قازاقستاندىقتار ءوز سپورتشىسىنىڭ جەڭىپ العان مەدالىنە نارازىلىق ءبىلدىرىپ جاتىر

نۇر-سۇلتان. قازاقپارات - قازاقستاننىڭ سپورتشىلار وداعىنا وتاندىق سۋردوليمپياداشىلار جۇگىندى.

ولار سپورت جانە دەنە شىنىقتىرۋ ىستەرى كوميتەتىنىڭ ءوز سپورتشىلارىنىڭ جەڭىپ العان مەدالىنە نارازىلىق تانىتقانىن ايتىپ شاعىمداندى، دەپ حابارلايدى قازاقپارات ءتىلشىسى.

«جالپى جاعداي مىناداي. بىزگە برازيليادان سۋردليمپيادا قۇرامامىزدىڭ سپورتشىلارى جۇگىندى. سپورتشىمىز دزيۋدوشى ەركەبۇلان قانافين سۋردليمپيادادان ءبىرىنشى التىن مەدالدى جەڭىپ الدى. ال ءبىزدىڭ سپورت كوميتەتى بۇل جايىندا حابار تاراتقان دا جوق. سوراقىسى بۇل ەمەس. قۇراما باپكەرىنىڭ ايتۋىنشا، حالىقارالىق تورەشىلەر جەڭىستى مويىنداعانىنا قاراماستان سپورت كوميتەتى ءوز قۇراماسىنىڭ مەدالىنە نارازىلىق تانىتقان»، - دەلىنگەن قازاقستان سپورتشىلار وداعى ب ا ق وكىلدەرىنە تاراتقان مالىمدەمەدە.

ورىن العان جايتتى قازاقستاننىڭ سۋردليمپيادا كوميتەتىنىڭ ۆيتسە-پرەزيدەنتى ايجان چوكينا دا راستاپ وتىر.

«جاعداي مىناداي: سۋردوليمپياداعا قۇرامانى اپارۋعا سپورت جانە دەنە شىنىقتىرۋ كوميتەتى ەمەس، مادەنيەت جانە سپورت مينيسترلىگى دە ەمەس، تەك ق ر سۋردليمپيادا كوميتەتى عانا قۇقىلى.

ەگەر ولار قاتىسقىسى كەلسە، وندا بىزبەن كەلىسۋى ءتيىس. ياعني، ءبىزدىڭ جانجالىمىز شامامەن 2-3 اي بۇرىن باستالدى. ويتكەنى، ولار باسقا، ءبىز باسقا سپورتشىلاردى ۇسىندىق. ولار ءبىزدىڭ سپورتشىلارىمىزدى زاڭسىز جىبەرمەدى. تۇپتەپ كەلگەندە ءبىزدىڭ دە، ولاردىڭ دا سپورتشىلارى باردى»، - دەدى ايجان چوكينا قازاقپارات تىلشىسىنە تەلەفون ارقىلى.

ونىڭ اتاپ وتۋىنشە، سپورتشىلارعا قىسىم دا كورسەتىلگەن.

«ولار انا جاققا بارعاننان كەيىن سپورت جانە دەنە شىنىقتىرۋ كوميتەتى سپورتشىلارىمىزدى جارىسقا جىبەرۋ ءۇشىن حالىقارالىق وليمپيادا كوميتەتىنە حات جازدى. ال ح و ك بىزگە قولداۋ كورسەتتى. سەبەبى، زاڭعا سايكەس ءبىز عانا قۇرامانى جاساقتاي الامىز. ح و ك ولاردى تىركەۋدەن باس تارتتى. وسى ۋاقىت بويى سپورتشىلارمىزعا قىسىم كورسەتىلدى. سونىڭ سالدارىنان ەكى سپورتشىمىز جەڭىلىپ قالدى»، - دەدى ول.

ايجان چوكينانىڭ ايتۋىنشا، كوميتەت باپكەرلەرى مەن وكىلدەرى سپورتشىلارىمىزدىڭ ناتيجەسىنە وزدەرى قارسىلىق كورسەتىپ قانا قويماي، سپورتشىلارىمىزدىڭ قارسىلاستارىن دا ۇگىتتەگەن.

«بۇل سۋردليميپادا بولعاننان كەيىن بۇكىل سپورتشى الدىمەن دەنساۋلىعىنىڭ جاي-كۇيى قانشالىقتى سايكەس كەلەتىنىن تەكسەرۋگە حالىقارالىق كوميسسيادان وتەدى. سپورتشىلارىمىز كوميسسيادان وتكەننەن كەيىن جارىسقا قاتىستى. ءبىراق، قۇراما باپكەرى سپورتشى ساڭىراۋ ەمەس، ەستيدى دەپ نارازىلىق جازدى. قازاقتاردىڭ ءوزى ءوز سپورتشىسىنا قارسى شىعىپ وتىر. ول اتالعان باپكەرگە ۇنامايدى، بار بولعانى سول. ءتىپتى سول باپكەرگە اۋديوگراممانى كورسەتكەندە دە سابىرعا كەلمەدى. سپورتشىمىز فينالعا شىعۋ ءۇشىن فرانسۋز الەم چەمپيونىمەن بەلدەستى. ولار فرانسۋزدارعا بارىپ، نارازىلىق جازۋعا كەڭەس بەرىپتى»، - دەدى سۋردليمپيادا كوميتەتىنىڭ ۆيتسە-پرەزيدەنتى.

قازاقپارات وسى كەلەڭسىزدىككە بايلانىستى سپورت جانە دەنە شىنىقتىرۋ كوميتەتىنە دە جۇگىنگەن بولاتىن.

ءبىراق، ولار ۇستانىمىن ءسال كەيىنىرەك جاريالاۋعا ۋادە بەردى.

قازاقپارات تىلشىلەرى وقيعانىڭ مۇنان ارى قالاي ءوربيتىنىن نازاردا ۇستايدى.