13:09, 19 - ءساۋىر 2022 | GMT +5
ۇ ق ك تىڭشىلىق، مەملەكەتكە وپاسىزدىق جاسادى دەگەن كۇدىكپەن ءبىر توپ ادامدى ۇستادى
نۇر-سۇلتان. قازاقپارات - ۇلتتىق قاۋىپسىزدىك كوميتەتى تىڭشىلىق، مەملەكەتكە وپاسىزدىق جاساۋ، مەملەكەتتىك قۇپيالاردى زاڭسىز جيناۋ جانە جاريا ەتۋ كۇدىگىمەن ادامدار توبىن، ونىڭ ىشىندە شەتەل مەملەكەتىنىڭ ازاماتىن ۇستادى.

بۇل تۋرالى قازاقپارات كوميتەتكە سىلتەمە جاساپ حابارلايدى.
«ق ر ق ك 175-بابى 1-بولىگى (مەملەكەتكە وپاسىزدىق جاساۋ)، 176-بابى (تىڭشىلىق) جانە 185-بابى 3-بولىگى (مەملەكەتتىك قۇپيالاردى زاڭسىز جيناۋ جانە جاريا ەتۋ) بويىنشا قىلمىستىق ىستەر قوزعالدى. تەرگەۋ سوتى وسى ادامدار توبىنا قاتىستى قاماۋدا ۇستاۋ تۇرىندەگى بۇلتارتپاۋ شاراسىن تاڭدادى. قىلمىستىق ىستەردىڭ «قۇپيا» بەلگىسى بار، وسىعان بايلانىستى تەرگەۋ مۇددەسىندە وزگە اقپارات جاريا ەتىلمەيدى»، - دەلىنگەن حابارلامادا.
ەسكە سالساق، 25-ناۋرىزدا ەلوردادا ق ر پرەزيدەنتىنە جانە ءبىرقاتار جوعارى لاۋازىمدى مەملەكەتتىك قىزمەتكەرلەرگە قاستاندىق جاساۋدى جوسپارلاعان شەتەل بارلاۋ اگەنتى «ا» دەگەن قازاقستان ازاماتى ۇستالعان ەدى.