سايلاۋشىلار ۋادەسىن ورىنداماعان دەپۋتاتتى كەرى قايتارۋعا مۇمكىندىك الادى
«رەسپۋبليكا پرەزيدەنتى قاسىم- جومارت توقايەۆتىڭ بيىلعى قازاقستان حالقىنا جولداۋى ەلىمىزدە جۇرگىزىلىپ جاتقان دەموكراتيالىق پروتسەستەرگە تىڭ سەرپىن بەردى. وندا جاڭا قازاقستاننىڭ كەلبەتى، ونى قۇرۋ باعىتىندا تۇرعان مىندەتتەر جانە ول مىندەتتەردى شەشۋ جولدارى انىق كورسەتىلدى. ايتىلعان باستامالاردىڭ كوپشىلىگى اتا زاڭدا بەكىتىلگەن قوعام مەن مەملەكەتتىڭ نەگىزدەرىن قوزعايدى. وسى ماقساتتا قۇرىلعان جۇمىس توبى كونستيتۋتسياعا تۇزەتۋلەردىڭ جوباسىن ۇسىندى. جۇمىس توبىنا مەملەكەتتىك ورگاندارمەن قاتار ۇكىمەتتىك ەمەس ۇيىمداردىڭ وكىلدەرى جانە ەلىمىزدەگى تانىمال زاڭگەر- عالىمدار قاتىستى. زاڭ جوباسىندا قازىرگى تاڭدا ەلىمىزدە قالىپتاسقان سۋپەرپرەزيدەنتتىك باسقارۋ نىسانىن ودان ارى جەتىلدىرۋ كوزدەلگەن. بۇل ماقساتتى مەملەكەت باسشىسى ءوزىنىڭ ءبىرقاتار وكىلەتتىگىن باسقا ورگاندارعا بەرەدى نەمەسە ولارمەن كەلىسە وتىرىپ اتقارادى. بۇل سوڭعى جىلدارى ەلىمىزدە جۇرگىزىلىپ جاتقان ورتالىقسىزداندىرۋ پروتسەسىنىڭ جالعاسى»، - دەدى ول ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
سونىمەن قاتار، ول 2017 -جىلى ەلىمىزدە بولعان ءۇشىنشى كونستيتۋتسيالىق رەفورمانىڭ ناتيجەسىندە مەملەكەت باسشىسى ءوزىنىڭ ءبىرقاتار وكىلەتتىگىن پارلامەنت پەن ۇكىمەتكە بەرگەنىن ەسكە سالدى.
«پارلامەنت پەن جەرگىلىكتى وكىلدى ورگانداردىڭ ءرولىن كۇشەيتۋ كوزدەلگەن. پالاتالاردى جاساقتاۋ ءتارتىبى مەن ولاردىڭ فۋنكسيالارىندا دا دا ەلەۋلى وزگەرىستەر بار. پرەزيدەنتتىڭ سەناتتاعى كۆوتاسى 15-تەن 10-عا دەيىن قىسقارتىلىپ، ونىڭ 5-ەۋىن قازاقستان حالقى اسسامبلەياسى ۇسىناتىن بولادى. ءماجىلىس سايلاۋىندا ارالاس سايلاۋ جۇيەسى ەنگىزىلەدى. ءماجىلىستىڭ 30 پايىز دەپۋتاتتارى 1 مانداتتى اۋماقتىق سايلاۋ وكرۋگتەرى بويىنشا سايلانادى جانە سايلاۋالدى ۋادەسىن ورىنداماعان دەپۋتاتتى سايلاۋشىلار كەرى قايتارۋعا مۇمكىندىك الادى»، - دەدى باقىت نۇرمۇحانوۆ.
اۆتور: مارلان جيەمباي
