جۇتىنعاندا قۇلاعىڭىز اۋىرسا، ول قانداي اۋرۋلاردىڭ بەلگىسى؟

نۇر-سۇلتان. قازاقپارات - تۇماۋدىڭ بەلگىلەرى كەز كەلگەن ادامعا بەلگىلى. ال جۇتىنعاندا قۇلاق اۋىرسا، ول قانداي اۋرۋلاردىڭ بەلگىسى بولۋى مۇمكىن؟

جۇتىنعاندا قۇلاقتىڭ اۋىرۋى مىنا اۋرۋلاردىڭ بەلگىسى بولۋى مۇمكىن:

1. ءجىتى وتيت (قۇلاقتىڭ قابىنۋى)؛

2. ەپيدەميالىق پاروتيت. بۇل جاعدايدا قۇلاق ءتۇبى بەزدەرىنىڭ شوشىنۋى، مويىن مەن بەتتىڭ ءىسىنۋى جانە جوعارى تەمپەراتۋرا بايقالادى. بۇل اۋرۋمەن ءجيى بالالار اۋىرادى؛

3. فارينگيت (جۇتقىنشاقتىڭ قابىنۋى)؛

4. تونزيلليت (بادامشا بەزىنىڭ قابىنۋى)؛

5. كومەكەي مەن اۋىز قۋىسىنىڭ قاتەرلى ىسىگى. ءبىراق بۇل جاعدايدا ول باسقا دا بەلگىلەرمەن بىرگە جۇرەدى: جىلدام شارشاۋ، سالماقتىڭ ازايۋى جانە مويىنداعى ليمفالىق تۇيىندەردىڭ ءىسىپ كەتۋى.

سونداي- اق، ەگەر مويىن تۇسىندا ءىرىڭ جينالسا دا، جۇتىنعاندا قۇلاق اۋىرۋى مۇمكىن. ول ەستۋ جۇيكەسىنىڭ زاقىمدالعانى نەمەسە جۇيكە جۇيەسى جۇمىسىنداعى بۇزىلىس جايلى بەلگى بەرۋى مۇمكىن.

قانداي جاعداي بولماسىن، وزدىگىنشە ەمدەلۋگە بولمايدى. مىندەتتى تۇردە وتولارينگولوگقا قارالۋ كەرەك. سەبەبى تەك دارىگەر دۇرىس دياگنوز قويىپ، ەمدەۋ ءادىسىن تاڭداي الادى. قاجەت بولسا، ول ەمدەلۋشىنى قوسىمشا زەرتتەۋگە نەمەسە باسقا ماماندارعا جىبەرەدى.

ول نەلىكتەن پايدا بولادى؟

جۇتىنعاندا قۇلاقتىڭ اۋىرۋى ءجيى ورتاشا ءجىتى وتيتتە پايدا بولادى. جۇقپا (ادەتتە، گەموفيلدى تاياقشا نەمەسە پنيەۆموكوكك) تاماقتان نەمەسە مۇرىن قۋىسىنان يەۆستاحيي تۇتىگى ارقىلى ورتاڭعى قۇلاققا تۇسەدى. شىرىشتىڭ قايتۋى بۇزىلىپ، ول ورتاڭعى قۇلاق ويىعىنا جينالادى. بۇل جەردەن قابىنۋعا دەيىن ءبىر قادام.

ەگەر ادامنىڭ يممۋنيتەتى ءالسىز، سوزىلمالى جۇتقىنشاق اۋرۋى بار، مۇرىن قۇرىلىسىندا اۋىتقۋى بار، سينۋسيت نەمەسە گايموريتى بار بولسا، بۇل اۋرۋ جوعارىدا ايتىلعان جولمەن داميدى.

قالاي ەمدەلۋ كەرەك؟

اۋىرسىنۋدى ازايتۋ ءۇشىن اۋىرۋدى باساتىن ءدارى ءىشىپ، دارىگەرگە قارالۋ كەرەك. دارىگەر قۇلاقتى قاراپ، قۇلاققا ارنالعان تامشىلار جازىپ بەرەدى جانە ۇيدەگى بار قۇرالدارمەن قالاي دۇرىس ەمدەلۋگە بولاتىنىن تۇسىندىرەدى. وتولارينگولوگ قۇلاقتا ءىرىڭنىڭ جينالعانىن نەمەسە جينالماعانىن انىقتاپ بەرە الادى. ەگەر ءىرىڭ جينالعان بولسا، وعان جىلى باسۋعا جانە وزدىگىنشە كەز كەلگەن تامشى تامىزۋعا بولمايدى.

الدىن الۋ

مۇنداي جاعىمسىزدىقتاردى بولدىرماۋعا شىنىقتىرۋشى پروتسەدۋرالار، لور-ورگاندارى اۋرۋلارىن ۋاقىتىندا ەمدەۋ، اۋىز قۋىسى مەن ءتىس گيگيەناسىن ساقتاۋ كومەكتەسەدى.

كەي ادامداردىڭ سۋعا تۇسكەننەن كەيىن دە قۇلاعى اۋىرادى. بۇل جاعدايدا سۋعا كىرەردە قۇلاققا سۋ وتكىزبەيتىن ارنايى زات سالىپ العان ءجون.

قۇلاقتى ءتىس تازالاعىش نەمەسە سىرىڭكە سەكىلدى باسقا زاتتارمەن تازالاماڭىز. ءتىپتى، قۇلاق تازالايتىن تاياقشانىڭ ءوزىن ابايلاپ قولدانىڭىز. ماماندار ماقتا تاياقشانى قۇلاقتىڭ ىشىنە كىرگىزبەي، ونىمەن تەك سىرتقى بولىگىن تازارتۋدى ۇسىنادى.

اقپارات دەرەككوزى: massaget.kz