قازاقستان جاڭا ساياسي مادەنيەتتى ەنگىزۋدىڭ جاڭا مودەلىنە كوشەدى - ق ر پرەزيدەنتى

بۇل تۋرالى مەملەكەت باسشىسى قاسىم-جومارت توقايەۆ كونستيتۋتسياعا وزگەرىستەر مەن تولىقتىرۋلار ەنگىزۋ جونىندەگى كەڭەس وتىرىسىندا ايتتى، دەپ حابارلايدى قازاقپارات.
«شىن مانىندە، بۇل قازاقستاننىڭ بيلىك ينستيتۋتتارىن قالىپتاستىرۋدىڭ جانە ىقپالداستىقتىڭ، جاڭا ساياسي مادەنيەتتى ەنگىزۋدىڭ مۇلدە جاڭا مودەلىنە كوشكەنىن بىلدىرەدى. ناقتى ءارى تولىق تۇسىنىك بولۋ ءۇشىن وسى مودەل مەن ۇدەرىستى ەكىنشى رەسپۋبليكا رەتىندە بەلگىلەدىم. جاڭا پاراديگماعا سايكەس پرەزيدەنتتىڭ وكىلەتتىگى قىسقارادى، پارلامەنت پەن ءماسليحاتتاردىڭ ءرولى ايتارلىقتاي كۇشەيەدى. ازاماتتاردىڭ قاتىسۋى ەداۋىر ارتىپ، قۇقىق قورعاۋ سالاسى جۇيەلى تۇردە نىعايادى»، - دەدى قاسىم-جومارت توقايەۆ.
سونداي-اق پرەزيدەنت كونستيتۋتسياعا وزگەرىس جولداۋدا ايتىلعان ساياسي باستامالاردى جۇزەگە اسىرۋ ءۇشىن كەرەك ەكەنىن ايتتى.
«جۇمىس توبى قاجەتتى تۇزەتۋلەردى ازىرلەدى. بۇل ىسكە بەلگىلى زاڭگەر عالىمدار، ادام قۇقىقتارى جونىندەگى ۋاكىل، پارلامەنت جانە مەملەكەتتىك ورگانداردىڭ وكىلدەرى اتسالىستى. كونستيتۋتسيالىق سوتتا، كونستيتۋتسيالىق كەڭەستە جۇمىس ىستەگەن عالىمدارىمىز بار. اتا زاڭىمىزدىڭ جاڭا نورمالارىن ازىرلەگەندە ولاردىڭ مول تاجىريبەسى سەپتىگىن تيگىزگەنى انىق. اسىرەسە، كونستيتۋتسيالىق سوتتى قۇرۋ جانە ونىڭ جۇمىس ءتارتىبىن رەتتەۋ ماسەلەسى تۋرالى وي- تۇجىرىمدار پايدالى بولدى، - دەدى پرەزيدەنت.
جيىنعا پارلامەنت سەناتىنىڭ ءتوراعاسى ماۋلەن اشىمبايەۆ، پارلامەنت ءماجىلىسىنىڭ ءتوراعاسى ەرلان قوشانوۆ، مەملەكەتتىك حاتشى ەرلان قارين، پرەزيدەنت اكىمشىلىگىنىڭ باسشىسى مۇرات نۇرتىلەۋ، ادىلەت ءمينيسترى قانات مۋسين جانە جۇمىس توبىنىڭ مۇشەلەرى قاتىستى.