ايەلدەر كۇرەسىنەن ازيا چەمپيوناتىندا قازاقستاندىقتار ۇزدىك ۇشتىككە ەندى

نۇر-سۇلتان. قازاقپارات - موڭعوليا استاناسى ۇلان-باتىردا ءوتىپ جاتقان ازيا چەمپيوناتىندا قازاقستاننىڭ ۇلتتىق قۇراماسى ايەلدەر كۇرەسىنەن جالپى كوماندالىق ەسەپتە ۇزدىك ۇشتىككە ەندى، دەپ حابارلايدى قازاقپارات ءتىلشىسى.

قۇرلىقتىق دودادا قازاقستاندىق قىزدار ەكى التىن، ەكى قولا مەدال الدى. ەل قۇراماسىنان 68 كەلىدە مادينا باقبەرگەنوۆا فينالدا قىرعىزستاندىق مەەريم جۋمانازاروۆانى جەڭىپ، التىننان القا تاقتى.

ال 72 كەلىدە ءجاميلا باقبەرگەنوۆا فينالدا سۋميرە نييكۋرانى تىزە بۇكتىرىپ، جەڭىس تۇعىرىنا كوتەرىلدى. سونداي-اق قازاقستاندىق سپورتشىلاردان جۇلدىز ەشىموۆا (53 كەلى) جانە گۇلمارال ەركەبايەۆا (76 كەلى) قولا جۇلدەگە قول سوزدى.

جالپى كوماندالىق ەسەپتە جاپونيا (7 التىن، 2 كۇمىس) جانە موڭعوليا (4 كۇمىس، 5 قولا) قۇراماسى العاشقى ەكى ورىنعا جايعاستى.

كۇرەس تۇرلەرىنەن (گرەك- ريم، ايەلدەر كۇرەسى، ەركىن كۇرەس) قۇرلىقتىق دوداعا ازيانىڭ 19 ەلىنەن سپورتشىلار كەلدى.

ەسكە سالساق، قازاقستاندىقتار گرەك- ريم كۇرەسىنەن قورىتىندى ەسەپتە ءبىرىنشى ورىن العان ەدى. قۇرلىقتىق دودا 24-ساۋىردە مارەسىنە جەتەدى.