جۇمىسپەن قامتۋ سالاسىندا ەسكى تاسىلدەردەن ارىلۋ كەرەك - سەنات سپيكەرى

«حالىقتىڭ تابىسىن ارتتىرۋ - ەڭ ماڭىزدى ماسەلە. بۇل باعىتتا ۇكىمەت جاڭا باعدارلامانى قولعا الىپ، قارقىندى جۇمىس جۇرگىزىپ جاتىر. بۇل سالاداعى كەشەندى جوسپاردى ىسكە اسىرۋ ءۇشىن 197 ميلليارد تەڭگە بولىنەدى. وسى رەتتە ۋاقىتشا جۇمىس ورىندارىن اشۋ، تولەماقى تولەۋ سياقتى ەسكى تاسىلدەرگە جول بەرمەي، جاڭا باسىمدىقتاردى قولعا الۋىمىز كەرەك. حالىقارالىق تاجىريبەلەردى زەردەلەپ، كەدەيشىلىكپەن، جۇمىسسىزدىقپەن كۇرەستە ناقتى ناتيجەگە جەتكەن ەلدەردىڭ وزىق ۇلگىلەرىن ەسكەرۋىمىز قاجەت. بۇل - جاڭا قازاقستان قۇرۋ جولىنداعى ماڭىزدى قادامداردىڭ ءبىرى بولارى ءسوزسىز»، - دەدى ماۋلەن اشىمبايەۆ.
وسى ورايدا سەنات ءتوراعاسى پرەمەر-ءمينيستردىڭ ورىنباسارى ەرالى توعجانوۆتى وسى سەسسيانىڭ اياعىنا دەيىن پالاتا وتىرىسىنا ارنايى شاقىراتىنىن ايتتى.
«وتىرىس بارىسىندا جاڭا تاسىلدەرگە بايلانىستى، اتقارىلاتىن جۇمىستارعا قاتىستى دەپۋتاتتارعا اقپارات بەرسەڭىز. ءوز تاراپىمىزدان ىسكە اسىرىلاتىن قادامدار بويىنشا كورسەتىلەتىن قولداۋدى پىسىقتاپ العان ءجون بولار ەدى. سوندىقتان سەسسيانىڭ اياعىنا دەيىن تاعى ءبىر كەزدەسەمىز»، - دەدى م. اشىمبايەۆ ۇكىمەت باسشىسىنىڭ ورىنباسارىنا قاراتا ايتقان سوزىندە.
اتاپ ايتقاندا، بۇگىن سەنات وتىرىسىندا دەپۋتاتتار «قازاقستان رەسپۋبليكاسىنىڭ ۇلتتىق قورىنان 2022-2024-جىلدارعا ارنالعان كەپىلدەندىرىلگەن ترانسفەرت تۋرالى» قازاقستان رەسپۋبليكاسىنىڭ زاڭىنا وزگەرىس ەنگىزۋ تۋرالى» جانە «2022-2024-جىلدارعا ارنالعان رەسپۋبليكالىق بيۋجەت تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارىن تالقىلادى.
بۇدان بۇرىن حابارلانعانداي، بۇگىن سەناتتىڭ جالپى وتىرىسىندا «رەسپۋبليكالىق رەفەرەندۋم تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا وزگەرىستەر مەن تولىقتىرۋ ەنگىزۋ تۋرالى» كونستيتۋتسيالىق زاڭ جوباسى قارالدى.
قۇجاتقا تۇزەتۋ ەنگىزىلگەندىكتەن زاڭ جوباسى ماجىلىسكە قايتارىلدى.