تاكسوپاركتەر ءاربىر ونىنشى تاكسيدى مۇگەدەكتىگى بار ادامدارعا بەيىمدەۋى كەرەك - زاڭ جوباسى

نۇر- سۇلتان. قازاقپارات – ق ر پارلامەنتى ماجىلىسىندە تاكسوپاركتەردى ءاربىر ونىنشى تاكسيدى مۇگەدەكتىگى بار ادامدارعا بەيىمدەۋگە مىندەتتەيتىن زاڭ جوباسى تالقىلانىپ جاتىر، دەپ حابارلايدى قازاقپارات ءتىلشىسى.
None
None

«قازاقستان رەسپۋبليكاسىنىڭ كەيبىر زاڭنامالىق اكتىلەرىنە مۇگەدەكتىگى بار ادامداردىڭ ءومىر ءسۇرۋ ساپاسىن جاقسارتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭىنىڭ جوباسى. زاڭ جوباسىن ءماجىلىس دەپۋتاتى ەلنۇر بەيسەمبايەۆ تانىستىردى. بىرنەشە سەنات دەپۋتاتىنىڭ باستاماسى بويىنشا ءماجىلىس قاراۋىنا ەنگىزىلگەن قۇجات قازاقستان رەسپۋبليكاسىنىڭ 75 زاڭنامالىق اكتىسىنە، ونىڭ ىشىندە 11 كودەكس پەن 64 زاڭعا وزگەرىستەر ەنگىزۋدى كوزدەيدى.

«زاڭ جوباسىندا مۇگەدەكتەرگە قاتىستى ديسكريميناتسياعا جول بەرمەۋ ماقساتىندا ءبىرقاتار نورما ەنگىزىلىپ وتىر. ونىڭ ىشىندە «مۇگەدەك»، «مۇگەدەك بالا»، «ۇلى وتان سوعىسىنىڭ مۇگەدەگى» دەگەن سوزدەر تيىسىنشە «مۇگەدەكتىگى بار ادام»، «مۇگەدەكتىگى بار بالا» جانە «وتان سوعىسى كەزىندە جارالانۋى، كونتۋزيا الۋى، زاقىمدانۋى جانە اۋرۋى سالدارىنان مۇگەدەكتىگى بار ادام» دەگەن سوزدەرمەن الماستىرىلادى. وڭالتۋ جانە وسى سالاداعى الدىن الۋ باعىتىنداعى جۇمىستاردى بىرىزدەندىرۋ ماقساتىندا «ابيليتاتسيا» تۇسىنىگى ەنگىزىلدى. ابيليتاتسيانىڭ ساپالى ۇيىمداستىرىلۋى مەديتسينالىق رەابيليتاتسياداعى ەم- دومنىڭ ساپاسىن ەداۋىر كوتەرەتىن الەۋمەتتىك- پسيحولوگيالىق، مەديتسينالىق كومەك دەپ ەسەپتەيمىز. اتالعان نورما ب ۇ ۇ- نىڭ كونۆەنتسياسىنا سايكەستەندىرىلدى»، - دەدى دەپۋتات.

ونىڭ ايتۋىنا قاراعاندا، اكىمدىكتەر مەن كەيبىر مينيسترلىكتەردىڭ جانىنان مۇگەدەكتىگى بار ادامدارمەن جۇمىس جۇرگىزۋگە جاۋاپتى شاتاتتان تىس كەڭەسشىلەردى تاعايىنداۋ ءتارتىبى بىرىزدەندىرىلمەك.

«زاڭ جوباسىندا تاكسوپاركتەردىڭ ءاربىر ون تاكسيدىڭ بىرەۋىن مۇگەدەكتىگى بار ادامدار ءۇشىن بەيىمدەلۋىن قامتاماسىز ەتۋى ءتيىس دەگەن تۇزەتۋلەر ەنگىزىلىپ وتىر. قازىرگى قولدانىستاعى زاڭناما بويىنشا تاكسوپاركتەر ءاربىر وتىزىنشى تاكسيگە وسىنداي نورما پايدالانادى. سونىمەن قاتار تۇراقتى مارشرۋتتار ءۇشىن مۇگەدەكتىگى بار ادامداردى تاسىمالداۋعا بەيىمدەلگەن اۆتوبۋستاردى ساتىپ الۋ بويىنشا وزگەرتۋلەر ەنگىزۋ جوسپاردا بار»، - دەدى ءماجىلىس وكىلى.

بۇعان دەيىن ق ر ەڭبەك جانە حالىقتى الەۋمەتتىك قورعاۋ مينيسترلىگى مۇگەدەكتىك بويىنشا جاردەماقى 30 مىڭ تەڭگەگە ۇلعايادى دەگەن اقپاراتتى تەرىسكە شىعارعان بولاتىن.

اۆتور: ەسىمجان ناقتىباي

سوڭعى جاڭالىقتار