مەمورگانداردىڭ ەسەبى ءبىر اقپاراتتىق جۇيەگە بىرىكتىرىلەدى

نۇر-سۇلتان. قازاقپارات - مەملەكەتتىك ورگانداردىڭ بارلىق ەسەبى ءبىر اقپاراتتىق جۇيەگە بىرىكتىرىلەدى.

بۇل تۋرالى ق ر ستراتەگيالىق جوسپارلاۋ جانە رەفورمالار اگەنتتىگى ءتوراعاسىنىڭ ورىنباسارى ايگۇل شايىموۆا ايتتى، دەپ حابارلايدى قازاقپارات ءتىلشىسى.

«2000 -جىلداردىڭ باسىندا-اق قاعازسىز قۇجات اينالىمىنا تولىق كوشۋ مىندەتى قويىلعان بولاتىن. قۇجاتتار ەلەكتروندى تۇردە جاسالىپ، قاعاز تۇرىندە شىعارىلادى. سوندىقتان دا اتالعان ءپرينتسيپتى جۇزەگە اسىرۋعا قاتىستى پرەزيدەنت جارلىعىندا ءبىرقاتار ءىس- شارا كوزدەلگەن. ءبىرىنشى - نورماتيۆ اياسىندا قاعازبەن جۇمىس ىستەۋدەن باس تارتۋ. بۇل اتالعان بيزنەس پروتسەستى ايتارلىقتاي وڭتايلاندىرادى. ويتكەنى، ول قاعازدى باسىپ شىعارۋدان بولەك ءاربىر قۇجاتتىڭ پاراعىن سالىستىرىپ تەكسەرۋدى تالاپ ەتەدى. سوعان وراي قۇجاتتى راسىمدەۋگە ءبىرشاما جۇمىس ۋاقىتى جۇمسالادى»، - دەدى ول ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا. سونىمەن قاتار ءتوراعا ورىنباسارى پروتسەدۋرالىق ماسەلەلەردىڭ دە جەتىلدىرىلەتىندىگىن اتاپ ءوتتى. ماسەلەن، جاۋاپ بەرىلمەگەن جاعدايدا كەلىسىم الىندى دەگەن قۇرال ەنگىزىلەدى.

«قازىرگى ۋاقىتتا ءتىپتى مەملەكەتتىك ورگاننىڭ ەسكەرتپەسى بولماسا دا ول جوبانى ازىرلەۋشىگە جازباشا جاۋاپ بەرۋگە مىندەتتى. ەندى مۇنداي قاجەتتىلىك الىنىپ تاستالادى. بۇل جاۋاپ دايىنداۋعا كەتەتىن جۇمىس ۋاقىتىن ايتارلىقتاي قىسقارتادى. اسىرەسە مۇنداي نورما ادىلەت، ۇلتتىق ەكونوميكا، قارجى مينيسترلىكتەرى سياقتى مىندەتتى كەلىسىم بەرۋشى مەملەكەتتىك ورگانداردىڭ جۇمىسىن جەڭىلدەتەدى. مەملەكەتتىك ورگاندار اراسىندا ساۋال جولداۋدى الىپ تاستاۋ - بۇل مەملەكەتتىك ورگانداردىڭ ىشكى بيزنەس- پروتسەستەرىن جانە بايلانىسسىز ءوزارا ءىس- قيمىلدى وڭتايلاندىرۋعا باعىتتالعان كەلەسى نورما. ەندگى ۋاقىتتا مەملەكەتتىك ورگانداردان ۆەدومستۆولىق مالىمەتتەردى تالاپ ەتۋدىڭ قاجەتى جوق. ولاردى اقپاراتتىق رەسۋرستان الا سالۋعا بولادى. رەسۋرستاعى مالىمەتتەر قاتە بولسا، وندا دەرەكتەردى وزەكتەندىرۋگە جانە جاڭارتۋعا جاۋاپتى مەملەكەتتىك ورگان جاۋاپكەرشىلىك ارقالايدى. سونىمەن قاتار ەسەپتەردىڭ بارلىق ءتۇرىن ءبىر اقپاراتتىق جۇيەگە بىرىكتىرۋ جوسپارلانعان. ەندىگى ۋاقىتتا مەملەكەتتىك ورگاندارعا قاجەتتى مالىمەتتەردى ءارتۇرلى دەرەككوزدەرىنەن ىزدەۋدىڭ قاجەتى جوق. ولاردىڭ بارلىعى ءبىر جۇيەگە شوعىرلاندىرىلادى»، - دەدى ايگۇل شايىموۆا.