قازاقتەلەكوم شاعىن وپەراتورلاردان تابىسىنىڭ جارتىسىن بەرۋدى تالاپ ەتىپ وتىرعان - مينيستر

نۇر- سۇلتان. قازاقپارات – ق ر سيفرلىق دامۋ، يننوۆاتسيالار جانە ايەروعارىش ونەركاسىبى ءمينيسترى باعدات مۋسين ءماجىلىستىڭ باسپا ءسوز الاڭىندا ب ا ق وكىلدەرىنىڭ ساۋالدارىنا جاۋاپ بەرە وتىرىپ، «قازاقتەلەكوم» مەن «ترانستەلەكوم» كومپانيالارى شاعىن وپەراتورلاردىڭ جۇمىسىن قالاي قيىنداتقانىن ايتىپ بەردى، دەپ حابارلايدى قازاقپارات ءتىلشىسى.
None
None

«قازىر مونوپولياسىزداندىرۋ بويىنشا جۇمىس جۇرگىزىپ جاتىرمىز. ءبىز اۋىلدىق ەلدى مەكەندەردە شاعىن وپەراتورلاردىڭ پايدا بولعانىن قۇپتايمىز، ىنتالاندىرىپ جاتىرمىز. مىسالى 1000 تۇرعىنى بار اۋىلدىڭ ىشىنە بيزنەسمەن كەلىپ، جەلىلەردى باعانا ارقىلى ءاربىر ۇيگە تاراتىپ، اقشا تابا الادى. ءبىراق ول قىزمەتتى حالىققا ۇسىنۋ ءۇشىن شاعىن وپەراتور «قازاقتەلەكوم» الدە «ترانستەلەكومنىڭ» جەلىلەرىنە قوسىلۋ پروبلەماسىنا تاپ بولادى. ياعني، ول - مونوپوليا. باسقالاردىڭ ەلدى مەكەن ىشىنە ينتەرنەت تاراتۋىنا مۇمكىندىك بەرمەيدى، ءوزى دە تاراتپايدى»، - دەگەن مينيستر.

سونداي- اق، ول بۇل باعىتتا باسەكەلەستىكتى دامىتۋ جانە قورعاۋ اگەنتتىگىمەن بىرگە جۇمىس ىستەپ جاتقانىن اتاپ ءوتتى.

«قازىر مونوپوليستەر جاعدايدى پايدالانا وتىرىپ، شاعىن وپەراتورلارعا 50/50 قاعيداتى بويىنشا جۇمىس ىستەۋدى ۇسىنادى. ياعني، بيزنەسمەن جەلىنى ءوز كۇشىمەن تارتىپ، حالىقپەن جۇمىس ىستەۋى كەرەك. سودان تۇسكەن تابىسىنىڭ 50 پايىزىن مونوپوليسكە بەرۋى شارت. وسى ماسەلەنى ءبىز مونوپولياسىزداندىرۋ كوميسسياسىندا كوتەردىك. قازىر باسەكەلەستىكتى دامىتۋ جانە قورعاۋ اگەنتتىگىمەن بىرلەسىپ، زاڭعا وزگەرىستەر ەنگىزۋ بويىنشا جۇمىس ىستەپ جاتىرمىز»، - دەدى باعدات مۋسين.

ۆەدومستۆو باسشىسىنىڭ ايتۋىنشا، قازىر اتالعان مونوپوليستەر اۋىلداردا تەك مەملەكەتتىك مەكەمەلەرگە عانا ينتەرنەت تارتىپ وتىر. ونىڭ وزىندە بۇل جۇمىس مەملەكەت بيۋدجەتىنىڭ ەسەبىنەن جۇزەگە اسادى.

«تۇرعىن سانى 250-دەن اساتىن اۋىلدى مەكەندەردىڭ 1200-ىنە سىمدى جەلىدە وپتيكا جەتكىزىلدى. ءبىراق وپتيكانىڭ اۋىلدى مەكەن ىشىندە تاراتىلۋى پروبلەما بولىپ تۇر. ويتكەنى «قازاقتەلەكوم» مەن «ترانستەلەكوم» 2018 -جىلى جاسالعان كەلىسىمشارت بويىنشا تەك قانا مەكتەپ، اكىمدىك سياقتى ءۇش مەكەمەگە عانا ينتەرنەت جەتكىزدى. ال ەلدى مەكەننىڭ ىشىندە تاراتۋعا ەكونوميكالىق تۇرعىدان نەگىز جوق دەيدى. ءبىز ولارعا بيۋدجەت قاراجاتىن مەملەكەتتىك مەكەمەلەرگە عانا بولدىك. سول قاراجات ولارعا جەتكىلىكتى بولىپ تۇر. سوندىقتان وسىنداي ماسەلەگە تاپ بولدىق»، - دەدى مينيستر.

باعدات مۋسيننىڭ ايتۋىنشا، تاياۋ ارادا اۋىل پوشتالارىندا «سيفرلىق بۇرىشتار» پايدا بولادى.

اۆتور: ەسىمجان ناقتىباي


سوڭعى جاڭالىقتار