بيىل مەملەكەت قىزمەتشىلەر مەن ولاردىڭ جۇبايىنا جولدانعان اۋدارىمدار عانا تەكسەرىلەدى

نۇر- سۇلتان. قازاقپارات – ق ر قارجى مينيسترلىگى مەملەكەتتىك كىرىستەر كوميتەتى مەملەكەتتىك قىزمەتتەر دەپارتامەنتى مەملەتتىك قىزمەتتەر باسقارماسىنىڭ باسشىسى ۆلادلەن بالان ءموبيلدى اۋدارىمداردى باقىلاۋ تۋرالى كۇشىنە ەنگەن بۇيرىقتىڭ ءمانىن ءتۇسىندىردى، دەپ حابارلايدى قازاقپارات ءتىلشىسى.

ماماننىڭ ايتۋىنشا، كاسىپكەرلىك قىزمەتپەن اينالىسپايتىن قاراپايىم قازاقستاندىقتارعا بۇل وزگەرىس ەشقانداي اسەر ەتپەيدى.

«ءبىرىنشى كەزەڭدە 2022 -جىلدىڭ قورىتىندىسى بويىنشا بۇل ولشەمدەر مەملەكەتتىك قىزمەتشىلەر مەن ولارعا تەڭەستىرىلگەندەرگە، سولاردىڭ جۇبايلارىنا قاتىستى بولادى. ياعني، 2022 -جىلدىڭ قورىتىندىسى بويىنشا جاڭاعى ساناتتارعا كىرەتىن ناقتى تۇلعالاردىڭ ءتىزىمى قالىپتاسادى. بۇل ءتىزىم ەكىنشى دەڭگەيلى بانكتەرگە جولدانادى. ەكىنشى دەڭگەيلى بانكتەر ازىرلەنگەن ولشەمشارتتار بويىنشا الگى تىزىمدەگى تۇلعالاردى بۇگىن كۇشىنە ەنگەن زاڭنىڭ تالابى بويىنشا تەكسەرىپ شىعادى. تىزىمدەگى تۇلعالاردىڭ دەرەكتەرى وسى ولشەمشارتتارعا سايكەس كەلسە، مەملەكەتتىك كىرىستەر ورگانىنا قايتا جىبەرىلەدى. ءبىز بانكتەردىڭ بەرگەن دەرەگى بويىنشا جۇمىس ىستەيمىز. بۇل مەملەكەتتىك كىرىس ورگاندارى جەكە تۇلعالاردىڭ شوتتارىن جاپپاي باقىلاۋعا الادى دەگەن ءسوز ەمەس. باقىلاۋ تەك بانكتەردىڭ تەكسەرۋى كەزىندە انىقتالعان بۇزۋشىلىقتار بويىنشا عانا جۇرگىزىلەدى»، - دەدى باسقارما باسشىسى.

ايتۋىنشا، بۇل جەردەگى ولشەمشارت دەگەن ۇعىم جەكە تۇلعالاردىڭ بانك شوتىنا ءبىر ايدىڭ ىشىندە باسقا 100 دەن استام جەكە تۇلعادان ءموبيلدى اقشا اۋدارىمدارى ءتۇسۋىن بىلدىرەدى.

«ءۇش اي بويى مەنىڭ بانك شوتىما ءموبيلدى اۋدارىم ارقىلى اي سايىن 100 دەن ارتىق جەكە تۇلعانىڭ شوتىنان اقشا ءتۇستى دەيىك. مۇنداي جايتتى ءبىز كاسىپكەرلىكپەن كاسىپكەر رەتىندە تىركەلمەي اينالىسۋ تاۋەكەلى رەتىندە قارايمىز. ال جەكە كاسىپكەر رەتىندە تىركەلگەن بولساڭىز، ونىڭ تابىسىن جەكە تۇلعا رەتىندە اشىلعان شوتقا قابىلداي المايسىز. جەكە كاسىپكەر رەتىندە اشقان شوتىڭىزعا عانا تولەم قابىلداۋىڭىز كەرەك»، - دەپ ءتۇسىندىردى ۆلادلەن بالان.

كوميتەت وكىلى بۇگىننەن باستاپ بۇكىل قازاقستاندىقتاردىڭ شوتىن بانكتەرگە تەكسەرتكەلى جاتپاعانىن باسا ايتتى.

