شاڭحايدا كوروناۆيرۋس جۇقتىرعاندار كوبەيىپ بارادى

سودان بەرى ەكى جارىم اپتا وتكەنىمەن، اۋرۋ كەتەر ەمەس. وتكەن تاۋلىكتە 28 مىڭداي ناۋقاس انىقتالدى. قالا تۇرعىندارىنا قازىر ازىق- تۇلىك جەتىسپەي جاتىر. اسىرەسە وزگە وڭىرلەردەن جۇمىسقا كەلگەن ادامدار قينالادى. جۇرت وسىعان بايلانىستى نارازىلىعىن الەۋمەتتىك جەلىدە ءبىلدىرىپ جاتىر. ماسەلەنى شەشۋ ءۇشىن، بيلىك قالانى ءۇش ايماققا ءبولدى. ەگەر كەشەندە 14 كۇن بويى اۋرۋ تىركەلمەسە، تۇرعىندار ءوز اۋلاسىنا شىعا الادى. ءبىراق كوپ ادام جينالۋعا جانە جابىق اۋداندارعا كىرۋگە تىيىم سالىنعان. ءبىراق، شاڭحايدا بىرتىندەپ بازارلار، ءدارىحانالار مەن ءدامحانالار اشىلا باستادى. دەگەنمەن بۇل ىندەتتىڭ كۇشى كەتە باستادى دەگەن ءسوز ەمەس. شاڭحايمەن قاتار قازىر جيلين مەن گۋاڭدۋن پروۆينسيالارىندا دا كوروناۆيرۋس ءورشىپ تۇر.
ۋ حۋانيۋي، شاڭحاي قالاسى اۋرۋلاردى باقىلاۋ ورتالىعى باسشىسىنىڭ ورىنباسارى:
- لوكداۋنعا قاراماستان اۋرۋ جۇقتىرۋ سانى نەلىكتەن ارتىپ جاتقانىن تالدادىق. بىرىنشىدەن، سكرينينگ ناتيجەلەرىندە بەلگىلى ءبىر كىدىرىس بار. تەستىلەۋ اۋقىمدى ءوتىپ جاتقاندىقتان، بىرنەشە جاعىندىسى بار پروبيركادا ۆيرۋس انىقتالسا، ناۋقاستى انىقتاۋ ءۇشىن جەكە تەستىلەر جاسايمىز. ەكىنشىدەن، ءبىر وتباسى ىشىندە اۋرۋدى جۇقتىرۋ. ەگەر وتباسىندا بىرەۋ اۋرىپ قالسا، قالعاندارىنا دا دەرت جۇعادى. ينكۋباتسيا مەرزىمىن ەسكەرسەك، ولاردى كەيىنگى تەكسەرۋلەردە انىقتايدى. ۇشىنشىدەن، جۇرت ۇيدەن شىقپاسا دا، ءتۇرلى تاۋار الىپ تۇرادى. ال وندا دا ۆيرۋس بولۋى مۇمكىن.