەتىمدى كىرىسپە سىناقتار وتكىزىلەدى. وقۋعا قۇجات قابىلداۋ پروتسەسى اۆتوماتتاندىرىلعان جانە قازاق، ورىس پەن اعىلشىن تىلدەرىندەگى قوسىمشا ارقىلى جۇزەگە اسىرىلادى.

قانىش ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتى مەملەكەتتىك گرانت پەن اقىلى بولىمگە ءتۇسۋ ءۇشىن كەمى 65 بال جيناۋ كەرەك. ءاربىر ءپان بويىنشا ناتيجە 5 بالدان جوعارى بولۋ ءتيىس.

گرانت كونكۋرسىنا تالاپكەرلەر مامىر جانە ماۋسىم ايلارىندا وتەتىن ۇ ب ت ناتيجەسىمەن قاتىسادى.

ال، اقىلى بولىمگە قاڭتار، ناۋرىز، مامىر، ماۋسىم جانە تامىز ايلارىنىڭ ۇ ب ت ناتيجەلەرى بويىنشا تۇسۋگە بولادى.

سونداي-اق، ۋنيۆەرسيتەت قابىرعاسىندا وتكەن وليمپيادا مەن عىلىمي جوبالاردىڭ جۇلدەگەرلەرىنە وقۋ ورنىنىڭ ءوز گرانتى بەرىلەدى.

2021-2022 وقۋ جىلىندا تولەماقى فاكۋلتەتكە بايلانىستى ورتاشا 800000 تەڭگە بولعان، بيىل ونىڭ مولشەرى وزگەرۋى مۇمكىن.

پاندەميادان كەيىن ۋنيۆەرسيتەتتە بۇرىنعىداي وقۋ دارىستەرى مەن زەرتحانالىق جۇمىستار جالعاسىن تاپتى. ۋنيۆەرسيتەتكە شەتەلدىكتەر تەك اقىلى تۇردە (سۇحباتتاسۋ نەگىزىندە) قابىلدانادى.

اباي اتىنداعى قازاق ۇلتتىق پەداگوگيكالىق ۋنيۆەرسيتەتى قوعاممەن بايلانىس دەپارتامەنتى حابارلاعانداي، مەملەكەتتىك ءبىلىم بەرۋ گرانتىنىڭ كونكۋرسىنا قاتىسۋ ءۇشىن «پەداگوگيكالىق عىلىمدار» باعىتى بويىنشا شەكتى بال – 75، ال جاراتىلىستانۋ-عىلىمي باعىتتاعى ءبىلىم بەرۋ باعدارلامالارىنا - 65 بال.

ۋنيۆەرسيتەتكە اقىلى بولىمگە قابىلداۋ ىشكى ەرەجەلەرگە ساي وتكىزىلەدى. وقۋعا قۇجات تاپسىرۋ ەكى كەزەڭنەن تۇرادى. بيىل تالاپكەرلەردى وقۋعا قابىلداۋ ءۇردىسى اۆتوماتتاندىرىلدى. ۋنيۆەرسيتەت سايتى ارقىلى جۇزەگە اسىرىلادى.

ال، وقۋعا قابىلدانعان تالاپكەرلەر تامىز ايىندا ۋنيۆەرسيتەتتىڭ قابىلداۋ كوميسسياسىنا قۇجاتتاردىڭ ءتۇپنۇسقاسىن تاپسىرۋى قاجەت.

2022-2023 وقۋ جىلىندا پەداگوگيكالىق ءبىلىم بەرۋ باعدارلامالارىنا ءبىر جىلدىق وقۋ اقىسى - 816000 تەڭگە. پاندەميادان كەيىن ۋنيۆەرسيتەتتىڭ بارلىق وقۋ نىساندارى ءداستۇرلى وقۋ فورماتىنا ورالعان. ۋنيۆەرسيت شەتەلدىكتەردى وقۋعا قابىلدايدى. ولار اقىلى بولىمگە سۇحباتتاسۋ ارقىلى تۇسەدى.

ال، ەتنيكالىق قازاق شەتەل ازاماتتارى ۇ ب ت تاپسىرۋ ارقىلى مەملەكەتتىك ءبىلىم بەرۋ گرانتىنا ۇمىتكەر بولا الادى.

سونداي-اق، شەتەلدىكتەردىڭ بولوندىق جۇيە بويىنشا مەملەكەتتىك ءبىلىم بەرۋ گرانتىنا يە بولۋ مۇمكىندىگى بار.

