قازاقستانداعى وتباسىلىق دەمالىسقا ارنالعان ورىندار تۋرالى نە بىلەسىز؟

نۇر-سۇلتان. قازاقپارات - قىس - زەرىگۋدىڭ ۋاقىتى ەمەس. قازاقستاندا بۇل مەزگىلدە تابيعات وتە ادەمى، ال كەيبىر اۋدانداردا بەلۋاردان قالىڭ قار جاۋادى.
None
None

Kaz.tengritravel.kz پورتالى Aviata.kz سەرۆيسىمەن بىرگە قىستىڭ بار ادەمىلىگىن سەزىنۋ ءۇشىن وتباسىلىق دەمالىستى قايدا وتكىزۋگە بولاتىنى جايلى باياندايدى.

ءبىز قازاقستاندىقتار اراسىندا قىسقى وتباسىلىق دەمالىستى قىزىقتى وتكىزۋگە بولاتىن تانىمال ورىندار تۋرالى ايتامىز.

بۋراباي تابيعي ساياباعى

اقمولا وبلىسىنىڭ ەڭ باستى ءىنجۋ- مارجاندارىنىڭ ءبىرى جانە ەڭ جاقسى قىسقى ورنى - بۋراباي ۇلتتىق ساياباعى. ول استانادان 250 شاقىرىم جەردە ورنالاسقان. قىستا قىلقان جاپىراقتى ورماندار اپپاق قار جامىلعىسىمەن جابىلادى، ال ايگىلى كولدەر جارقىراعان مۇز ايدىندارىنا اينالادى. مۇندا تابيعي سۇلۋلىقتان باسقا، كوپتەگەن ساناتورييلەر، دەمالىس ورتالىقتارى مەن گلەمپينگتەر شوعىرلانعان.

كوتتەدجدەر سەگىز ادامنان تۇراتىن ۇلكەن توپتار ءۇشىن قولايلى بولادى. مۇنداي ءۇيدىڭ ورتاشا باعاسى كۇنىنە 35000 تەڭگەنى قۇرايدى، مەرەكە كۇندەرى ولار سۇرانىسقا يە، سوندىقتان الدىن الا تاپسىرىس بەرگەن دۇرىس. ءۇش نەمەسە ءتورت ادامنان تۇراتىن ءبىر وتباسى ءۇشىن دەمالىس ورتالىعىندا قوناق ءۇي كەشەنىنەن، قوناقۇيدەن نەمەسە ءۇش ادامعا ارنالعان شاعىن ۇيدەن بولمە الۋعا بولادى. بولمەنىڭ ورتاشا باعاسى قوسىمشا توسەك قويۋ مۇمكىندىگىمەن تاۋلىگىنە 15 مىڭ تەڭگەنى قۇرايدى.


ءسىز قوناق ءۇي كەشەنىن تاڭداعان بولساڭىز، تاڭعى اس بولمە باعاسىنا كىرەدى. تۇسكى جانە كەشكى اسقا قوسىمشا تولەنۋى كەرەك. كەيبىر قوناقۇيلەردە باسسەين، سپالار، ساۋنا، ۇستەل تەننيسى بار. كوشەدە ادەتتە قىسقى دەمالىس ءۇشىن بارلىعى بار: سلايد، تيۋبينگ، جاڭا جىلدىق سۋرەتكە تۇسەتىن ورىندار. كەيبىر جەرلەردە ءتىپتى جابىق ءليفتى بار سىرعاناقتار مەن ادەمى جارىق استىندا سىرعانايتىن الاڭدار بار. ءسىز شاڭعى مەن قاردا جۇرەتىن كولىكتى جالعا الا الاسىز. قاجەتتى ويىن- ساۋىقتىڭ ءتۇرىنىڭ بار- جوعىن برونداۋ الدىندا تەكسەرىپ الىڭىز.

