ءماشھۇر ءجۇسىپتىڭ بۇرىن-سوڭدى جاريالانباعان شىعارمالارى كوپتومدىق بولىپ شىعادى

پاۆلودار. قازاقپارات - پاۆلودار وبلىسىندا ءماشھۇر ءجۇسىپ كوپەيەۆتىڭ بۇعان دەيىن جاريالانباعان شىعارمالارى مەن جۇمىستارى ەنگەن ءۇش تومدىق دايىندالىپ جاتىر.
None
None

بۇل تۋرالى بۇگىن تورايعىروۆ ۋنيۆەرسيتەتىندە «ءماشھۇر ءجۇسىپتىڭ تاريحي مۇراسى مەن قوعامنىڭ رۋحاني دامۋى» اتتى حالىقارالىق عىلىمي-تاجىريبەلىك كونفەرەنتسيادا بەلگىلى بولدى، دەپ حابارلايدى قازاقپارات.

تورايعىروۆ ۋنيۆەرسيتەتىندە 2004-جىلدان بەرى عىلىمي-تاجىريبەلىك ورتالىق جۇمىس ىستەيدى.

«ءماشھۇر تانۋ» ءپانى ەنگىزىلگەن. م. كوپەيەۆتىڭ شىعارمالارى مەن ەنتسيكلوپەديالارىنىڭ 20 تومدىعى جارىق كوردى. بالالارعا ارنالعان يلليۋستراتسيالىق اڭگىمەلەر جيناعى دا وقىرمانعا جول تارتتى. قازىرگى ۋاقىتتا ورىس تىلىندەگى ءۇش تومدىق ازىرلەنىپ جاتىر، ونىڭ قۇرامىندا بۇعان دەيىن جاريا بولماعان شىعارمالار مەن جۇمىستار ەنگىزىلمەك.

ءماشھۇر ءجۇسىپتىڭ مۇراسىن زەرتەۋشىلەر قاتارى ارتىپ كەلەدى. ماسەلەن، قازاقستاننان بولەك، امەريكا، جاپونيا عالىمدارى قىزىعۋشىلىق تانىتىپ وتىر. كونفەرەنسيا بارىسىندا م. كوپەيەۆتىڭ قازاق قوعامىنا بەرگەن مۇراسى تۋرالى ويلارىمەن موڭعوليا جانە تۇركيا ەلدەرىنىڭ وكىلدەرى ءبولىستى.

فيلوسوفتىڭ شوبەرەسى، ر. ب. سۇلەيمەنوۆ اتىنداعى شىعىس تانۋ ينستيتۋتى تاريحي ماتەريالداردى زەرتتەۋ رەسپۋبليكالىق اقپاراتتىق ورتالىعىنىڭ ديرەكتورى مەرۋەرت ابۋسەيىتوۆا اتاپ وتكەندەي، ۇلى قازاق ەتنوگرافى ءوز حالقىنىڭ تاريحىن شەجىرە ارقىلى جەتكىزدى.

«ءماشھۇر ءجۇسىپتىڭ جازبا ءداستۇرى بىرەگەي ءارى تاريحتى اۋىزشا جيناعان وزگەلەردەن ەرەكشەلەنەدى. ول «دالا تاريحى» باعىتىنىڭ نەگىزىن قالاۋشى»، - دەيدى تاريح عىلىمدارىنىڭ دوكتورى.

ق ر ءبىلىم جانە عىلىم مينيسترلىگى جانىنداعى ءدىن تانۋ، ساياساتتانۋ جانە فيلوسوفيا ينستيتۋتىنىڭ باس عىلىمي قىزمەتكەرى اياجان ساعي قىزىنىڭ ايتۋىنشا، ويشىلدىڭ مۇراسى رۋحاني بولاشاققا باعىتتايدى.

«ويشىلدىڭ مۇراسىندا ءار ادام ءوز حالقىن، ءداستۇرىن، ۇرپاعىن قۇرمەتتەپ، ءسۇيىپ ءومىر ءسۇرۋ كەرەكتىگى تۋرالى ايتىلادى. بۇل ومىرلىك قاعيداتتار ادام تۇرمىسىنىڭ ماعىناسىن انىقتاۋعا كومەكتەسەدى. ءبىراق، ءماشھۇر ءجۇسىپتىڭ نەگىزگى يدەياسى بولاشاققا اپارار جول تۋعان جەر، ادامدارعا دەگەن سۇيىسپەنشىلىك ارقىلى جەتەدى دەگەن پىكىرگە سايادى»، - دەيدى فيلوسوفيا عىلىمدارىنىڭ دوكتورى.

ق ر ب ع م تاريح جانە ەتنولوگيا ينستيتۋتىنىڭ ديرەكتورى زيابەك قابىلدينوۆ ءماشھۇر ءجۇسىپ جيناعان تاريحي ماتەريالدار تۇرعىسىندا پىكىرىن ءبىلدىردى. تاريحي دەرەككوزدەر 18-19- عاسىرلاردىڭ باسىنداعى كەزەڭدەرگە قاتىستى.

ايتا كەتەيىك، پاۆلودار وبلىسىندا ءماشھۇر ءجۇسىپ كوپەيەۆتىڭ مادەني-تاريحي مۇراسىن ساقتاۋ بويىنشا كەشەندى زەرتتەۋ جۇمىستارى قولعا الىنعان.

ونىڭ ەسىمى ورتالىق مەشىتكە بەرىلگەن. 2006-جىلى ەسكى مازاردىڭ ورنىنا ۇلكەن كەشەن سالىندى. بۇگىندە قاسيەتتى جەرگە جۇزدەگەن ادام كەلىپ، دۇعا باعىشتايدى.

سوڭعى جاڭالىقتار