الماتىدا دىنمۇحامەد قونايەۆتىڭ مۇراجاي-ءۇيى اشىلدى

شاراعا قالا اكىىم ەربولات دوسايەۆ قاتىستى، دەپ حابارلايدى قازاقپارات.
ماماندار كورنەكتى مەملەكەت قايراتكەرىنىڭ 110 جىلدىعىن مەرەكەلەۋ اياسىندا مۇراجايدا قالپىنا كەلتىرۋ جۇمىستارىن جۇرگىزدى.
اشىلۋ سالتاناتىنا د. ا. قونايەۆتىڭ حالىقارالىق قوعامدىق قورىنىڭ ءتوراعاسى ەلدار قونايەۆ، د. ا. قونايەۆتىڭ جيەنى ديار قونايەۆ، ونىڭ جەكە دارىگەرى احات مۋليۋكوۆ، دوسى ءارى سەرىكتەسى الەكساندر گويكولوۆ قاتىستى.
رەستاۆراتسيا جانە ەكسپوزيتسيا پروتسەسىنە مۇراجاي جانە مۇراعات ءىسى سالاسىنداعى جەتەكشى ماماندار، ديزاينەرلەر، مۇسىنشىلەر، سۋرەتشىلەر، بەينەينجەنەرلەر جانە ت. ب. تارتىلدى.
جۇمىس بارىسىندا د. ا. قونايەۆتىڭ حالىقارالىق قورىمەن كەلىسىلگەن تۇجىرىمداما مەن جوبانىڭ ەسكيزى ازىرلەندى.
رەكسپوزيتسيا تاقىرىبىنىڭ نەگىزىنە ساياساتكەردىڭ ەل ومىرىندەگى ماڭىزدى تاريحي وقيعالارعا دەگەن جەكە كوزقاراسىن سۋرەتتەيتىن د. قونايەۆتىڭ «ستاليننەن گورباچيەۆكە دەيىن» اۆتوبيوگرافيالىق كىتابى ارقاۋ بولدى.
حرونولوگيالىق تارتىپتە ورنالاستىرىلعان مۇراعاتتىق قۇجاتتار، فوتوسۋرەتتەر مەن ەكسپوناتتار دىنمۇحاممەد قونايەۆتىڭ كورنەكتى قوعامدىق-ساياسي قايراتكەر رەتىندەگى الىپ تۇلعاسىن كورسەتەدى.
جۇمىس بارىسىندا بارلىق ەكسپوناتتار، سونىڭ ىشىندە دىنمۇحامەد قونايەۆتىڭ جەكە زاتتارى بۇرىنعى قالپىندا ساقتالدى. قالپىنا كەلتىرۋ جۇمىستارى بارىسىندا مۇراجاي زاماناۋي ساندىق جانە مۋلتيمەديالىق تەحنولوگيالارمەن جابدىقتالدى، كەلۋشىلەر ەندى اۋديو نۇسقاۋلىقتاردى قولدانا الادى.
ەرەكشە قاجەتتىلىكتەرى بار ادامدارعا ىڭعايلى بولۋ ءۇشىن ەكىنشى قاباتقا ليفت ورناتىلدى.
ەسكە سالساق، مۇراجاي 2002-جىلى د. قونايەۆتىڭ 90 جىلدىعىنا وراي اشىلعان بولاتىن. ەكسپوزيتسيالار 10 جىل بۇرىن سوڭعى رەت جاڭارىپ، 2011-جىلى جاسالعان ەدى. مۇراجايدىڭ جالپى ساقتاۋ قورىندا 8196 ەكسپونات بار. سونداي-اق، الماتىدا قازاق ادەبيەتىنىڭ كلاسسيگى عابيت مۇسىرەپوۆتىڭ مۇراجاي-ءۇيى كۇردەلى جوندەۋدەن ءوتتى.