سونداي-اق، بيۋدجەتتى، قولجەتىمدى نۇسقالار دا بار. جەرگىلىكتى تۇرعىندار ءۇيىن نەمەسە اۋلاسىنداعى قوسالقى قۇرىلىسىن جالعا بەرەدى. ول كولدەن، نە كۋرورت ورتالىعىنان الىس بولادى، ارينە، ءبىراق باعاسى سوعان ساي - ءبىر ادامعا كۇنىنە ورتا ەسەپپەن ءۇش مىڭ تەڭگە. جەرگىلىكتى تۇرعىندار دا كوپقاباتتى ۇيلەردەن پاتەر جالعا بەرەدى. اس ءۇي، ىدىس- اياق جانە سىزگە قاجەت نارسەنىڭ بارلىعىمەن قامتاماسىز ەتەدى. قولجەتىمدى باعا، ارينە، جاقسى. ءبىراق كۋرورتقا بارۋ ءۇشىن سىزگە تاكسي قاجەت بولادى.

ۇلكەن توپپەن ساياحاتتاپ، ءۇي جالدايتىندار تاماقتى وزدەرى دايىنداۋعا ءماجبۇر. مۇندا باربەكيۋ، ساماۋىر جانە بارلىق قاجەتتى جابدىقتارى بار اس ءۇي بار. كەيبىر ۇيلەردىڭ جانىندا مونشا بار، باعاسى بولەك تولەنەدى. ايتپاقشى، بۋرابايدا ۇيلەر مەن قوناقۇيلەردىڭ قۇنى ورنالاسقان جەرىنە بايلانىستى: كولگە جاقىن بولعان سايىن ارزانىراق. سوندىقتان كەيدە باعا ۇيدەگى جاعدايدىڭ دەڭگەيىنە بايلانىستى ەمەس.


سونداي- اق، شيپاجايدا اتقا ءمىنۋ، ءوڭىردىڭ كورنەكتى جەرلەرىنە: جۇمباقتاس، بۋراباي ساياباعىنا ەكسكۋرسيا، تاۋعا ورمەلەۋ، كۋرورتتىق ايماعىندا بۇعى جانە يت شانا، شاڭعى، شانا جانە كونكي تەبۋ ۇسىنىلادى.

كوپتەگەن ساياحاتشىلار اياز اتانىڭ ايگىلى رەزيدەنتسياسى - قازاقستاندىق لاپلانديا تۋرالى بىلەدى. ول شۋچينسكىدەن الىس ەمەس، «Rixos-بوروۆوە» جانىندا ورنالاسقان. كىرۋ تەگىن جانە كەڭ اۆتوتۇراق بار. مۇندا ءسىز كۆادروۆەلوسيپەدپەن، بۇعى، نە حاسكي جەگىلگەن شانامەن سەرۋەندەي الاسىز.

استانادان بۋرابايعا پويىزبەن، تاكسيمەن جانە اۆتوبۋسپەن قاتىناۋعا بولادى. ورتاشا العاندا، جول شامامەن ەكى- ءۇش ساعاتتى الادى. ەگەر سىزدە اۆتوكولىك بولسا، باراتىن جەرىڭىزگە دەيىن دە، كۋرورتتا ءجۇرىپ بارا جاتقاندا دا جول ءجۇرۋ شىعىنى ايتارلىقتاي تومەن بولادى. پويىزدى نۇر-سۇلتان جانە كوكشەتاۋ قالالارىنىڭ تۇرعىندارى پايدالانا الادى. بيلەت قۇنى ءبىر جارىم مىڭ تەڭگە شاماسىندا، ۆاگوندارى كەڭ، ءارى ىڭعايلى. قىستا قالاارالىق تاكسي قىزمەتىن پايدالانۋ قولايلى بولادى. بيلەتتەر - ءۇش مىڭ تەڭگە جانە ودان دا جوعارى. شۋچينسكىدەن (نۇر-سۇلتاننان 240 شاقىرىم جەردەگى وبلىسقا قارايتىن قالا - اۆتوردىڭ ەسكەرتۋى) بۋراباي اۋىلىنا جەتۋ كەرەك. مۇنداعى تاكسي باعاسى ەكى مىڭ تەڭگەدەن اسپايدى. قوناق ءۇي ءنومىرىن الدىن الا برونداعان بولساڭىز، قوناقۇيلەر اۆتوبۋسپەن قامتاماسىز ەتە الادى.

