پارلامەنت تۇڭعىش پرەزيدەنكە قاتىستى زاڭدى قابىلدادى

سەناتورلار ەنگىزگەن تولىقتىرۋ بويىنشا «رەفەرەندۋم تۋرالى» زاڭنان ەلباسى تۋرالى نورما الىنىپ تاستالدى.
«بۇل كونستيتۋتسيالىق زاڭ جوباسىن قازاقستان رەسپۋبليكاسى پارلامەنتىنىڭ دەپۋتاتتارى ازىرلەدى. وزدەرىڭىزگە بەلگىلى، زاڭ جوباسىن بيىل 4- مامىر پارلامەنت ءماجىلىسى ماقۇلداپ، سەناتتىڭ قاراۋىنا جىبەرگەن بولاتىن. زاڭ جوباسىن پارلامەنت سەناتىندا قاراۋ بارىسىندا قوسىمشا تولىقتىرۋ ەنگىزىلدى. بۇل تولىقتىرۋ كوميتەت وتىرىسىندا قارالدى. سەنات، رەسپۋبليكالىق رەفەرەندۋمنىڭ نىساناسى بولا المايتىن ماسەلەلەردى ناقتىلاۋ ماقساتىندا، «رەسپۋبليكالىق رەفەرەندۋم تۋرالى» كونستيتۋتسيالىق زاڭنىڭ 3-بابى 2) - تارماقشاسىن جاڭا رەداكسيادا ۇسىنىپ وتىر. اتاپ ايتاتىن بولساق، «مەملەكەتتىڭ تاۋەلسىزدىگىن، رەسپۋبليكانىڭ بىرتۇتاستىعى مەن اۋماقتىق تۇتاستىعىن، ونى باسقارۋ نىسانىن، رەسپۋبليكا قىزمەتىنىڭ تۇبەگەيلى قاعيداتتارىن وزگەرتۋ» ماسەلەلەرى رەفەرەندۋم تالقىسىنا قويىلاتىن ماسەلەلەر بولا المايدى»، - دەدى ءماجىلىستىڭ زاڭناما جانە سوت-قۇقىقتىق رەفورما كوميتەتىنىڭ ءتوراعاسى ارمان قوجاحمەتوۆ.
ونىڭ ايتۋىنشا، وسى تارماقشانىڭ قولدانىستاعى رەداكسياداعى «تاۋەلسىز قازاقستاننىڭ نەگىزىن سالۋشى، قازاقستان رەسپۋبليكاسىنىڭ تۇڭعىش پرەزيدەنتى - ەلباسى ىرگەسىن قالاعان رەسپۋبليكا قىزمەتىنىڭ تۇبەگەيلى پرينتسيپتەرىن جانە قازاقستان رەسپۋبليكاسىنىڭ تۇڭعىش پرەزيدەنتى - ەلباسىنىڭ مارتەبەسىن وزگەرتۋ» دەگەن سوزدەردى پارلامەنت سەناتى الىپ تاستاۋدى ۇسىندى.
«قورىتا كەلگەندە، «رەسپۋبليكالىق رەفەرەندۋم تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا وزگەرىستەر مەن تولىقتىرۋ ەنگىزۋ تۋرالى» كونستيتۋتسيالىق زاڭ جوباسىنا پارلامەنت سەناتى ەنگىزگەن تولىقتىرۋمەن كەلىسۋدى ۇسىنامىز»، - دەدى كوميتەت ءتوراعاسى.
اتاپ ايتقاندا، پالاتا وتىرىسىنا قاتىسقان 96 دەپۋتاتتىڭ بارلىعى اتالعان وزگەرىستەرگە قولداۋ ءبىلدىردى. ەندى بۇل قۇجات مەملەكەت باسشىسىنا قول قويۋعا جىبەرىلەدى. بۇدان بۇرىنت حابارلانعانداي، بۇگىن سەناتتىڭ جالپى وتىرىسىندا «رەسپۋبليكالىق رەفەرەندۋم تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا وزگەرىستەر مەن تولىقتىرۋ ەنگىزۋ تۋرالى» كونستيتۋتسيالىق زاڭ جوباسى قارالدى.
قۇجاتقا تۇزەتۋلەر ەنگىزىلگەندىكتەن زاڭ جوباسى ماجىلىسكە قايتارىلدى.
قۇجاتتىڭ بۇرىنعى نۇسقاسى بويىنشا تۇڭعىش پرەزيدەنتتىڭ مارتەبەسىنە قاتىستى ماسەلەلەر رەسپۋبليكالىق رەفەرەندۋمنىڭ نىساناسى بولا المايدى.
سەنات دەپۋتاتتارى بۇل نورمانى زاڭ جوباسىنان الىپ تاستاۋدى ۇسىندى. تۇزەتۋ قولدانىستاعى زاڭنىڭ 3-بابىنىڭ 2-تارماعى تۋرالى بولىپ وتىر.