قاماۋدا قالعان شاڭحاي

مۇنداي كورسەتكىش ءتىپتى 2020 -جىلى ۋحاندا بولعان ەمەس. 25 ميلليون حالقى بار شاڭحاي لوكداۋنعا ۇشىرادى. قاتاڭ شەكتەۋدىڭ سالدارىنان زارداپ شەككەندەر بار. لوكداۋننىڭ كەسىرى قىتايدىڭ عانا ەمەس، كۇللى الەم ەكونوميكاسىنا ءتيىپ جاتىر.
وسى اپتادا الەۋمەتتىك جەلىدە شاڭحاي تۇرعىندارى مەن پوليتسەيلەردىڭ قاقتىعىسى بەينەلەنگەن جازبا تارادى. ءمالىم بولعانداي، عيماراتىن كارانتين بەكەتىنە اينالدىرۋ ءۇشىن بىرنەشە وتباسىنى باسقا جەرگە كوشىرمەك بولعان. الايدا كەي تۇرعىن بۇعان كەلىسە قويمادى. ناۋقاستاردى قابىلداۋعا اۋرۋحانالارداعى توسەك سانى 270 مىڭعا ۇلعايتىلدى. ال ۆيرۋستى جۇقتىرعانداردىڭ سانى 300 مىڭنان اسقان. ولارمەن بايلانىستا بولعانداردى وقشاۋلاۋعا تاعى ورىن كەرەك. ناۋرىزدىڭ 28-كۇنى 10 كۇنگە جاريالانعان لوكداۋن بەلگىسىز مەرزىمگە تاعى سوزىلدى.
ايدەر يزمايلوۆ، شانحاي تۇرعىنى:
- ءبىزدى قاشان بوساتاتىنىن ناقتى ەشكىم بىلمەيدى. بەيرەسمي مالىمەت قانا بار. ونىڭ وزىندە بىرەۋلەر شەكتەۋ 18- مامىردا، ەندى بىرەۋلەر 1- مامىردا الىنادى دەيدى. كۇن سايىن تەست تاپسىرامىز. ءوز- ءوزىمىزدى تەكسەرۋ ءۇشىن بىزگە مىناداي تەست- پاكەت بەرەدى. ءار بەس كۇن سايىن تومەنگە ءتۇسىپ، كەزەككە تۇرامىز. ءسويتىپ تەست تاپسىرامىز. ادامدار قاجىدى. گۋمانيتاردىق داعدارىس باستالدى. ازىق- تۇلىك جەتپەيدى، ءبارى قىمباتتادى.
لوكداۋننىڭ سالدارىنان شاڭحايدا مۇزداتقىش پەن توڭازىتقىشتىڭ باعاسى 2,5 ەسەگە قىمباتتادى. ويتكەنى تۇرعىندار ازىقتى مولداۋ عىپ الىپ، ساقتاۋعا تىرىسادى. سپورت بۇيىمدارىنا دا سۇرانىس كۇرت وسكەن. ۇيدە قامالعان جۇرت بارىنشا امالداۋعا كىرىسكەن. بارىنەن دە تاۋلىك بويى جۇمىس ىستەۋگە ءماجبۇر دەنساۋلىق ساقتاۋ قىزمەتكەرلەرىنە قيىن. كوروناۆيرۋسپەن كۇرەسەمىز دەپ، وزگە ناۋقاستارعا كوڭىل بولۋگە مۇرشاسى جوق. مەديتسينالىق جاردەم كورسەتىلمەگەندىكتەن، باسقا اۋرۋدان ءولىم- ءجىتىم كوبەيىپ كەتتى. سوندىقتان بيلىك كوۆيد جۇقتىرماعان ناۋقاستاردى ۋاقىتىلى قابىلداۋدى مىندەتتەدى.
لي سيان، شاڭحاي قالاسى پارتيالىق كوميتەتىنىڭ حاتشىسى:
- ەپيدەميانىڭ الدىن الۋ جانە كوروانۆيرۋسپەن كۇرەس بويىنشا باس حاتشىنىڭ نۇقساۋلىعىن ورىندادىق. شاڭحاي تۇرعىندارىن مۇنداي ساياسي شەشىمگە تۇسىنىستىكپەن قاراپ، ءبىر- بىرىنە قولداۋ كورسەتكەندەرى ءۇشىن العىس بىلدىرەمىز. ەپيدەميامەن شايقاستا جەڭىپ شىعاتىنىمىزعا سەنەمىز.
كۇن سايىن 20 مىڭنان اسا ادام ۆيرۋس جۇقتىرادى. وسىعان قاراماستان، شاڭحايداعى شەكتەۋ ءسال بوساڭسىدى. كەي ۇيلەردىڭ تۇرعىندارىنا سىرتقا شىعۋعا رۇقسات ەتىلدى. ءبىراق ۇيدەن الىسقا ۇزاۋعا بولمايدى. مىڭعا جۋىق سۋپەرماركەت قايتا اشىلعان. ەلەكتروندى كوممەرتسيانىڭ پلاتفورمالارى دا كومەككە كەلدى: كۋرەرلەر مەن روبوتتار كەرەك- جاراقتى ۇيگە جەتكىزىپ بەرەدى.
كوروناۆيرۋستىڭ تارالۋىنا توقتاۋ سالۋ ءۇشىن قىتاي بيلىگى وسىنداي قاتاڭ شاراعا بارعان. الايدا شاڭحايداعى لوكداۋننىڭ سالدارىنان ءبىرقاتار ءوندىرىس جۇمىسىن توقتاتتى. بۇل قىتاي عانا ەمەس، الەمدىك ەكونوميكاعا كەسىرىن تيگىزىپ وتىر. وسى اپتادا ەۋرووداقتىڭ وندىرىستىك پالاتاسى لوكداۋننىڭ كەسىرى تاۋار لوگيستيكاسىنا تيگەنىن ايتىپ، قىتاي ۇكىمەتىنە حات جولداعان ەدى. ويتكەنى، شانحاي ماشينا قۇراستىرۋ، چيپ جانە فارماتسيەۆتيكا سىندى اۋقىمدى ءوندىرىس ورتالىعى سانالادى.
الايدا، قىتاي بيلىگى بۇل قيىندىقتاردىڭ ۋاقىتشا ەكەنىن ايتادى. ءسويتىپ جالپى ىشكى ءونىم ناۋرىز ايىنداعى كورسەتكىش، ياعني 5,5 پروتسەنت دەڭگەيىندە دەپ بولجاپ وتىر. جالپى، شانحايدان بولەك، قىتايدىڭ تاعى 70 قالاسىندا ءتۇرلى دارەجەدەگى شەكتەۋ ەنگىزىلگەن. ەكونوميستەر بولسا، قىتاي ەكونوميكاسىنىڭ ءوسىمى ءسال تەجەلەتىنىن ايتادى.
www.24.kz