شىعىس قازاقستان وبلىسىنىڭ تاۋ شاڭعىسى كۋرورتتارى

التاي تاۋلارى كوپشىلىكتى قىزىقتىرماي قويمايدى: تىلسىم شامبالانى ىزدەپ ساياحاتتايتىن ەزوتەريكتەر دە، التاي مەن ءسىبىردىڭ ەڭ بيىك شىڭى - بەلۋحا تاۋىنا شىعۋعا ۇمتىلاتىندار دا، مۇيىزبەن ەمدەۋدى ۇناتاتىندار دا (جىل سايىنعى ءوسۋ كەزىندەگى بۇعى مۇيىزدەرى - اۆتوردىڭ ەسكەرتۋى). ال شىعىس قازاقستان وبلىسىنىڭ شاڭعى بازالارىندا قىس مەزگىلىندە مامىق قاردا سىرعاناۋعا بولادى.

وبلىستا جالپى ۇزىندىعى 80 شاقىرىمعا جەتەتىن 30 شاڭعى جولدارى بار. بيىكتىكتەگى ايىرماشىلىقتار ءبىر جارىم شاقىرىمعا جەتەدى، بەتكەيلەردىڭ ەڭ جوعارى ۇزىندىعى بەس شاقىرىمعا دەيىن جەتەدى. مۇندا ماۋسىم قاراشا ايىندا باستالىپ، ءساۋىر ايىنىڭ ورتاسىنا دەيىن سوزىلادى. مۇندا جەتى شاڭعى كۋرورتى بار. ولاردىڭ كەيبىرەۋىنە تۇراقتاپ، بىرنەشە كۇن تۇرۋعا بولادى. ءبىر بولمەنىڭ باعاسى كۇنىنە 15 مىڭنان باستالادى.


ورنالاستىرۋ: وسكەمەندە ءبىر ادامعا كۇنىنە بەس مىڭ تەڭگە. قۇرال- جابدىقتار: شاڭعى جيناعى: شاڭعى، ەتىك، دۋلىعا - ءبىر ادامعا كۇنىنە 4500 تەڭگە. سنوۋبوردشىعا ارنالعان جيىنتىق شامامەن وسىنداي باعادا. شاڭعى بيلەتى - ءبىر ادامعا تاۋلىگىنە 7500 تەڭگە.

باياناۋىل ۇلتتىق تابيعي ساياباعى

باياناۋىل ۇلتتىق ساياباعى - قازاق دالاسىنىڭ قاق ورتاسىندا جايىلعان قاراعايلى، تاۋلى كوركەم ولكە. ساياباقتىڭ اۋماعىندا ءتورت تۇشى سۋى بار - سابىندىكول، تورايعىر، بىرجانكول جانە جاسىباي كولدەرى. ەڭ ۇلكەنى - سابىندىكول. جاسىباي ەڭ ءمولدىر سۋلى بولىپ سانالادى. تورايعىر تەڭىز دەڭگەيىنەن ەڭ بيىك ورنالاسقان. بىرجانكولدە تۇقى، سازان، موڭكە بالىقتارى مەكەندەيدى.

كول جاعاسىندا جانە باياناۋىل ورماندارىنىڭ ورتاسىندا تۋريستەردى ءبىر ادامعا تاۋلىگىنە ءۇش مىڭ تەڭگە تۇراتىن تۇنەيتىن دەمالىس ورىندارى بار. ولاردىڭ كەيبىرەۋلەرىندە ءسىز تاعامدى تاڭداي الاسىز، ءبىراق كوبىنەسە تۋريستەر ءوز بەتىنشە دايىنداعاندى ۇناتادى. ۇلتتىق ساياباقتا ءارتۇرلى قىسقى ويىن- ساۋىق ۇسىنىلادى: كونكي، شاڭعىنى جالعا الۋ، بالالارعا ارنالعان سلايدتار. باياناۋىلدا سونىمەن قاتار، پاۆلودار، قاراعاندى، نۇر- سۇلتان قالالارىنان ءبىر جانە ەكى كۇندىك تۋرلار ۇسىنىلادى. باعاسى 10 مىڭ تەڭگەدەن باستالادى.

