مەملەكەت باسشىسى رەفورمالار جونىندەگى جوعارى كەڭەستىڭ وتىرىسىن وتكىزدى

قازاقستان پرەزيدەنتىنىڭ توراعالىعىمەن رەفورمالار جونىندەگى جوعارى كەڭەستىڭ كەزەكتى وتىرىسى ءوتتى.
كۇن تارتىبىندە 3 ماسەلە قارالدى. جيىن الماتى اگلومەراتسياسىن دامىتۋ ماسەلەسىنەن باستالدى.
ۇلتتىق ەكونوميكا ءمينيسترى الىبەك قۋانتىروۆ، الماتى قالاسىنىڭ اكىمى ەربولات دوسايەۆ، الماتى وبلىسىنىڭ اكىمى قانات بوزىمبايەۆ بايانداما جاسادى.
سونداي-اق پرەمەر-مينيستر ءاليحان سمايىلوۆ، پرەزيدەنتتىڭ ەكونوميكالىق دامۋ ماسەلەلەرى جونىندەگى شتاتتان تىس كەڭەسشىسى، رەفورمالار جونىندەگى جوعارى كەڭەس ءتوراعاسىنىڭ ورىنباسارى سەر سۋما چاكرابارتي جانە استانا حالىقارالىق قارجى ورتالىعىنىڭ باسقارۋشىسى قايرات كەلىمبەتوۆ وزدەرىنىڭ ۇسىنىستارىن ايتتى.
سۋ شارۋاشىلىعى سالاسىن دامىتۋعا قاتىستى ەكىنشى ماسەلە بويىنشا ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشوۆ ءسوز سويلەدى.
ءمينيستردىڭ بايانداماسىن تىڭداعان مەملەكەت باسشىسى ورتالىق ازيا وڭىرىندە سۋ ماسەلەسى قاشاندا وتە وزەكتى بولعانىن اتاپ ءوتتى.
ونىڭ ايتۋىنشا، ءقازىر بۇل سالاداعى جاعداي كۇرت ناشارلاپ، ءتىپتى، جاھاندىق ماسەلەگە اينالىپ وتىر.
«كولۋمبيا كليماتتىق مەكتەبىنە قاراستى جەر ينستيتۋتىنىڭ زەرتتەۋى بويىنشا تيان-شان تاۋلارىندا جاۋىن-شاشىننىڭ ازايۋ قاۋپى بار. ال بۇل سۋارمالى ەگىستىكتەر مەن جايىلىمدارعا قاجەتتى تۇشى سۋدىڭ تاپشىلىعىن تۋدىرادى دەگەن ءسوز. تاۋ باسىنداعى جىل بويى جاتاتىن قاردىڭ كولەمى ازايىپ بارادى. عالىمدار الداعى جيىرما جىلدا قار بۇدان دا تەز ەرۋى مۇمكىن دەگەن بولجام جاساپ وتىر»، - دەدى قاسىم-جومارت توقايەۆ.
پرەزيدەنتتىڭ ايتۋىنشا، سىرتقى سۋ اعىنىنىڭ ازايۋى سۋدى ءتيىمسىز پايدالانۋدىڭ سالدارىنان ۋشىعا تۇسۋدە. ونىڭ پىكىرىنشە، سۋ رەسۋرستارى جاعدايىنا مەملەكەتتىك مونيتورينگ جۇرگىزۋ ءىسىن كۇشەيتۋ قاجەت.
«اعىن سۋلاردىڭ رەجيمى مەن سۋ قويمالارىن زەرتتەۋ ءۇشىن 800 گيدرولوگيالىق بەكەت قاجەت بولسا، سونىڭ 310 ى عانا جۇمىس ىستەپ تۇر. تولىققاندى مەملەكەتتىك سۋ كاداسترى جوق. بۇل سۋ رەسۋرستارىنىڭ مولشەرى مەن ساپاسىنا مونيتورينگ جاساۋعا جانە ەكونوميكانىڭ سالالارىن سۋمەن قامتاماسىز ەتۋ جونىندەگى ناقتى تەڭگەرىمگە قول جەتكىزۋگە مۇمكىندىك بەرمەيدى»، - دەدى مەملەكەت باسشىسى.
سونىمەن قاتار قاسىم-جومارت توقايەۆ سۋدى پايدالانۋ سالاسىنداعى ۆەدومستۆوارالىق ۇيلەستىرۋ جۇمىستارىنىڭ ناشار جۇرگىزىلىپ جاتقانىن سىنعا الدى. مەملەكەت باسشىسى سۋ شارۋاشىلىعى ينفراقۇرىلىمىن ءتۇرلى مەملەكەتتىك ورگاندار باسقاراتىنىن اتاپ ءوتىپ، سونىڭ سالدارىنان سۋ رەسۋرستارىنا قاتىستى ءتيىمدى ساياسات جۇرگىزىلمەي وتىرعانىن ايتتى.
