قاسىم- جومارت توقايەۆ جاپونيا پرەمەر- ءمينيسترىن قازاقستانعا شاقىردى

نۇر- سۇلتان. قازاقپارات - قاسىم- جومارت توقايەۆ قازاقستان استاناسىنا رەسمي ساپارمەن كەلگەن جاپونيانىڭ سىرتقى ىستەر ءمينيسترى ەشيماسا ءحاياشيدى قابىلدادى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.
None
None

كەزدەسۋدە قازاقستان مەن جاپونيا اراسىنداعى ساۋدا- ەكونوميكالىق، ينۆەستيتسيالىق جانە مادەني- گۋمانيتارلىق سالالارداعى كەڭەيتىلگەن ستراتەگيالىق سەرىكتەستىكتىڭ جاي- كۇيى مەن دامۋ پەرسپەكتيۆالارى، سونداي- اق حالىقارالىق قۇرىلىمدار اياسىنداعى ءوزارا ءىس- قيمىل ماسەلەلەرى تالقىلاندى. قاسىم- جومارت توقايەۆ ەشيماسا حاياشيگە ءىلتيپات ءبىلدىرىپ، ەكىجاقتى بايلانىستاردى ودان ءارى ىلگەرىلەتۋ ءۇشىن ونىڭ بۇل ساپارىنىڭ ءمانى زور ەكەنىن اتاپ ءوتتى.

- جاپونيا - ەلىمىز ءۇشىن دوستاس مەملەكەت. ءبىز ەكىجاقتى قاتىناستاردى جوعارى باعالايمىز. بيىل ەكى ەل اراسىنداعى قاتىناستاردىڭ 30 جىلدىعىن اتاپ وتەمىز. بۇل - تاريحي بەلەس. وسى كەزەڭ ىشىندە كونسترۋكتيۆتى ىنتىماقتاستىق ورناتتىق، ستراتەگيالىق سەرىكتەستىكتى كەڭەيتتىك. بۇل ءوزارا اتقارعان جۇمىستىڭ وڭ ناتيجەسى، - دەدى قاسىم- جومارت توقايەۆ.

قازاقستان مەن جاپونيا اراسىنداعى ىنتىماقتاستىقتا ەكونوميكالىق قاتىناستار ماڭىزدى ءرول اتقارادى. پرەزيدەنت ساۋدا جانە ينۆەستيتسيالىق ىقپالداستىقتىڭ الەۋەتى زور ەكەنىنە نازار اۋداردى. مەملەكەت باسشىسى جاپونيامەن اراداعى كوپجاقتى ەكونوميكالىق بايلانىستاردى كۇشەيتۋگە نيەتتى ەكەنىن ايتتى. بۇدان بولەك ەكى ەلدىڭ ب ۇ ۇ اياسىنداعى تابىستى ىقپالداستىعىن، سونداي- اق مادەني- گۋمانيتارلىق سالاداعى مۇمكىندىكتەرىن جوعارى باعالادى.

قاسىم- جومارت توقايەۆ جاپونيانىڭ پرەمەر- ءمينيسترى فۋميو كيشيدانى قولايلى ۋاقىتتا قازاقستانعا ساپارمەن كەلۋگە شاقىرعانىن ناقتىلادى. مەملەكەت باسشىسىنىڭ پىكىرىنشە، جوعارى دەڭگەيدەگى كەزدەسۋلەردى ۇيىمداستىرۋ ءۇشىن قازاقستان مەن جاپونيا اراسىنداعى ىنتىماقتاستىقتىڭ قازىرگى احۋالى مەن الەۋەتىنىڭ بەرىك نەگىزى بار. ءوز كەزەگىندە ەشيماسا حاياشي كەزدەسۋگە مۇمكىندىك بەرگەنى ءۇشىن قاسىم- جومارت توقايەۆقا العىس ايتتى.

مينيستر جاپونيا ۇكىمەتىنىڭ قازاقستانمەن ساۋدا- ەكونوميكالىق جانە ينۆەستيتسيا سالالارى بويىنشا ءوزارا ءتيىمدى سەرىكتەستىكتى كەڭەيتۋگە دايىن ەكەنىن جەتكىزدى. سونداي- اق ورتالىق ازيا ەلدەرىنىڭ ىشىندە قازاقستاندا جاپون كومپانيالارى كوپ ەكەنىن اتاپ ءوتتى. ەشيماسا حاياشي قاسىم- جومارت توقايەۆتىڭ باسشىلىعىمەن جۇزەگە اسىرىلىپ جاتقان اۋقىمدى رەفورمالاردى قولدادى جانە قازاقستاننىڭ اۋعان حالقىنا گۋمانيتارلىق كومەك كورسەتۋ جونىندەگى كۇش- جىگەرىنە جوعارى باعا بەردى. بۇدان بولەك اڭگىمەلەسۋ بارىسىندا حالىقارالىق جانە وڭىرلىك كۇن تارتىبىندەگى وزەكتى ماسەلەلەر تالقىلاندى. «ورتالىق ازيا - جاپونيا» فورماتىنداعى ديالوگتى ودان ءارى دامىتۋدىڭ ماڭىزدى ەكەنى اتاپ ءوتىلدى.

سوڭعى جاڭالىقتار