سونىمەن قاتار، باياناۋىلدا «مىرزاشوقى» شاڭعى بازاسى بار. شاڭعىشىلار، سنوۋبوردشىلار، تيۋبينگ پەن سنوۋتينگ اۋەسقويلارى مۇندا تەك پاۆلودار وبلىسىنان عانا ەمەس، قاراعاندى مەن نۇر- سۇلتاننان دا كەلەدى. ۇلكەن جولىنىڭ ۇزىندىعى - 800 مەتر، ءتۇسۋى - 1200 - 1300 مەتر، كىشى كوتەرگىشتە - 320 مەتر، ءتۇسۋ - 500 مەتر.

بۇل بازا ءبىر جىل بۇرىن عانا اشىلعان. باق مالىمەتىنشە تاۋ شاڭعىسى كۋرورتىندا 44 جۇپ شاڭعى مەن 20 سنوۋبورد جالعا بەرىلەدى. باعالارى مىناداي: ۇلكەندەر ءۇشىن اسپالى جول - 500 تەڭگە، بالالارعا - 250 تەڭگە، 9:00-دەن 18:00-گە دەيىنگى ابونەمەنت - ءۇش مىڭ تەڭگە. شاڭعى مەن سنوۋبوردتى جالعا الۋ - ساعاتىنا 1500 تەڭگە، ابونەمەنت - التى مىڭ تەڭگە. 10 جاسقا دەيىنگى بالالار تەگىن سىرعانايدى. دەمالۋشىلار ءبىرى تاۋدىڭ باسىندا، ەكىنشىسى - ەتەگىندە ورنالاسقان ەكى ءدامحانادان تاماقتانىپ، جىلىناتىن بولادى.

«مىرزاشوقىدا» تۇنەۋگە قالۋ مۇمكىن ەمەس: قوناق ءۇي قۇرىلىسى ءالى جوسپاردا عانا. كۇنىنە ەكى رەت ساعات 10.00 جانە 14.30-دا جولاۋشىلارعا ارنالعان «گازەل» باياناۋىلدان مىرزاشوقىعا تۋريستەردى جەتكىزەدى. ءبىر بيلەتتىڭ باعاسى - 500 تەڭگە.

الماتى وبلىسى

الماتىداعى قىسقى دەمالىستىڭ ەڭ سۇيىكتى ورىندارىنىڭ ءبىرى - تاۋ شاڭعىسى كۋرورتتارى. ولاردىڭ قالاعا جاقىن ورنالاسۋى جانە ىلە الاتاۋىنىڭ ادەمى كورىنىسى وسىنداي تانىمالدىلىققا سەبەپشى بولدى. مۇندا تۇندە شاڭعى تەبۋگە دە بولادى، شاممەن جارىقتاندىرىلعان بەتكەيلەردىڭ ادەمى كورىنىسىن تاماشالاي الاسىز. وي- قاراعاي شاتقالىنداعى اتاقتى الماتى «لەسنايا سكازكا» جاڭادان باستاعاندار ءۇشىن وتە قولايلى. ەڭ بيىك نۇكتەسى - 1650 مەتر، ەڭ جوعارى ەڭىسى - 35 گرادۋس. جولدار قاراپايىم جانە قولجەتىمدى، سوندىقتان مۇندا وتباسىمەن ءجيى كەلەدى.

تالعار ماڭىنداعى اسەم شاتقالدا ورنالاسقان «اق- بۇلاق» تاۋ شاڭعىسى كۋرورتى جاڭادان باستاعاندار مەن تاجىريبەلى اۋەسقويلارعا شاڭعى جانە سنوۋبورد تەبۋدى ۇسىنادى. مۇندا سىرعانايتىن جەردىڭ ءبىر بولىگى ورماندى جەردە، كەرەمەت شىرشالاردىڭ اراسىنان وتەدى. مۇندا مۇز ايدىنى دا بار. قىستا اتپەن دە جۇرۋگە بولادى. «تاباعان» سپورتتىق ويىن- ساۋىق كەشەنى ىلە- الاتاۋ ۇلتتىق تابيعي ساياباعىنىڭ جانىندا ورنالاسقان. بۇل اۋەسقويلارعا ارنالعان ورىن. بالالار ءۇشىن شانامەن سىرعاناۋ جانە تيۋبينگ بار.