«پرەمەر-ءمينيستردىڭ ءبىرىنشى ورىنباسارى جانىنان 2015-جىلى قۇرىلعان سۋ كەڭەسىنىڭ وتىرىسى ءبىر-اق رەت وتكەن. الايدا بۇل كەڭەس پىكىر الماساتىن ءماجىلىس ورگانى عانا ەمەس، ءوزىنىڭ تيىمدىلىگىن كورسەتىپ، شەشىم قابىلداۋى كەرەك. قازىرگى ماسەلەلەرگە باسا ءمان بەرۋ سەكتورداعى جاعدايدى قالپىنا كەلتىرۋ ءۇشىن جۇيەلى شارالار قابىلداۋعا مۇمكىندىك بەرمەي وتىر. ترانسشەكارالىق وزەندەردە سۋ ءبولۋ ماسەلەسى بويىنشا قازاقستاننىڭ كەلىسسوز جۇرگىزۋدەگى ۇستانىمى ءالسىز بولۋى وسىعان بايلانىستى. ىشكى سۋ ساياساتى مىقتى بولماسا، كورشى ەلدەرمەن ءتيىستى سۋ ديپلوماتياسىن قۇرۋ مۇمكىن ەمەس»، - دەدى پرەزيدەنت.
«جاڭا ەكونوميكالىق ساياسات» ماسەلەسى بويىنشا ۇلتتىق ەكونوميكا ءمينيسترى الىبەك قۋانتىروۆ، ستراتەگيالىق جوسپارلاۋ جانە رەفورمالار اگەنتتىگىنىڭ ءتوراعاسى اسەت ەرعاليەۆ، «اتامەكەن» ۇلتتىق كاسىپكەرلەر پالاتاسى پرەزيديۋمىنىڭ ءتوراعاسى رايىمبەك باتالوۆ، پرەزيدەنتتىڭ شتاتتان تىس كەڭەسشىسى سۋما چاكرابارتي بايانداما جاسادى. مەملەكەت باسشىسىنىڭ پىكىرىنشە، بۇرىن-سوڭدى بولماعان جاھاندىق سىن-قاتەرلەر جۇرگىزىلىپ وتىرعان ەكونوميكالىق ساياساتتى تولىعىمەن قايتا زەردەلەۋدى تالاپ ەتەدى.
«ءبىز العا قويعان ماقساتتارعا قول جەتكىزۋ تاسىلدەرىن وزگەرتەمىز. ماسەلەنىڭ ءمانى وسىندا. سوندىقتان جوبادا جالپى باعىتتار مەن ۇرانداردىڭ عانا كورسەتىلگەنى ەمەس، سونداي- اق ناقتى باعىتتار، جاڭا ادىستەردىڭ جوباسى بەرىلگەنى دە وتە ماڭىزدى. سونىمەن قاتار پىسىقتاۋدى قاجەت ەتەتىن بىرنەشە ماسەلە بار. ءبىرىنشى، مەنىڭ ويىمشا، قۇجاتتى ناقتىلاي ءتۇسۋ قاجەت. مىسالى، ءاربىر باعىت بويىنشا ىسكە اسىرىلۋعا ءتيىس ەكونوميكالىق رەفورمالار ءتىزىمىنىڭ ۇلگىسى جانە ولاردىڭ مىندەتتەرى مەن ماقساتتارى كورسەتىلۋى كەرەك. سونداي-اق جوبادا تەحنولوگيالىق جاڭعىرۋ جانە يننوۆاتسيالاردى ەنگىزۋ تاسىلدەرى ناقتىلانباعان. جاڭا جاعدايدا يننوۆاتسيالىق ساياسات قانداي بولۋعا ءتيىس؟ وكىنىشكە قاراي، بۇل ماسەلەدە ناقتى ۇستانىم جوق. ەكىنشىدەن، قۇجات اياسىندا «سامۇرىق-قازىنا» قورى مەن «بايتەرەك» حولدينگىنىڭ ءرولىن انىقتاۋ قاجەت. بۇلار ەكونوميكا ءۇشىن دە، مەملەكەتتىك ساياسات ءۇشىن دە وتە ماڭىزدى سۋبەكتىلەر. سوندىقتان ولاردىڭ جۇمىسىن دۇرىس جۇرگىزۋ ارقىلى بۇكىل ەكونوميكالىق ساياساتتىڭ تيىمدىلىگىن انىقتاۋعا بولادى»، - دەدى قاسىم-جومارت توقايەۆ.
پرەزيدەنت جالپى ۇسىنىلعان تاسىلدەردى ماقۇلدادى جانە بۇگىنگى تالقىلاۋدىڭ ناتيجەلەرىن ەسكەرە وتىرىپ، قۇجاتتى پىسىقتاۋدى تاپسىردى.