وسكەمەندىك وقۋشى كارتوپ ءوسىرۋ ءۇشىن ەكولوگيالىق تازا تىڭايتقىش جاساپ شىعاردى
وسكەمەن قالاسىندا وقۋشىلار اراسىندا عىلىم فەستيۆالى ءوتتى.
ءۇش كۇن بويى بالالار وزدەرىنىڭ عىلىمي جوبالارىن قورعادى. جوبالار تاقىرىبى ءار ءتۇرلى بولدى. وقۋشىلار تاريح، ءتىل، جاراتىلىستانۋ، ماتەماتيكا سياقتى باعىتتاردى زەردەلەگەن. اراسىندا بۇرىن-سوڭدى زەرتتەلمەگەن، تىڭ تاقىرىپتار دا بار.
ماسەلەن، 9- سىنىپ وقۋشىسى فارحات سولتانبەكوۆ «كۇنباعىس تۇقىمىنىڭ قاۋىزىنان فيتومەلانين پيگمەنتىن الۋ» تاقىرىبىندا تاجىريبە جۇرگىزىپ، وڭ ناتيجەگە قول جەتكىزگەن.
«وسى جوبامەن ءبىر جىل كولەمىندە اينالىسىپ كەلەمىن. تۇقىمنىڭ قابىعى ۋلترادىبىستىق ايماقتىڭ كومەگىمەن وزگەرتىلدى. پيگمەنتتى فەومەلانين الدىق، ەندى ونى كوسمەتولوگيا ماقساتىندا قولدانۋعا بولادى. ياعني، وسى ارقىلى ەمدىك جانە كوسمەتيكالىق كرەمدەر جاساۋعا مۇمكىندىك بار»، - دەدى جامبىل اتىنداعى دارىندى بالالارعا ارنالعان وبلىستىق مامانداندىرىلعان مەكتەپ-گيمنازيا-ينتەرناتىندا وقيتىن فارحات سولتانبەكوۆ.
تابيعاتتى، جانۋارلار مەن جاندىكتەردى زەرتتەۋ ءۇشىن دارىندى بالالارعا ارنالعان مامانداندىرىلعان ۆالەولوگيالىق مەكتەپ وقۋشىسى ۆيكتور فەدوروۆ «جانۋارلار الەمى» 3D كىتابىنىڭ موبيلدى قوسىمشاسىن ازىرلەدى.
كىتاپتىڭ سكرينشوتىنا موبيلدى قوسىمشانى اپارىپ جانۋارلار مەن جاندىكتەردى 3D فورماتتا كورۋگە بولادى.
ءدال وسى مەكتەپتىڭ تاعى ءبىر وقۋشىسى دەنيس لاگۋتين ءۇي جاعدايىندا كارتوپ ءوسىرۋ ءۇشىن ەكولوگيالىق تازا تىڭايتقىش جاساپ شىعارعان.
ول پياز، جۇمىرتقا، بانان، قىزىلشا تسيترۋس قابىقتارى مەن شاي جاپىراقتارىنان جاسالعان.
«الگوريتمى كەلەسىدەي: تىڭايتقىش ءۇشىن 20 جۇمىرتقا قابىعىن، 10 شاي جاپىراقتارىن، 10 قىزىلشا قابىعىن، 10 بادانانىڭ قابىعىن، 10 بانان مەن تسيترۋس قابىعىن، 10 اپەلسيندى جيناۋ قاجەت. سودان كەيىن قالدىقتاردى كەپتىرىپ، ۇساقتاپ، ارالاستىرۋ كەرەك. ناتيجەسىندە، ەكولوگيالىق تازا تىڭايتقىشى بار كارتوپتىڭ سالماعى 4 كەلى 405 گرامدى قۇرادى. ال حيميانى قولدانۋ ارقىلى سالماعى 1 كەلى بولدى. جاز بويى اتا-اجەمنىڭ ساياجايىندا وسى تىڭايتقىشپەن تاجىريبە جاساۋدى جالعاستىرامىن»، - دەيدى دەنيس.