«مەدەۋ» بيىك تاۋلى مۇزايدىنى تەڭىز دەڭگەيىنەن 1691 مەتر بيىكتىكتە ورنالاسقان. ول - الەمدەگى ەڭ ۇلكەن بيىكتىكتەگى قىسقى سپورت كەشەنى. مەدەۋ مۇز ايدىنىنا كىرۋ بيلەتتەرىنىڭ قۇنى: ەرەسەكتەر - 1800 تەڭگە، التى جاسقا دەيىنگى بالالارعا - تەگىن، بالالارعا (جەتى جاستان 13 جاسقا دەيىن) - 400 تەڭگە، جاستار (14-22 جاس) مەن زەينەتكەرلەرگە ( 58 جاس جانە ودان جوعارى) - 900 تەڭگە.

مۇگەدەكتەرگە، كوپ بالالى وتباسىلارعا جانە بالالار ءۇيىنىڭ تاربيەلەنۋشىلەرىنە - تەگىن. جۇمىس كۇندەرى كونكي تەبۋ ءۇش سەسسيادا وتەدى: كۇندىزگى (11.00-دەن 14.00-گە دەيىن)، كۇندىزگى (15.00-دەن 18.00-گە دەيىن)، كەشكى (20.00-دەن 23.00-گە دەيىن). دەمالىس جانە مەرەكە كۇندەرىندە ءتورت سەسسيا: تاڭەرتەڭ (09.00-11.00)، تۇستەن كەيىن (12.30-14.30)، تۇستەن كەيىن (16.00-18.00)، كەشكى (19.30-22.30).

سونداي-اق، «پەرۆومايسك توعاندارىندا « كونكي تەبۋگە بولادى. بۇل جەر جازدا ايگىلى لوتوستار گۇلدەيتىن كولگە جاقىن. ەرەسەكتەرگە ارنالعان بيلەت باعاسى - ەكى مىڭ تەڭگە. ستۋدەنتتىك بيلەت - 16 جاستان 22 جاسقا دەيىن - 1500 تەڭگە. جەڭىلدىكتى بيلە - مىڭ تەڭگە. كونكيدى بىرنەشە رەت شىعىپ تەبۋگە بولادى، ول 11.00-دەن 22.00-گە دەيىن سوزىلادى. سەيسەنبى - تەحنيكالىق كۇن، 17.00-دەن 22.00-گە دەيىن ەكى رەت تەبۋگە بولادى. اۋا- رايىنا بايلانىستى كەستە وزگەرىپ تۇرادى، سوندىقتان ساپارعا شىعار الدىندا انىقتاپ العان دۇرىس. سونداي- اق، مۇندا اۋە شارىنا مىنۋگە بولادى. ەرەسەكتەرگە بيلەت - التى مىڭ تەڭگە، التى جاستان 12 جاسقا دەيىنگى بالالارعا - ءۇش مىڭ تەڭگە. ادام سانى ءتورت ادامعا دەيىن، شار جەردەن 25 مەتر بيىكتىكتە كوتەرىلەدى. مۇندا قىسقى ويىن- ساۋىق ماۋسىمى ناۋرىز ايىنا دەيىن سوزىلادى.

يمانتاۋ- شالقار كۋرورتتىق ايماعى

سولتۇستىك قازاقستان وبلىسىندا بۋرابايعا ۇقسايتىن تاعى ءبىر جەر - يمانتاۋ- شالقار كۋرورتتىق ايماعى. بيىكتىگى 11 قاباتتى ءۇيدىڭ دەڭگەيىنە جەتەتىن تاۋ جوتالارى مەن قاراعايلار بار. ايماقتىڭ اتاۋى ەكى كول - يمانتاۋ مەن شالقاردان شىققان. ءبىرىنشى سۋ قويماسىن ورتاسىندا جۇرەك ءپىشىندى ارالى بولۋىنا بايلانىستى سولتۇستىك قازاقستاننىڭ جۇرەگى دەپ اتايدى. بۇل ارالدا ەشكىم تۇرمايدى، جازدا وعان قايىقپەن، ال قىستا جاياۋ نەمەسە اتپەن بارۋعا بولادى. جاعالاۋدان ارالعا دەيىنگى قاشىقتىق ءتورت شاقىرىمدى قۇرايدى.

