بيىل بيۋدجەتتىڭ كىرىسى ارتادى - تيمۋر جاقسىلىقوۆ

بۇل تۋرالى ءماجىلىستىڭ جالپى وتىرىسىندا رەسپۋبليكالىق بيۋدجەتتى تالقىلاۋ كەزىندە ۇلتتىق ەكونوميكا ءمينيسترىنىڭ مىندەتىن اتقارۋشى تيمۋر جاقسىلىقوۆ ءمالىم ەتتى، دەپ حابارلايدى قازاقپارات ءتىلشىسى.
«تۇزەتىلگەن ماكروەكونوميكالىق بولجامنىڭ نەگىزىندە بيۋدجەت كىرىستەرى بويىنشا بولجام ناقتىلاندى. رەسپۋبليكالىق بيۋدجەتتىڭ كىرىسى 2022 -جىلى 10,2 تريلليون تەڭگە كولەمىندە باعالانادى، بۇل بەكىتىلگەن جوسپاردان 955 ميلليارد تەڭگەگە جوعارى. كىرىستەر بويىنشا نەگىزگى ءوسىم مۇنايعا بولجامدى باعانىڭ ۇلعايۋى جانە ا ق ش دوللارىنا تەڭگە باعامىنىڭ وزگەرۋى اياسىندا باج مولشەرلەمەسىنىڭ ارتۋى ەسەبىنەن مۇنايعا ەكسپورتتىق كەدەندىك باج تۇرعىسىندا، سونداي- اق ماكروەكونوميكالىق كورسەتكىشتەردىڭ ءوسۋى ەسەبىنەن كورپوراتيۆتىك تابىس سالىعى بويىنشا كۇتىلۋدە»، - ت. جاقسىلىقوۆ.
ونىڭ ايتۋىنشا، ۇلتتىق قوردان كەپىلدەندىرىلگەن ترانسفەرتتىڭ مولشەرى 4 تريلليون 030 ميلليارد تەڭگەگە دەيىن نەمەسە 1 تريلليون 630 ميلليارد تەڭگەگە ۇلعايتىلادى.
«قاراجات مەملەكەت باسشىسى قويعان مىندەتتەردى ىسكە اسىرۋعا باعىتتالاتىن بولادى. 2022 -جىلى بيۋدجەت تاپشىلىعىن 2 تريلليون 978 ميلليارد تەڭگە نەمەسە جالپى ىشكى ونىمگە قاتىستى % 3,3 دەڭگەيىندە ايقىنداۋ ۇسىنىلادى. 2022 -جىلى مۇناي ەمەس تاپشىلىقتىڭ دەڭگەيى باعالاۋ بويىنشا جالپى ىشكى ونىمگە قاتىستى % 10,2 قۇرايدى. رەسپۋبليكالىق بيۋدجەتتىڭ شىعىستارىن تۇزەتىلگەن كولەمگە قاتىستى 2,7 تريلليون تەڭگەگە ۇلعايتا وتىرىپ، 18,8 تريلليون تەڭگە كولەمىندە ايقىنداۋ ۇسىنىلادى»، - دەدى ول.
«قورىتىندىلاي كەلە، 2022-2026 -جىلدارعا ارنالعان الەۋمەتتىك- ەكونوميكالىق دامۋ بولجامى شەڭبەرىندە 2022 -جىلعا ارنالعان ماكروكورسەتكىشتەر مەن بيۋدجەتتىك پارامەترلەردىڭ بولجامىن ناقتىلاۋ، ءبىرىنشى كەزەكتە مەملەكەت باسشىسىنىڭ تاپسىرمالارى مەن قابىلدانىپ جاتقان شۇعىل جانە جۇيەلىك سيپاتتاعى قۇجاتتاردىڭ نەگىزگى باعىتتارىن ىسكە اسىرۋعا باعىتتالعان»، - دەدى تيمۋر جاقسىلىقوۆ.
بۇدان بۇرىن حابارلانعانداي، 2022 -جىلعا ارنالعان ماكروەكونوميكالىق كورسەتكىشتەر مەن بيۋدجەتتىك پارامەترلەر بولجامىن ناقتىلاۋ ەنگىزىلىپ وتىر.
اۆتور: رۋسلان عابباسوۆ