12:34, 16 - ءساۋىر 2022 | GMT +5
اۋە شابۋىلىنا قارسى جاڭا لازەرلى قورعانىس جۇيەسى سىنالدى - يزرايل
نۇر- سۇلتان. قازاقپارات - يزرايل اۋە شابۋىلىنا قارسى جاڭا لازەرلى قورعانىس جۇيەسىن سىناقتان وتكىزدى. بۇل تۋرالى وسى ەلدىڭ قورعانىس مينيسترلىگى مالىمدەدى، دەپ حابارلايدى «حابار 24».

«ماگەن ور» دەپ اتالعان كەشەن سىناق بارىسىندا دروندار مەن ءتۇرلى زىمىرانداردى جانە مينومەت پەن تانككە قارسى وقتۇمسىقتاردى ءدال اتىپ تۇسىرگەن.
مامانداردىڭ ايتۋىنشا، قۋاتى 100 كيلوۆاتتان اساتىن كەشەن 8-10 شاقىرىمداي جەردەگى نىساندى كەز كەلگەن اۋا رايىندا قاعىپ تۇسىرەدى. بيلىك جاڭا قورعانىس كەشەنىن الداعى ونجىلدىقتا ەنگىزۋدى كوزدەپ وتىر. ول يزرايلدىڭ قازىرگى «تەمىر كۇمبەز» جانە «جەبە» سىندى زىمىراندارعا قارسى قورعانىس جۇيەلەرىن تولىقتىرادى.