يمپورتتىڭ ورنىن الماستىرۋ ءۇشىن شىعارىلاتىن ءونىم باسەكەگە قابىلەتتى بولۋى ءتيىس - ۇكىمەت باسشىسى

بۇل تۋرالى بۇگىن ۇكىمەت وتىرىسىندا ق ر پرەمەر-ءمينيسترى ءاليحان سمايىلوۆ ايتتى، دەپ حابارلايدى قازاقپارات ءتىلشىسى.
«يمپورتتىڭ ورنىن الماستىرۋ ءۇشىن شىعارىلاتىن ءونىم باسەكەگە قابىلەتتى جانە ساپاسى جوعارى بولۋى ءتيىس. سوندىقتان ورتالىق جانە وڭىرلىك دەڭگەيدەگى بارلىق مەملەكەتتىك ورگاندار جۇيەلى جانە ۇيلەسىمدى جۇمىس ىستەۋى قاجەت»، - دەدى ءاليحان سمايىلوۆ.
وسىعان وراي پرەمەر- مينيستر مەملەكەتتىك جانە جەرگىلىكتى اتقارۋشى ورگاندارعا ءبىرقاتار ناقتى تاپسىرما بەردى.
«ءبىرىنشى، ءوڭىر اكىمدىكتەرى يندۋستريا جانە ۇلتتىق ەكونوميكا مينيسترلىكتەرىمەن بىرلەسىپ، يمپورت الماستىرۋ جوبالارىن ىسكە اسىرۋ ءۇشىن قاجەتتى ينفراقۇرىلىمدى ۋاقىتىندا جۇرگىزىپ بەرۋدى قامتاماسىز ەتسىن. بارلىق جوبالار جوسپارلانعان مەرزىمگە ساي ىسكە قوسىلۋى ءتيىس. ەكىنشى، يندۋستريا مينيسترلىگى مۇددەلى مەملەكەتتىك ورگاندارمەن، «بايتەرەك» حولدينگىمەن بىرلەسىپ، جوبالاردى قارجىلاندىرۋ ماسەلەسىن پىسىقتاسىن»، - دەدى ۇكىمەت باسشىسى.
ءاليحان سمايىلوۆ ۇشىنشىدەن، ساۋدا مينيسترلىگىنە مۇددەلى مەملەكەتتىك ورگاندارمەن بىرلەسىپ، س ت- KZ سەرتيفيكاتتارىن الۋ تەتىگىن، ونىڭ ىشىندە ءتيىستى سەرتيفيكاتتاردى بەرۋ فۋنكتسياسىن ساۋدا مينيسترلىگىنە قايتارۋ ماسەلەسىن قاراۋدى تاپسىردى.
«ءتورتىنشى، ءبىلىم مينيسترلىگى ەڭبەك، يندۋستريا، ەنەرگەتيكا، اۋىل شارۋاشىلىعى، دەنساۋلىق ساقتاۋ، ۇلتتىق ەكونوميكا، قارجى مينيسترلىكتەرىمەن بىرگە وندىرىستەردى ۋاقىتىندا ىسكە قوسۋدى قامتاماسىز ەتۋ ءۇشىن بىلىكتى كادرلاردى دايىنداۋ ماسەلەسىن پىسىقتاسىن. بەسىنشى، يندۋستريا مينيسترلىگى ورتالىق جانە جەرگىلىكتى اتقارۋشى ورگاندارمەن بىرلەسىپ، ايتىلعان تاسىلدەردى ەسكەرە وتىرىپ، 16-مامىرعا دەيىن يمپورتتى الماستىرۋ جونىندەگى باعدارلامانىڭ جوباسىن پىسىقتاپ، ۇكىمەتكە ەنگىزسىن»، دەگەن ءاليحان سمايىلوۆ بۇل ماسەلەلەردى باقىلاۋدى ۇستاۋدى ورىنباسارى رومان سكليارعا جۇكتەدى.
اۆتور: مارلان جيەمباي