ەلوردادا كولىگىن جول بويىندا قالدىراتىن جۇرگىزۋشىلەرگە ايىپپۇل سالىنا باستايدى

ايىپپۇل سالۋ قالا كوشەلەرىن ارالاپ جۇرەتىن 2 كولىكتىڭ ىشىنە ورناتىلعان ارناۋلى اپپارات ارقىلى جۇزەگە اسىرىلادى، دەپ حابارلايدى قازاقپارات ءتىلشىسى.
«بۇگىننەن باستاپ ەلوردا اۋماعىندا سەرتيفيكاتى بار «دوزور م» اۆتوماتتاندىرىلعان اپپارات جۇيەسى ەنگىزىلەدى. بۇل اپپاراتتىڭ كومەگىمەن جول بويىندا ەكىنشى قاتاردا تۇرعان كولىكتەرگە جول بەلگىلەرىن بۇزعانى ءۇشىن اكىمشىلىك قۇقىق بۇزۋشىلىق تۋرالى ۇيعارىم راسىمدەلەدى ماسەلەن، كەيبىر جۇرگىزۋشىلەر تۇركىستان كوشەسى بويى جولىندا ەكىنشى قاتارعا كولىكتەرىن قويادى. نەمەسە كولىك قويۋعا بولمايتىن بەلگى تۇرعانىنا قاراماستان جۇرگىزۋشىلەر كولىكتەرىن قالدىرىپ كەتەدى. وسىلايشا باسقا كولىكتەردىڭ قوزعالىسىنا كەدەرگى كەلتىرەدى. ايالدامالارعا توقتايتىن كولىك يەلەرىنە دە ايىپپۇل جازىلادى»، - دەدى نۇر- سۇلتان قالالىق پوليتسيا دەپارتامەنتى اكىمشىلىك پوليتسيا باسقارماسىنىڭ ءبولىم باستىعى باۋىرجان توعجۇمانوۆ.
ونىڭ اتاپ وتۋىنشە، جاياۋ جۇرگىشىلەرگە ارنالعان جولاققا دا كولىگىن قويعان جۇرگىزۋشىلەرگە دە ايىپپۇل سالىناتىن بولادى. ايىپپۇل كولەمى 10 ايلىق ەسەپتىك كورسەتكىشتى قۇرايدى.
«ازىرشە، قالا كوشەلەرىندە مۇنداي اپپاراتپەن جابدىقتالعان 2 كولىك قاتىنايدى. الداعى ۋاقىتتا ولاردىڭ سانى ۇلعايتىلاتىن بولادى. وسى رەتتە ايتا كەتەرلىگى، ايىپپۇلدان تۇسكەن قاراجاتتىڭ بارلىعى قالا بيۋدجەتىنە تۇسەدى»، - دەدى پوليتسيا پودپولكوۆينگى.
اۆتور: مارلان جيەمباي