اقوردادا ورازا تۇتقان جاماعاتقا اۋىزاشار بەرىلدى

نۇر-سۇلتان. قازاقپارات - پرەزيدەنت رامازان ايىندا ارنايى داستارقان جايىپ، اۋىزاشار بەردى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.
None
None

قاسىم-جومارت توقايەۆ جينالعان قاۋىم الدىندا سويلەگەن سوزىندە بۇل يگى ءداستۇردىڭ حالىقتى بەرەكە-بىرلىككە شاقىراتىنىن اتاپ ءوتتى. مەملەكەت باسشىسى ادىلەتتى قوعام قۇرۋدىڭ ماڭىزدىلىعىنا توقتالدى.

- جاقىن ارادا كونستيتۋتسيامىزدى وزگەرتەتىن بولدىق. ءبىراق، ەڭ الدىمەن، جۇرتىمىزدىڭ سانا- سەزىمى جاڭعىرۋى قاجەت. بۇل - وڭاي شارۋا ەمەس. الدىمىزدا كوپتەگەن تۇيتكىلدەر بار، سوندىقتان ءبارىمىز جۇمىلا ەڭبەك ەتۋىمىز كەرەك. ەڭ باستىسى، نيەتىمىز تازا، پەيىلىمىز ءتۇزۋ بولۋعا ءتيىس. ءبىر-بىرىمىزگە جاناشىرلىق تانىتۋىمىز كەرەك. قازىر بۇكىل ادامزاتقا ءدال وسىنداي قاسيەتتەر جەتىسپەي جاتىر، - دەدى پرەزيدەنت. قاسىم-جومارت توقايەۆ جاستارعا دۇرىس باعىت- باعدار بەرىلۋى كەرەك ەكەنىن، ءبىلىمدى، كوزى اشىق، كوكىرەگى وياۋ، وتانشىل جاستار عانا كەلەشەكتىڭ يەسى بولاتىنىن ەرەكشە اتاپ ءوتتى.

پرەزيدەنتتىڭ پىكىرىنشە، جاستارىمىزدىڭ ۇلتتىق قۇندىلىقتاردى بويىنا ءسىڭىرىپ، قازىرگى زاماننىڭ عىلىم-ءبىلىمىن يگەرۋى ايرىقشا ماڭىزدى.

مەملەكەت باسشىسى يسلام ءدىنىنىڭ وركەنيەت قۇندىلىقتارىن، بەيبىتشىلىك ۇعىمدارىن ناسيحاتتايتىنىن اتاپ ءوتتى.

- جۇرتىمىز قاشاندا بەيبىت ءومىردى باعالاي بىلگەن. ءبىز وسى ۇستانىمنان اينىمايمىز. ول ءۇشىن ەلىمىزگە بەرەكە-بىرلىك، ءوزارا تۇسىنىستىك قاجەت. يسلام ادامداردى بولىنۋگە ەمەس، بىرلىككە شاقىرادى. يماندىلىق - ەڭ اسىل قاسيەت. سوندىقتان، ءداستۇرلى ءدىنىمىز ۇرپاق تاربيەسىنىڭ وزەگى بولۋى كەرەك. ۇرپاققا وسىنداي ونەگەلى تاربيە بەرۋ - ءبارىمىزدىڭ ورتاق مىندەتىمىز، - دەدى قاسىم-جومارت توقايەۆ.


پرەزيدەنت ەلىمىزگە تاتۋلىق پەن تىنىشتىق تىلەدى.

سوڭعى جاڭالىقتار