رەكسپوزيتسيا جازۋشىنىڭ 120 جىلدىعى قارساڭىندا ىسكە استى. كۇردەلى جوندەۋدەن، مودەرنيزاتسيادان جانە رەەكسپوزيتسيادان كەيىن عابيت مۇسىرەپوۆ مۇراجايى ەلىمىزدەگى العاشقى زاماناۋي مۋلتيمەديالىق ادەبي ورتالىققا اينالادى.
رەكونسترۋكتسيا جانە رەكسپوزيتسيا بويىنشا جۇرگىزىلگەن كەشەندى جۇمىس جىل سايىن مۇراجايعا كەلۋشىلەر سانىن ەكى ەسەگە - 22 مىڭ ادامعا دەيىن ارتتىرۋعا مۇمكىندىك بەرەدى دەپ جوسپارلانۋدا.
مۇراجايدى جاڭارتۋ جۇمىستارىنا مۋزەي جانە ارحيۆ ءىسى سالاسىنداعى جەتەكشى ماماندار، ديزاينەرلەر، سۋرەتشىلەر، بەينەينجەنەرلەر جانە ت. ب. تارتىلدى.
جوندەۋ بارىسىندا مۇراجاي زاماناۋي قۇرال-جابدىقتارمەن، ونىڭ ىشىندە اقپاراتتىق ستەندتەرمەن، مۋلتيمەديالىق جۇيەمەن، كونتەنتتى سەنسورلىق باسقارۋى بار پروەكتسيامەن، مۋلتيمەديالىق تاچ- پانەلدەرمەن جانە ت. ب. جابدىقتالدى.
بۇلاردا قۇندى ادەبي دەرەكتەر، مۇراعاتتىق ماتەريالدار، ونىڭ ىشىندە «بەسەۋدىڭ حاتى»، قولجازبالار، فوتوسۋرەتتەر جانە ت. ب. كورسەتىلەدى.
رەكسپوزيتسيا ناتيجەسىندە ادەبي زال قايتا جاساقتالدى. ستەندتەردە جازۋشىنىڭ وتباسى، بالالىق شاعى، ءبىلىمى، ادەبي جولدىڭ باستالۋى جانە ت. ب. تۋرالى مالىمەتتەر كەلتىرىلگەن ءومىرى مەن شىعارماشىلىق جولى ۇسىنىلعان.
مۇراجايدا سونداي-اق عابيت مۇسىرەپوۆ جازعان، ونىڭ ىشىندە «امانگەلدى»، «قىز جىبەك»، «ءبىر رەت جانە ءومىر بويى»، «قاۋىن» فيلمدەرىن كورسەتۋ ءۇشىن ارنايى كينوزال اشىلدى.
ەسكە سالساق، عابيت مۇسىرەپوۆتىڭ سوڭعى 18 جىل تۇرعان پاتەرى 1991-جىلى ق ر ورتالىق مەملەكەتتىك مۋزەيىنىڭ ءبىر بولىگى رەتىندە مۇراجايعا اينالعان.
1999-جىلدان باستاپ نىسان س. مۇقانوۆ پەن ع. مۇسىرەپوۆتىڭ مەملەكەتتىك ادەبي-مەموريالدىق مۇراجاي كەشەنى بولىپ قايتا قۇرىلدى.
2015-جىلدان باستاپ مۇراجاي «الماتى قالاسى مۋزەيلەر بىرلەستىگى» ك م ق ك قۇرامىندا. ع. مۇسىرەپوۆ مۇرجاي-ءۇيىنىڭ الاڭى 114,6 شارشى مەتردى قۇرايدى.
2 مەموريالدىق بولمە، 1 ادەبي زال بار. مەموريالدىق بولمەدەگى زاتتار (جازۋ ۇستەلى، كىتاپحانا، جەكە تۇتىنۋ زاتتارى، سىيلىق زاتتارى جانە ت. ب.) بۇرىنعى كۇيىندە ساقتالعان.