بيزنەس ورتانى دا بيۋروكراتيادان ارىلتۋ وتە ماڭىزدى ماسەلە - رايىمبەك باتالوۆ

نۇر- سۇلتان. قازاقپارات - ۇلتتىق پالاتا تۋرالى زاڭناماعا وزگەرتۋلەر ازىرلەنىپ جاتىر. بۇل تۋرالى «اتامەكەن» ۇلتتىق كاسىپكەرلەر پالاتاسى پرەزيديۋمىنىڭ ءتوراعاسى رايىمبەك باتالوۆ ايتتى، دەپ حابارلايدى قازاقپارات ءتىلشىسى.
None
None

«مەملەكەت باسشىسىمەن كەزدەسۋدە پالاتانى ترانسفورماتسيالاۋ ماسەلەسى، ءبىزدىڭ كوزقاراسىمىز، تۇجىرىمدامامىز تالقىلاندى. مەملەكەت باسشىسى ءبىز ءۇشىن وتە ماڭىزدى بىرنەشە باعىتتى ماقۇلدادى. ءبىرىنشىسى - شاعىن جانە ورتا بيزنەسپەن بايلانىستى ماسەلەلەر. ەڭ الدىمەن وڭىرلەرگە نازار اۋدارۋ قاجەت. شاعىن جانە ورتا بيزنەس بويىنشا جەكەلەگەن باعدارلاما، دامۋ باعدارلاماسىن ەنگىزىپ، پالاتا جۇمىسىن نەگىزىنەن وڭىرلەرگە قاراي قايتا پىشىمدەۋ قاجەت. اكىمدىكتەرمەن جۇمىس ىستەۋ كەرەك. بۇل - جۇمىستىڭ وتە اۋقىمدى ءارى ماڭىزدى مايدانى. سالالاردى دامىتۋ، ۇلتتىق پالاتا، جالپى بيزنەس تاراپىنان ساراپتامانى جاقسارتۋ جەكە باعىت سانالادى»، - دەدى ول ق ر پرەزيدەنتى باسپا ءسوز قىزمەتىنىڭ Telegram كانالىندا جاريالانعان ۆيدەودا.

ونىڭ اتاپ وتۋىنشە، بيزنەستى قورعاۋ دا ماڭىزدى باعىتتاردىڭ ءبىرى. بۇل رەتتە پالاتا سوتتارمەن، باس پروكۋراتۋرامەن تىعىز جۇمىس ىستەۋى ءتيىس.

«مەملەكەتتىك ورگانداردى عانا ەمەس، سونىمەن بىرگە بيزنەس ورتانى دا بيۋروكراتيادان ارىلتۋ وتە ماڭىزدى. پالاتا بەلگىلى ءبىر دارەجەدە مينيسترلىككە اينالعانىن بايقاپ وتىرمىز. ونى ىسكەرلىك ورتاعا اينالدىرۋىمىز قاجەت. بۇل ماسەلە دە قولداۋ تاپتى. ۇلتتىق پالاتا تۋرالى زاڭعا وزگەرتۋ ەنگىزۋ كەرەكتىگى دە تالقىلاندى. قازىر وسى باعىتتا بەلسەندى جۇمىس ىستەپ جاتىرمىز. تاياۋ ارادا ۇلتتىق پالاتا تۋرالى زاڭناماعا ەنگىزىلەتىن وزگەرىستەرگە قاتىستى ۇسىنىسىمىزدى ۇكىمەتكە بەرەمىز»، - دەدى رايىمبەك باتالوۆ.

بۇگىن رايىمبەك باتالوۆ ق ر پرەزيدەنتى قاسىم- جومارت توقايەۆقا ۇلتتىق كاسىپكەرلەر پالاتاسىن ترانسفورماتسيالاۋ جولدارىن تانىستىرعان ەدى.

سوڭعى جاڭالىقتار