قاراعاندىلىق قىز گونكونگ ۋنيۆەرسيتەتىنىڭ ۇزدىك ستۋدەنتتەرىنىڭ قاتارىنا كىردى

قازىر ول ۋنيۆەرسيتەتتىڭ قۇرىلىس ورتاسى جانە ەنەرگەتيكا دەپارتامەنتىنىڭ ءتورتىنشى كۋرسىندا وقيدى، دەپ حابارلايدى قازاقپارات.
گۇلجان 2018 -جىلى قاراعاندىنىڭ نازاربايەۆ زياتكەرلىك مەكتەبىن ءبىتىردى. جاقىندا ول وقۋداعى ەرەكشە جەتىستىكتەرى مەن ۋنيۆەرسيتەتتىڭ قوعامدىق ومىرىنە بەلسەندى قاتىسقانى ءۇشىن ۇزدىك ستۋدەنت اتاعىنا يە بولدى. قىز بالا ءوز اسەرلەرى جانە جوسپارلارى تۋرالى ايتتى.
«ءتورتىنشى كۋرستىڭ باسىندا مەن ەنەرگيا سالاسىنداعى زەرتتەۋلەرمەن اينالىسقىم كەلەتىنىن ءتۇسىندىم، سوندىقتان باكالاۆرياتتى بىتىرگەننەن كەيىن وقۋدى PhD in Mechanical Engineering باعدارلاماسى بويىنشا جالعاستىرامىن. ارينە، ۇزدىك ستۋدەنت اتاعى مەن ءۇشىن ۇلكەن جاۋاپكەرشىلىك. مەن قازاقستاندىق وقۋشىلارعا بىرنەشە كەڭەس بەرگىم كەلەدى. بىرىنشىدەن، وقۋعا جانە ءبىلم الۋعا بار كۇشىڭدى سالۋ كەرەك. ەكىنشىدەن، ءوزىڭدى باسقالارمەن سالىستىرۋدىڭ قاجەتى جوق جانە ءبىر نارسە بولماي جاتسا، رەنجىپ، ەنسەڭدى تۇسىرمەۋ كەرەكسىڭ. جۇمىستى جالعاستىرىپ، ءوز كۇشىڭە سەنۋ كەرەك. ۇشىنشىدەن، مۇمكىندىك جوق جەردە ءوزىڭىزدى سىناپ كورسەڭىز جاقسى بولار ەدى. ەگەر قولىڭىزدان كەلسە، ءسىز ءوزىڭىز قالاعان ناتيجەگە قول جەتكىزەسىز، ال بولماي جاتسا - سىزگە جوق دەگەن جاۋاپ كەلەر. ول جاسالماعان نارسەگە وكىنۋدەن الدەقايدا جاقسى»، - دەدى گۇلجان.
مۇعالىمدەر گۇلجان كەز- كەلگەن ورتانىڭ كوڭىلىن كوتەرەتىن جارقىن تۇلعا جانە وپتيميست دەپ اتايدى. مەكتەپ قابىرعاسىندا دا ول قۇرداستارىنان كۇردەلى ماسەلەلەردى شەشۋدىڭ ستاندارتتى ەمەس تاسىلدەرىن ۇسىنۋمەن ەرەكشەلەندى.
«گۇلجان - ەرەكشە بالا. مەنى ءارقاشان ونىڭ ويلاۋ لوگيكاسى تاڭ قالدىرادى. ول ءاردايىم وقۋعا جاۋاپكەرشىلىكپەن قارادى. قورىقپاي، قيىن مىندەتتەردى قولعا الدى، كەيدە ءتىپتى قوسىمشا شارتتار ويلاپ تاۋىپ، ولاردى قيىنداتىپ جىبەرەتىن. ول جان- جاقتى دامىعان. ءارقاشان ءوز ءبىلىمىن قايدا جانە قانداي سالالاردا قولدانا الاتىنىن تۇسىنۋگە تىرىستى. وسىنى بايقاعان سوڭ مەن وعان 2018 -جىلى ى. التىنسارين اتىنداعى عىلىمي ءبىلىم اكادەمياسىنىڭ «ءبىلىم - وبرازوۆانيە» جۋرنالىنا بىرلەسكەن ماقالا جازۋدى ۇسىندىم. وندا ول ماتەماتيكانىڭ قولدانبالى سيپاتىن ءارتۇرلى بولىمدەردە اشا ءبىلدى»، - دەيدى قاراعاندىنىڭ NIS ماتەماتيكا ءپانىنىڭ مۇعالىمى سۆەتلانا پەتەرس.
وسىعان دەيىن قاراعاندى وبلىسىنىڭ ءبىلىم بەرۋ ۇيىمدارىندا كوروناۆيرۋسكە قاتىستى شەكتەۋلەر الىنعانىن جازعان بولاتىنبىز.
اۆتور: اگاتا مۋحامەدجانوۆا