دارىگەرلەر ناۋقاس ازاماتتىڭ ەكى قولىن اۋىستىرىپ سالعان
ءبىراق كۇردەلى وتا ءساتتى ءوتىپ، ونىڭ ءومىرى وزگەرىپ سالا بەرگەن، دەپ حابارلايدى قازاقپارات BBC - گە سىلتەمە جاساپ. ستيۆەن 48 جاستا. 13 جىل بۇرىن ول ءۇي توبەسىن جاباتىن شاتىرشى بولىپ جۇمىس ىستەپ، ءۇش بالاسىن اسىراعان. كەنەت قاتتى سىرقاتتانىپ، بەتىندە بورتپە پايدا بولعان، ال وڭ قولى سولقىلداپ اۋىرا بەرگەن. العاشقىدا دارىگەرلەر جۇيەلى قىزىل جەگى (ليۋپۋس) دەپ دياگنوز قويعان. كەيىن دارىگەرلەر نەۆرولوگيالىق اۋرۋ بەلگىلەرىن بايقاپ، بىلەك كانالدارى سيندرومى دەپ ويلاعان جانە ستيۆەنگە وتا جاساعان. ءبىراق، ەكى قولى تاعى اۋىرىپ، جاڭا مامان ودان سكلەرودەرميا اۋتويممۋندىق اۋرۋىن تاپقان. سونىڭ سالدارىنان ونىڭ تەرىسىندە جانە ىشكى ورگاندارىندا تىرتىق پايدا بولعان. جەتى جىل بۇرىن ستيۆەننىڭ ساۋساقتارى ىشكە قاراي مايىسىپ، جۇدىرىعىن تۇيە المايتىن دارەجەگە جەتكەن. ول قاتتى اۋىرعانىن ەسىنە الادى.
«مەنىڭ الاقانىم بۇگىلمەي قالدى، ءبىر ساتتە قولىمنىڭ ورنىندا تەك جۇدىرىق قالدى. ەشتەڭە ىستەي الماي قالدىم. ءوزىم كيىنە المادىم، قانداي دا ءبىر زاتتى كوتەرە الماي قالدىم»، - دەپ ءبولىستى ستيۆەن.
شوتلانديانىڭ درەگورن اۋىلىندا تۇراتىن ستيۆەن كاسىبي جۇمىسىن تاستاۋعا ءماجبۇر بولدى. قازىر ونىڭ ءۇش قىزى 12، 24، 27 جاستا. دارىگەرلەر ونى گلازگولىق پلاستيكالىق حيرۋرگيا مامانى پروفەسسور ەندريۋ حارتقا جىبەرگەن. ول قول بۋىنىن اۋىستىرىپ ورنالاستىرۋ مۇمكىن ەكەنىن ايتقان. حارت پەن تاعى ءبىر پلاستيكالىق حيرۋرگيا مامانى، پروفەسسور سايمون كەي ستيۆەنگە وتامەن بايلانىستى قانداي قاۋىپ بولاتىنىن تۇسىندىرگەن. ول جۇبايىمەن اقىلداسىپ، كەيىن پسيحولوگيالىق ساراپتامادان وتكەن. حيرۋرگ سايمون كەي ۇلى بريتانيادا العاش بولىپ 2016 -جىلى ەكى قول بۋىنىن اۋىستىرىپ ورنالاستىرۋ بويىنشا وتا جاساعان. ستيۆەن ەكى قولىن اۋىستىرىپ سالعان سكلەرودەرمياعا شالدىققان الەمدەگى العاشقى ناۋقاس اتاندى. وتاعا ءتۇرلى سالاداعى 30 مامان قاتىستى. وتا 2021 -جىلى جەلتوقساندا ليدستە ءوتىپ، 12 ساعاتقا سوزىلعان.
«وتادان كەيىن باسقا الەمدە جۇرگەندەي وياندىم. ءبارى تەز ءوتتى. ويانا سالىپ قولدارىمدى قيمىلداتا الدىم»، - دەيدى ستيۆەن.
اۆتور: اقبوپە ءابدراسۋل