شالقار - وڭتۇستىگى قىلقان جاپىراقتى اعاشتارمەن كومكەرىلگەن جارتاستى بولىپ كەلەتىن تۇيىق كول. ونىڭ ۇزىندىعى 12 شاقىرىم، ەنى ءۇش شاقىرىم. قىستا كولدىڭ سۋى قاتىپ، تۋريستەر ءۇشىن مۇز ايدىنىنا اينالادى.


كول جاعاسىندا قىسقى دەمالىستى ويداعىداي وتكىزۋگە بولاتىن بىرنەشە دەمالىس ورىندارى بار. مۇنداعى بارلىق دەمالىس ايماقتارى قوناقتاردى كوتتەدج، گلەمپينگ نەمەسە ورتاق اس ءۇيى بار قوناقۇيگە ورنالاستىرۋدى قامتاماسىز ەتەدى. مۇنداعى باعالار الدەقايدا قولجەتىمدى. مىسالى، ەكى ادامعا ارنالعان بولمە - ءبىر ادامعا ءۇش مىڭ تەڭگەدەن نەمەسە ءتورت ورىندى ءۇي 15 مىڭنان. كەيبىر قوناقۇيلەر تۋريستەرگە اقىلى تاماقتانۋدى ۇسىنادى. ءبىراق كوبىنەسە قوناقتار وزدەرىمەن بىرگە تاماق الىپ كەلەدى نەمەسە وزدەرى دايىندايدى.

تۋريستىك فيرمالار يمانتاۋعا ءبىر كۇندىك ەكسكۋرسيا ۇسىنادى، وعان جول ءجۇرۋ اقىسى، ەكسكۋرسيا مەن گيد قىزمەتى، سونىمەن قاتار جەڭىل تاعامدار كىرەدى. باعاسى ءبىر ادامعا 10 مىڭ تەڭگەدەن باستالادى.

يمانتاۋدا قىسقى ويىن- ساۋىق ءتۇرى كوپ. مۇندا شاڭعى، كونكي، تيۋبينگ اۋەسقويلارىنا قاتتى ۇنايدى. دەمالىس ايماقتارىندا كونكيدى جالعا الۋ، شاڭعىلار، بالالار سىرعاناقتارى، تيۋبينگ، كۆادروتسيكلدەر جانە يت جەگىلگەن شانا دا بار.

يمانتاۋ- شالقار كۋرورتتىق ايماعى كوكشەتاۋدان 90 شاقىرىم، پەتروپاۆلدان 245 شاقىرىم جانە نۇر-سۇلتاننان 400 شاقىرىم جەردە ورنالاسقان. كوكشەتاۋدان ارىقبالىق جانە چيستوپولە اۋىلدارىنا تۇراقتى شاعىن اۆتوبۋستار قاتىنايدى. پەتروپاۆلدان شاعىن اۆتوبۋسپەن يمانتاۋ اۋىلىنا، ارى قاراي تاكسيمەن كەرەك دەمالىس ورتالىعىنا جەتۋگە بولادى. نۇر-سۇلتاننان اۆتوبۋسپەن نەمەسە تاكسيمەن دە بارۋعا بولادى. ءبىراق يمانتاۋ كولىنە جەتۋدىڭ ەڭ وڭاي جولى - جەكە كولىكپەن بارۋ.

ساياحاتتاۋ - ول دا ءبىر جاۋاپكەرشىلىك ەكەنىن اۆياتا ەسكە سالادى. كەيىنگى ۇرپاقتىڭ سالاۋاتتى ءومىرى ءۇشىن جانە قايتار جولىمىزدىڭ تازالىعى ءۇشىن تابيعاتتى بارىنشا ايالايىق.

سوڭعى جاڭالىقتار