شايدىڭ پايداسىن سەزىنۋ ءۇشىن دۇرىس ىشە ءبىلىڭىز

شاي ءىشۋ ادەتىمىزگە اينالدى. ونىڭ پسيحولوگيالىق جاي- كۇيدى جاقسارتۋدان بولەك، دەنساۋلىققا تيگىزەر جاقسى پايداسى دا بار. ماسەلەن، شايدىڭ قۇرامىنداعى ەفير مايى، الكالويد، اقۋىز بەن دارۋمەندەر، ءدۋبيلدى زاتتار بولادى.
ەندەشە وسى پايداسىن تولىق ءسىڭدىرىپ ءىشۋ ءۇشىن نە ىستەۋىمىز كەرە، سوعان توقتالايىق.
شايدى دەمدەپ ءىشىڭىز
شايدى قايناعان سۋعا سالعاننان كەيىن ءبىرشاما بۇعىپ، دەمدەلىپ تۇرعانى ءجون. ماسەلەن، قارا شايدى 10 مينۋتتاي بۇقتىرىپ قويىپ، سوسىن ىشسەڭىز پايدالىراق بولماق. وسى ۋاقىتتا شايدىڭ قۇرامىنداعى زاتتار سۋعا ەرىپ، تولىق شىعىپ ۇلگەرمەك.
ءبىراق دەمدەۋ كەرەك ەكەن دەپ، ۇزاق قويىپ قويعان دا ءجون ەمەس. ال سۋىپ ءارى ءبىراز تۇرىپ قالعان شايدى قايتا قايناتىپ ءىشۋ دۇرىس ەمەس. ونداي شايدىڭ قۇرامىندا زياندى زاتتار كوبەيىپ كەتەدى.
شامالى سۋىتىپ ءىشىڭىز
مامانداردىڭ ايتۋىنشا، قايناعان شايدى وتە ىستىقتاي ىشۋگە بولمايدى. ىستىق شاي كەڭىردەك پەن اسقازاندى كۇيدىرىپ، ارتى قاتەرلى ىسىككە اكەلۋى مۇمكىن. ماسەلەن، تەگەران مەديتسينا ۋنيۆەرسيتەتى عالىمدارىنىڭ زەرتتەۋىنشە، ىستىق شاي اۋىز بەن تاماقتى، وڭەش پەن اسقازاندى كۇيدىرىپ وتەدى دە، سودان ازداعان جاراقات پايدا بولىپ، جاسۋشانىڭ دنك قۇرىلىمى وزگەرىپ كەتەدى ەكەن. قاتەرلى ىسىك سودان پايدا بولادى.
سوندىقتان شايدى 60 گرادۋسقا دەيىن سۋىتىپ نە ىسىتىپ بارىپ ءىشۋ كەرەك. ياعني، قايناعان شايدى 4 مينۋتتاي جەرگە قويىپ قويىڭىز. سول ۋاقىتتا سۋىپ ۇلگەرەدى.
ال قىتاي عالىمدارىنىڭ ايتۋىنشا، ىستىق شاي مەن شىلىم - الەمدەگى ەڭ زياندى، اۋرۋشا شالدىقتىرۋدان «دەس بەرمەيتىن» قاتەرلى ادەت ەكەن.
كۇنىنە 2-3 كەسە جەتكىلىكتى
شايدى ءوز مولشەرىندە ىشكەن ابزال. كوپ ىشپەگەن دە جاقسى. ماسەلەن، ەۋروپا عالىمدارىنىڭ ايتۋىنشا، ادامعا كۇندەلىكتى 2-3 شاي ىشسە جەتكىلىكتى. وسىنىڭ ءوزى ۇزاق ءومىر سۇرۋگە جەتەرلىك.
«شايدىڭ ءتۇرى كوپ. ولاردىڭ پايداسى دا ءارتۇرلى. شايدىڭ ىشىندە كوك شايدىڭ ماڭىزى ەرەكشە. پايدالى زاتتارعا باي. قانداعى حولەستەريندى ازايتۋعا، جۇرەك جۇمىسىن جاقسارتۋعا كومەگى كوبىرەك»، - دەيدى بريتان عالىمدارى.
ەتتەن كەيىن شاي ىشپەڭىز
مۇنى قازاق عالىمدارى ايتىپ ءجۇر. ەت جەگەن سوڭ، شاي ىشۋگە بولمايدى دەيدى. ويتكەنى شايدىڭ قۇرامىنداعى تانين اتتى زات ەتتىڭ قۇرامىنداعى ەڭ پايدالى تەمىر ەلەمەنتىن اسقازانعا تۇسكەن كەزدە «ەرىتىپ جىبەرەتىن» كورىنەدى. سودان ەتتىڭ تۇك پايداسى بولماي قالادى.
«حالقىمىز بۇرىندا ەتتەن كەيىن قىمىز ىشكەن. ال قىمىز - تاعامدى قورىتاتىن ناعىز كاتاليزاتور. كۇردەلى تاعامدى تەز ىدىراتادى. ال قازىر ءبىز شاي ىشەتىن بولدىق. ەتتەن كەيىن بىردەن شاي ىشۋگە بولمايدى. ويتكەنى شاي قۇرامىنداعى كوفەين مەن تانين ەتتىڭ ەڭ پايدالى ەلەمەنتى - تەمىردى ىدىراتىپ جىبەرەدى. شاي ىشپەۋ كەرەك دەپ ايتپايمىن. ءىشۋ كەرەك. ءبىراق ەت جەگەن سوڭ، 40 مينۋت نە 1 ساعاتتان كەيىن ىشكەن ءجون. وعان دەيىن تاعام ءسىڭىپ ۇلگەرەدى»، - دەپ تۇسىندىرەدى تاعامتانۋشى مايگۇل قايناربايەۆا.
massaget.kz