پرەمەر-مينيسترگە ب ق و- داعى كۇرە جولدار پروبلەماسىن شەشۋ تاپسىرىلدى

نۇر-سۇلتان. قازاقپارات - پرەزيدەنت ۇزاق جىلدار بويى شەشىلمەي كەلە جاتقان باتىس قازاقستان وبلىسىنداعى كۇرە جولدار پروبلەماسى بويىنشا ۇكىمەتكە جانە ايماق باسشىسىنا تاپسىرمالار جۇكتەدى، دەپ حابارلايدى قازاقپارات مەملەكەت باسشىسىنىڭ باسپا ءسوز قىزمەتىنە سىلتەمە جاساپ.
None
None

«بۇگىن مەملەكەت باسشىسى قاسىم- جومارت توقايەۆ «Egemen Qazaqstan» گازەتىندە جاريالانعان «كۇرە جولداعى كۇرسىنىس» اتتى ماقالاعا نازار اۋداردى.

باسىلىم باتىس قازاقستان وبلىسىنداعى كۇرە جولدار جاعدايىنىڭ ناشارلىعىنا بايلانىستى ماسەلە كوتەرگەن. پرەزيدەنت بۇل ءوڭىردىڭ كولىك-لوگيستيكالىق الەۋەتىن جاڭعىرتۋ ماڭىزدى مىندەتتىڭ ءبىرى ەكەنىن جانە اۆتوجولداردىڭ 70 پايىزىنىڭ ساپاسى سىن كوتەرمەيتىنىن 2019-جىلى ايتقان بولاتىن. مەملەكەت باسشىسى ورالدا وتكەن كەزدەسۋدە «بۇل ازاماتتاردىڭ كۇندەلىكتى ومىرىندە قيىندىق تۋعىزىپ قانا قويمايدى، سونداي-اق ءوڭىردىڭ ەكسپورتتىق جانە ترانزيتتىك الەۋەتىن تومەندەتەدى» دەگەن ەدى.

پرەزيدەنت سول كەزدە ۇكىمەتكە اكىمدىكپەن بىرلەسىپ، قازتالوۆ، جانىبەك جانە بوكەي ورداسى اۋداندارىنداعى جولداردى جوندەۋ جۇمىستارىن 2021-جىلدىڭ سوڭىنا دەيىن اياقتاۋعا تاپسىرما بەردى جانە بۇل ماسەلە ءوزىنىڭ جەكە باقىلاۋىندا بولاتىنىن ەرەكشە اتاپ ءوتتى.

الايدا، «Egemen Qazaqstan» گازەتىندەگى مالىمەتتەر بويىنشا وسى اۋدانداردى وبلىس ورتالىعىمەن بايلانىستىراتىن جولدارعا ءالى كۇنگە دەيىن اسفالت توسەلمەگەن.

قۇرىلىس جۇمىستارى بەكىتىلگەن كەستەدەن ايتارلىقتاي قالىپ كەلەدى جانە قارجى ماسەلەسىندە دە تۇيتكىلدەر بار. جەرگىلىكتى تۇرعىندار جولدىڭ جوقتىعىنان زارداپ شەگىپ وتىر، اسىرەسە كوكتەم مەن كۇزدە جاعداي مۇلدە ۋشىعا تۇسەدى» دەلىنگەن حابارلامادا.

مەملەكەت باسشىسى ۇكىمەت پەن وبلىس اكىمدىگىنە بارلىق قاجەتتى شارانى تەز ارادا قابىلداۋدى تاپسىردى. ءتيىستى جۇمىستاردىڭ بەلگىلەنگەن مەرزىمدە ورىندالماۋىنا كىنالىلەر جازالانۋعا ءتيىس.

پرەزيدەنت بۇل ماسەلەنى شەشۋدى پرەمەر-مينيستر ءاليحان سمايىلوۆقا جۇكتەدى.

ايتا كەتسەك، بۇگىن پرەزيدەنت مەملەكەتتىك كۇزەت قىزمەتىنىڭ 30 جىلدىعىنا ارنالعان ءىس- شاراعا قاتىستى. سونداي-اق، Amanat پارتياسىن جاڭعىرتۋ جۇمىستارىن جانداندىرۋدى تاپسىردى.

سوڭعى جاڭالىقتار