پروكۋرور الماتىلىق اتقىشتى ءومىر بويىنا باس بوستاندىعىنان ايىرۋدى سۇرادى
پروكۋرورلار دۋجنوۆتىڭ بەس ادامدى ءولتىرۋ كىناسى تولىق دالەلدەنگەنىن اتاپ ءوتتى. مەملەكەتتىك ايىپتاۋشىلار سوتتالۋشىنىڭ ۋكرايناداعى قارۋلى قاقتىعىسقا قاتىسقانى دا دالەلدەنگەنىن ايتتى.
«جوعارىدا ايتىلعانداردىڭ نەگىزىندە مەن يگور دۋجنوۆتى كىنالى دەپ تانىپ، ءومىر بويىنا باس بوستاندىعىنان ايىرۋدى سۇرايمىن»، - دەدى پروكۋرور.
قازا تاپقانداردىڭ تۋىستارى مەملەكەتتىك ايىپتاۋشىنى قولدادى. ولار سوتتان ءومىر بويىنا باس بوستاندىعىنان ايىرۋمەن قاتار دۋجنوۆتى جازاسىن وتەۋ كەزىندە تۋىستارىمەن كەزدەسۋدەن ايىرۋدى سۇرادى.
ەسكە سالايىق، بىلتىر 20-قىركۇيەك كۇنى الماتىدا جەكە ۇيلەردىڭ بىرىنە كەلگەن سوت ورىنداۋشىعا، ۋچاسكەلىك پوليتسيا ينسپەكتورلارىنا ءۇي يەسى - 1967 -جىلى تۋعان ازامات وق اتتى. قىزمەت بارىسىندا بەس ادام، ونىڭ ىشىندە ەكى پوليتسيا قىزمەتكەرى وقتان جاراقات الىپ، كوز جۇمدى. قازا تاپقان پوليتسەيلەردىڭ ءبىرىنىڭ ارتىندا – 5، ەكىنشىسىندە 2 بالا قالدى.
كەيىنىرەك جەكە سوت ورىنداۋشىلارىنىڭ پالاتاسى وقيعاعا قاتىستى تۇسىنىكتەمە بەردى.
«بانك سەنتركرەديت» ا ق ءىس بويىنشا قاجەتتى بارلىق قۇجات ۇسىنىلاتىنىن جانە زارداپ شەككەندەردىڭ تۋىستارىنا جان-جاقتى كومەك كورسەتىلەتىنىن جەتكىزدى.
