قىتايدا قۇس تۇماۋىنىڭ ادامعا جۇققانى انىقتالدى

بۇل تۋرالى قىتاي حالىق رەسپۋبليكاسىنىڭ گيگيەنا جانە دەنساۋلىق ساقتاۋ مەملەكەتتىك كوميتەتىنىڭ مالىمدەمەسىندە ايتىلعان، دەپ حابارلايدى قازاقپارات ءتىلشىسى.
حابارلاماعا سايكەس، H3N8 قۇس تۇماۋىنىڭ شتامىن جۇقتىرۋ وقيعاسى ورتالىق حىنان پروۆينتسياسىنداعى چۋماديان قالاسىندا تۇراتىن ءتورت جاستاعى بالادا انىقتالدى. ونىڭ ءۇيىنىڭ اۋلاسىندا ءۇي قۇستارى بولعان، تۇرعىن ۇيلەردىڭ جانىندا جابايى ۇيرەكتەر مەكەندەگەن. ءساۋىردىڭ 5- كۇنى بالانىڭ دەنە قىزۋى كوتەرىلىپ، 10- ساۋىردە جاعدايىنىڭ ناشارلاۋىنا بايلانىستى جەرگىلىكتى مەديتسينالىق مەكەمەگە جاتقىزىلعان. 24- ساۋىردە قىتايدىڭ اۋرۋلاردى باقىلاۋ جانە الدىن الۋ ورتالىعى ناۋقاستىڭ قۇس تۇماۋىنىڭ H3N8 شتامىن جۇقتىرعانىن راستادى.
«قىتاي ەپيدەميولوگتارىنىڭ پىكىرىنشە، بۇل H3N8 قۇس تۇماۋىنىڭ ۆيرۋسى قۇستان ادامعا كەزدەيسوق تارالۋى بولىپ سانالادى جانە كەڭ اۋقىمدى ىندەت قاۋپى ازىرگە تومەن»، - دەلىنگەن قۇجاتتا.
H3N8 تۇماۋىنىڭ شتامى جىلقىلاردا، يتتەردە، قۇس ەتىندە جانە يتبالىقتاردا كەزدەسەدى. الايدا، بۇرىن ۆيرۋستىڭ وسى شتامىمەن ادام اۋرۋى تىركەلمەگەن. قىتاي ساراپشىلارى حالىققا اۋرۋ جانە ءولى قۇستارمەن سونداي- اق مۇمكىندىگىنشە ءتىرى قۇستارمەن دە تىكەلەي بايلانىستا بولماۋعا، تاماقتانۋ گيگيەناسىن ساقتاپ، شيكى جانە دايىن ونىمدەردى بولەك وڭدەۋگە كەڭەس بەرەدى.
اۆتور: سماعۇلوۆا ەركەجان