سەنات رەفەرەندۋمعا قاتىستى زاڭ جوباسىن تۇزەتۋلەرمەن ماجىلىسكە قايتاردى

قۇجاتقا تۇزەتۋلەر ەنگىزىلگەندىكتەن زاڭ جوباسى ماجىلىسكە قايتارىلدى، دەپ حابارلايدى قازاقپارات ءتىلشىسى.
سەناتورلار «رەفەرەندۋم تۋرالى» زاڭنان ەلباسى تۋرالى نورمانى الىپ تاستادى. قۇجاتتىڭ بۇرىنعى نۇسقاسى بويىنشا تۇڭعىش پرەزيدەنتتىڭ مارتەبەسىنە قاتىستى ماسەلەلەر رەسپۋبليكالىق رەفەرەندۋمنىڭ نىساناسى بولا المايدى. سەنات دەپۋتاتتارى بۇل نورمانى زاڭ جوباسىنان الىپ تاستاۋدى ۇسىندى.
تۇزەتۋ قولدانىستاعى زاڭنىڭ 3-بابىنىڭ 2-تارماعى تۋرالى بولىپ وتىر. سەناتتىڭ رەداكسياسىندا بۇل نورما «مەملەكەتتىڭ تاۋەلسىزدىگىن، رەسپۋبليكانىڭ ءبىرتۇتاستىعى مەن اۋماقتىق تۇتاستىعىن، ونى باسقارۋ نىسانىن، رەسپۋبليكا قىزمەتىنىڭ تۇبەگەيلى پرينتسيپتەرىن وزگەرتۋ» ماسەلەلەرى عانا رەفەرەندۋمنىڭ نىساناسى بولا المايتىنىن كوزدەيدى. ەندى بۇل زاڭ جوباسىن ءماجىلىس دەپۋتاتتارى قايتا قارايدى. ەگەر ولار كەلىسسە، قۇجات الداعى ۋاقىتتا مەملەكەت باسشىسىنا قول قويۋعا جىبەرىلەدى.
اۆتور: رۋسلان عابباسوۆ