قازاقستاندىق ج و و- لار وقۋ باعدارلامالارىن وزدەرى وزگەرتەدى – مينيستر

الماتى. قازاقپارات - قازاقستاندىق ج و و- لار جۇمىس بەرۋشىلەردىڭ ۇسىنىستارىن ەسكەرىپ، وقۋ باعدارلامالارىن ەڭبەك نارىعىنىڭ سۇرانىسىنا ساي وزدەرى وزگەرتەدى.

مۇنى ءبىلىم جانە عىلىم ءمينيسترى اسحات ايماعامبەتوۆ ايتتى، دەپ حابارلايدى قازاقپارات.

«الەمدىك QS رەيتينگىندەگى قازاقستاندىق جوعارى وقۋ ورىندارىنىڭ سانى ەكى ەسەگە ارتىپ، 14-كە جەتتى. سونداي- اق ۋنيۆەرسيتەتتەر سانى ارتىپ، Times Higher Education (THE) رەيتينگىنە ەنگەن ۋنيۆەرسيتەتتەردىڭ ورىندارى جاقساردى»، - دەدى ۆەدومستۆو باسشىسى ورتالىق ازيا ەلدەرى رەكتورلارىنىڭ فورۋمىندا.

ونىڭ پايىمىنشا، بۇل - بولون پروتسەسى قاعيداتتارىن جۇزەگە اسىرۋدىڭ، سونداي- اق ۋنيۆەرسيتەتتەرگە اكادەميالىق، باسقارۋشىلىق جانە قارجىلىق دەربەستىك بەرۋدىڭ ناتيجەسى. ەگەر بۇرىن ۇلگىلىك وقۋ جوسپارلارى مەن وقۋ باعدارلامالارىن ءبىلىم مينيسترلىگى بەكىتەتىن بولسا، قازىر ج و و جۇمىس بەرۋشىلەردىڭ پىكىرلەرى مەن ۇسىنىستارىن ەسكەرىپ، ەڭبەك نارىعىنىڭ سۇرانىسىنا ساي وقۋ باعدارلامالارىن وزدەرى وزگەرتەدى.

«بۇل جۇمىس بەرۋشىلەرمەن قارىم- قاتىناسىمىزدى نىعايتتى، ەندى جۇمىس بەرۋشىلەر وزدەرىنىڭ سۇرانىستارى مەن ۇسىنىستارىن كاسىبي ستاندارتتار ارقىلى قالىپتاستىرادى»، - دەدى مينيستر.