سۇلەيمەن دەميرەل اتىنداعى ۋنيۆەرسيتەت ۋنيۆەرسيتەتتىڭ باسپا ءسوز قىزمەتىنىڭ مالىمەتىنشە، تالاپكەرلەر الدىمەن ۇ ب ت- عا ءوتىنىشتى app.testcenter.kz ارقىلى تىركەيدى، ال وقۋعا ءتۇسۋ ءۇشىن قۇجاتتاردى sdu.edu.kz سايتىندا ونلاين تىركەيدى.

مۇنان سوڭ ۋنيۆەرسيتەتكە كەلىپ تاپسىرادى. قۇجات قابىلداۋ ۋاقىتى – 20- ماۋسىم مەن 25- تامىز ارالىعى.

ۇ ب ت شەكتى بالدارىن جيناعان تالاپكەرلەر مەملەكەتتىك گرانت كونكۋرسىنا قاتىسىپ، تەگىن ءبىلىم الادى نەمەسە اقىلى نەگىزدە وقيدى.

ماڭعىستاۋ، اتىراۋ وبلىستارىنىڭ مەكتەپ تۇلەكتەرىنە مەملەكەت تاراپىنان 2022-2023 وقۋ جىلدارىنا بولىنگەن 10000 گرانت شەڭبەرىندە 104 تالاپكەر تۇسە الادى. سونداي-اق، ۋنيۆەرسيتەتتە گرانتقا تۇسۋگە ارنالعان ءوز شەكتى بالى بار. مىسالى، بيىل IT ماماندىعىنا شەكتى بالل 100 گە دەيىن كوتەرىلدى، «ماتەماتيكا جانە ستاتيستيكا» ماماندىعىنا – 80، حالىقارالىق قاتىناستار، فيلولوگيا ماماندىقتارىنا – 60، پەداگوگيكالىق ماتەماتيكا جانە فيزيكا ماماندىقتارىنا - 90 بالعا دەيىن كوتەرىلسە، ەكى شەتەل ءتىلى ماماندىعىنا شەكتى بال 95 بولىپ بەكىتىلدى.

ايتا كەتۋ كەرەك، اعىلشىنشا وقىتىلاتىن ماماندىقتارعا تۇسەتىندەر ءتىل ءبىلۋ دەڭگەيىن انىقتاۋ ءۇشىن تەست تاپسىرادى. ول ەمتيحان ۋنيۆەرسيتەت ىشىندە وفلاين فورماتتا جۇرگىزىلەدى. اعىلشىن تىلىنەن دەڭگەيى تومەن ابيتۋريەنتتەر 1-كۋرستا ءتىلدى قوسىمشا وقي الادى.

بيىل وقۋ اقىسى ماماندىقتارعا بايلانىستى %5-10، ياعني ورتاشا 1 ميلليون تەڭگەگە دەيىن ءوستى. پاندەميادان سوڭ ۋنيۆەرسيتەتتە بارلىق وقۋ پروتسەسى وفلاين فورماتقا اۋىستى.

ۋنيۆەرسيتەتتە شەتەلدىك ابيتۋريەنتتەردى قابىلداۋدىڭ ءوز ەرەجەسى بار. پروتسەس تولىقتاي ونلاين فورماتتا جۇرگىزىلەدى.

قۇجات تاپسىرۋ، سۇحباتتاسۋ، اعىلشىن تىلىنەن تەست تاپسىرۋ، ۆيزا پروتسەستەرى ءساتتى اياقتالسا، ابيتۋريەنت وقۋعا قابىلدانادى. سونداي-اق، وزگە ەلدەردە مەكتەپ تۇلەكتەرى اراسىندا ارنايى ISPT وليمپياداسى وتكىزىلەدى.

وليمپيادا ناتيجەسىندە جوعارى كورسەتكىشكە يە بولعان ابيتۋريەنتتەر 4 جىلعا گرانت جانە جەڭىلدىكتەر ۇتىپ الۋىنا مۇمكىندىك بار.

ەسكە سالايىق، قىرعىزستاندا قازاقستاندىق ۋنيۆەرسيتەتتىڭ فيليالى اشىلعانىن، الەمنىڭ ۇزدىك ۋنيۆەرسيتەتتەرى رەيتينگىنە قازاقستاننان ءبىر ج و و كىرگەنىن جانە قازاقستان ۋنيۆەرسيتەتتەرى جۇمىس بەرۋشىلەرمەن ىنتىماقتاستىقتى نىعايتىپ جاتقانىن بۇعان دەيىن حابارلاعان بولاتىنبىز.