«جىل سايىن ءتىزىم جاساپ، جىبەرىپ وتىرامىز. تيىسىنشە، اكىمشىلەندىرۋ ناتيجەسىنە سۇيەنە وتىرىپ، ولشەمدەر پىسىقتالادى. جوعارىدا ايتقان ولشەمشارتتار بارىنشا كەڭ ەتىپ الىندى. بۇل ولشەمشارتتاردى ەكىنشى دەڭگەيدەگى بانكتەرمەن اقىلداسىپ بەكىتتىك. باستاپقىدا جەكە تۇلعانىڭ بانك شوتىنا اي سايىن اقشا اۋدارعان ءارتۇرلى تۇلعالاردىڭ سانىن 50 گە دەيىن قىسقارتايىق دەگەن ماسەلە تۋىنداعان. كەيىن 100 دەگەن ولشەمگە توقتادىق. ويتكەنى حالىقتىڭ تۇگەلگە جۋىعى Kaspi قوسىمشاسى ارقىلى اۋدارىم جاساپ ءجۇر. تۋىستار، جاقىن دوستار مەن وتباسى مۇشەلەرى اراسىنداعى اۋدارىم ولشەمشارتقا ەنىپ كەتپەۋى ءۇشىن 100 گە كەڭەيتتىك»، - دەيدى مەملەكەتتىك كىرىستەر كوميتەتىنىڭ باسقارما باسشىسى.

سونداي- اق، ول بيىل نەگە مەملەكەتتىك قىزمەتشىلەر مەن ولارعا تەڭەستىرىلگەندەر، ولاردىڭ جۇبايلارىنىڭ شوتتارى عانا ءموبيلدى اۋدارىمدار بويىنشا تەكسەرىلەتىنىن ءتۇسىندىردى.

«جىل سايىن ءتىزىم جاساپ وتىرامىز دەدىم عوي. مىسالى وسى جىلدىڭ قورىتىندىسى بويىنشا مەملەكەتتىك قىزمەتكەرلەر مەن سولارعا تەڭەستىرىلگەندەردىڭ، جۇبايلارىنىڭ ءتىزىمىن ەكىنشى دەڭگەيلى بانكتەرگە جىبەرەمىز. ەكىنشى كەزەڭدە، ياعني، 2023 -جىلى كۆازيمەملەكەتتىك سەكتور قىزمەتكەرلەرى مەن بيۋدجەتتىك سالا قىزمەتكەرلەرىنىڭ، ولاردىڭ جۇبايلارىنىڭ ءتىزىمىن جىبەرەمىز. ودان كەيىن، ياعني، 2024 -جىلى كاسىپكەرلەر مەن زاڭدى تۇلعالاردىڭ باسشىلارى مەن قۇرىلتايشىلارىنىڭ، ولاردىڭ جۇبايلارىنىڭ ءتىزىمىن جىبەرىپ تەكسەرتەمىز. وسىدان كەيىن بارىپ قانا، ياعني، 2025 -جىلى بانكتەر بۇكىل جەكە تۇلعالاردىڭ بانك شوتتارىن زەردەلەيدى. بۇل كەزەڭگە جەتكەنگە دەيىن تاجىريبە بارىسىندا ولشەمشارتتاردى جەتىلدىرە تۇسەمىز. سول ارقىلى ولشەمشارتتارعا ادىلەتسىز ەنۋى تاۋەكەلدەرىن ازايتامىز»، - دەدى ۆلادلەن بالان.

قاراپايىم تىلمەن ايتساق، قارجى ءمينيسترىنىڭ ءموبيلدى اۋدارىمدارعا قاتىستى بۇيرىعى بۇگىننەن باستاپ بۇكىل قازاقستاندىقتاردىڭ جەكە تۇلعا رەتىندە اشقان شوتتارىن باقىلاۋعا المايدى. قانداي ساناتقا جاتاتىنىنا قاراماستان بۇكىل تۇلعالاردىڭ بانك شوتىنا جاسالاتىن اۋدارىمداردى باقىلاۋ تەك 2025 -جىلى باستالادى.

«مىسالى، بۇگىننەن باستاپ كاسىپكەر رەتىندە تىركەلمەسە دە، جولاۋشى تاسىمالداپ جۇرگەن جەكە تۇلعا مەملەكەتتىك قىزمەتشى بولماسا، بيىل ونىڭ شوتى تەكسەرىلمەيدى. جالپاق تىلمەن ايتقاندا، ونداي ادامنىڭ 2025 -جىلعا دەيىن وسىلاي تابىس تابا تۇرۋىنا مۇمكىندىك بار. ءبىراق ءموبيلدى اۋدارىم جاساۋعا ارنالعان QR- تاردى پايدالانعان دۇرىس»، - دەدى مەملەكەتتىك كىرىستەر كوميتەتىنىڭ باسقارما باسشىسى.

ەسكە سالساق، بۇگىننەن باستاپ قارجى ءمينيسترىنىڭ جەكە تۇلعالاردىڭ ءموبيلدى اۋدارىمدارىن باقىلاۋدى رەتتەيتىن بۇيرىعى كۇشىنە ەندى.