12:21, 29 - ءساۋىر 2022 | GMT +5
اتا زاڭعا وزگەرىستەر ەنگىزۋگە قاتىستى جالپىۇلتتىق رەفەرەندۋم وتكىزۋدى ۇسىنامىن - پرەزيدەنت
نۇر-سۇلتان. قازاقپارات - قازاقستان حالقى اسسامبلەياسىنىڭ «ەل بىرلىگى - جاڭارعان قازاقستاننىڭ تىرەگى» اتتى 31-سەسسياسىندا مەملەكەت باسشىسى قاسىم-جومارت توقايەۆ اتا زاڭعا وزگەرىستەر مەن تولىقتىرۋلار ەنگىزۋ جونىندە رەسپۋبليكالىق رەفەرەندۋم وتكىزۋدى ۇسىندى، دەپ حابارلايدى قازاقپارات ءتىلشىسى.

«ازىرلەنگەن تۇزەتۋلەردىڭ تاريحي ماڭىزى بار. ءبىز مەملەكەتتىگىمىزدىڭ دامۋ جولىنداعى جاڭا كەزەڭگە قادام باسقالى تۇرمىز. وسى رەفورمالار قولعا الىنعان كەزدە كونستيتۋتسياعا ەنگىزىلەتىن وزگەرىستەر مەن تولىقتىرۋلاردىڭ جوباسىن پارلامەنت قارايدى دەپ ويلاعان ەدىم. بۇل - قولدانىستاعى زاڭنامادا ورنىققان ءراسىمنىڭ ءبىرى. الايدا، الداعى اۋقىمدى ءارى ماڭىزدى وزگەرىستەر ەل بولاشاعىنا ايرىقشا اسەر ەتەدى. سوندىقتان مەن اتا زاڭعا وزگەرىستەر مەن تولىقتىرۋلار ەنگىزۋ جونىندە رەسپۋبليكالىق رەفەرەندۋم وتكىزۋدى ۇسىنامىن»، - دەدى ق ر پرەزيدەنتى.
مەملەكەت باسشىسى رەفەرەندۋم ماڭىزدى دەموكراتيالىق ينستيتۋت ەكەنىن باسا ايتتى.
«الايدا، قازاقستاندا سوڭعى رەت 1995 -جىلى قولدانىستاعى كونستيتۋتسيا بەكىلگەن كەزدە دە وتكىزىلگەن ەدى»، - دەدى قاسىم-جومارت توقايەۆ.