قازاقستاندا وتباسىنىڭ ءال-اۋقاتىن باعالاۋ ادىستەمەسى ازىرلەندى

ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆانىڭ ايتۋىنشا، ول سابينا الكيرە مەن دجەيمس فوستەر جاساعان كوپ ولشەمدى كەدەيلىكتى ولشەۋ ادىسىنە نەگىزدەلگەن.
بۇل ءادىس تۇرعىنداردىڭ قاي ساناتى قانداي پارامەترلەر بويىنشا كەدەيلەر توبىنا جاتاتىنىن انىقتاۋعا، سونداي-اق قوعامداعى كەدەيلىكتى كورسەتۋ ءۇشىن اقپاراتتى بىرىكتىرۋگە مۇمكىندىك بەرەدى.
«ۆەدومستۆو ازىرلەگەن ادىستەمە ءتورت باعىت بويىنشا وتباسىنىڭ ءال-اۋقاتىنىڭ دەڭگەيىن ايقىنداۋدى كوزدەيدى: الەۋمەتتىك-ەكونوميكالىق ءومىر ءسۇرۋ جاعدايلارى، دەنساۋلىق ساقتاۋ قىزمەتتەرىمەن قامتۋ جانە مۇگەدەكتىگى بار ادامداردىڭ بولۋى، ءبىلىم بەرۋ قىزمەتتەرىمەن قامتۋ جانە وتباسى مۇشەلەرىنىڭ ءبىلىم دەڭگەيى جانە وتباسىنىڭ جان باسىنا شاققانداعى ورتاشا تابىسى»، - دەپ ءتۇسىندىردى مينيستر.
وتباسىنىڭ ءال-اۋقاتىن باعالاۋ قورىتىندىلارى بويىنشا كەدەيلىكتىڭ ەڭ جوعارى دەڭگەيىندە تۇرعان وتباسىلارمەن مىناداي ءىس-شارالار جۇرگىزىلەدى:
1. الەۋمەتتىك قولداۋ شارالارىن كورسەتۋ ءۇشىن الەۋمەتتىك قىزمەتكەردىڭ، جەرگىلىكتى اتقارۋشى ورگان قىزمەتكەرىنىڭ بارۋى.
2. وتباسىنىڭ قاجەتتىلىگىن انىقتاۋ جانە مەملەكەتتىك قىزمەتتەر كورسەتۋ. مۇنىڭ ىشىنە، اتاۋلى الەۋمەتتىك كومەك، تۇرعىن ءۇي كومەگىن تاعايىنداۋ؛ جۇمىسقا ورنالاسۋعا جاردەمدەسۋ؛ بالالاردى مەكتەپتەرگە/بالاباقشالارعا ورنالاستىرۋ؛ مەديتسينالىق ۇيىمدارعا تىركەۋ؛ كومەكتىڭ باسقا تۇرلەرىن كورسەتۋ كىرەدى.
3. جوبالاردى ازىرلەۋگە، جاڭا داعدىلارعا ۇيرەتۋگە، ءوز ءىسىن قۇرۋعا كومەك كورسەتۋ.
«قازىرگى ۋاقىتتا ءبىز قيىن ومىرلىك جاعدايعا تاپ بولعان ازاماتتارعا الەۋمەتتىك قولداۋ شارالارىن كورسەتۋ ءۇشىن پايدالانىلاتىن وتباسىنىڭ تسيفرلىق كارتاسىن ازىرلەۋدى جۇزەگە اسىرۋدامىز.
وتباسىنىڭ تسيفرلىق كارتاسى ءتۇرلى دەرەكقورلارداعى بارلىق اقپاراتتى جيناقتاۋعا جانە تالداۋعا، ودان ءارى ونى جەدەل وزەكتەندىرۋگە جانە پرواكتيۆتى فورماتتا وتباسىنىڭ جاعدايىنىڭ ناشارلاۋىنا جول بەرمەۋ ءۇشىن قاجەتتى قولداۋ كورسەتۋگە مۇمكىندىك بەرەدى. قازىر ءبىز تەك وتباسىلار تۋرالى ايتىپ وتىرمىز، بولاشاقتا ءبىز 19 ميلليون ازاماتتىڭ ءارقايسىسىن قاراستىرامىز»، - دەدى تامارا دۇيسەنوۆا.