مەكتەپ تۇلەكتەرى «قازاقستان تاريحى» پانىنەن ەمتيحاندى اۋىزشا تاپسىرادى

بۇل تۋرالى ق ر ءبىلىم جانە عىلىمي ۆيتسە- ءمينيسترى شولپان كارينوۆا ءمالىم ەتتى، دەپ حابارلايدى قازاقپارات ءتىلشىسى.
«جىلداعى داستۇرگە سايكەس بيىل دا مەكتەپ تۇلەكتەرى 5 پاننەن ەمتيحان تاپسىرادى. ەمتيحان پاندەرى جانە تاپسىرمالاردىڭ مازمۇنىنا قاتىستى ەشقانداي وزگەرىس جوق. بارلىعى دا مەكتەپ باعدارلاماسى اياسىندا. بيىل مەكتەپ تۇلەكتەرى قازاقستان تاريحىنان ەمتيحاندى اۋىزشا تاپسىرادى. بۇل ماسەلە سوڭعى جىلدارى ءجيى تالقىلانىپ كەلەدى. تاريح ءپانى مۇعالىمدەرى ءۇشىن بۇل جاڭاشىلدىق ەمەس»، - دەدى شولپان كارينوۆا مينيسترلىكتە وتكەن تىكەلەي ەفير بارىسىندا.
ۆيتسە- ءمينيستردىڭ مالىمدەۋىنشە، قازاقستان تاريحى پانىنەن ەمتيحاندى اۋىزشا تاپسىرۋعا قاتىستى مينيسترلىككە بىرنەشە رەت ۇسىنىس كەلىپ تۇسكەن.
«ياعني ەمتيحاننىڭ فورماتى عانا وزگەرىپ وتىر. اۋىزشا، جازباشا، تەست بولسىن ەمتيحان تاپسىرمالارى وقۋ باعدارلاماسىنىڭ اياسىندا ازىرلەنەدى. سىرتتان، قوسىمشا تاپسىرما بولمايدى. ونىڭ ۇستىنە قازاقستان تاريحى پانىنەن ەمتيحاندى اۋىزشا، ياعني بيلەت ارقىلى تاپسىرۋ بۇعان دەيىن بار تاجىريبە»، - دەيدى ول. بۇعان دەيىن مينيستر ورىنباسارى «التىن بەلگى» ۇمىتكەرلەرى ەمتيحاندى جاڭا تالاپپەن تاپسىراتىنىن ايتتى .