مەملەكەتتىك اپپاراتتى بيۋروكراتيادان ارىلتۋ شارالارىنا نە كىرەدى

قازاقپارات جارلىقتىڭ تولىق ءماتىنىن جاريالايدى.
مەملەكەتتىك اپپاراتتا شەشىمدەر قابىلداۋدىڭ تيىمدىلىگى مەن جەدەلدىگىن ارتتىرۋ، اتقارۋشى بيلىكتىڭ قىزمەتىن زاڭنامالىق تۇرعىدان ارتىق رەگلامەنتتەۋدى بولدىرماۋ، قۇجات اينالىمى مەن ەسەپتىلىكتى قىسقارتۋ، مەملەكەتتىك ورگاندار باسشىلارىنىڭ دەربەستىگى مەن دەربەس جاۋاپكەرشىلىگىن ارتتىرۋ ماقساتىندا قاۋلى ەتەمىن:
1. بيۋروكراتيادان ارىلتۋدىڭ مىناداي قاعيداتتارى ايقىندالسىن:
1) ءماننىڭ نىساننان باسىمدىعى - ناتيجەگە قول جەتكىزۋ بويىنشا جۇمىس نىسانىنان ناقتى جانە ولشەنەتىن ناتيجەنىڭ باسىم بولۋى؛
2) باستاپقى بويىنشا سيفرلاندىرۋ - مەملەكەتتىك ورگانداردىڭ ازاماتتارمەن، بيزنەسپەن جانە ءبىر- بىرىمەن سيفرلىق فورماتتا جان- جاقتى ءوزارا ءىس- قيمىل جاساۋىنىڭ باسىمدىعى؛
3) باسقارۋشىلىق جاۋاپكەرشىلىك - ناقتى باسشىنىڭ قۇزىرەتى اياسىنا كىرەتىن شەشىمدەردى قابىلداۋ مەن ماسەلەلەردى كەلىسۋدى جوعارى تۇرعان دەڭگەيگە جانە القالى ورگاندارعا بەرۋگە جول بەرىلمەيتىنى؛
4) ۇزدىكسىز جەتىلدىرۋ - مەملەكەتتىك اپپاراتتىڭ بيۋروكراتيانى قىسقارتۋعا، جۇيەلى رەينجينيرينگكە جانە ىشكى راسىمدەر مەن پروتسەستەردى وڭتايلاندىرۋعا ىنتالاندىراتىن ۇيىمداستىرۋشىلىق مادەنيەتىن قالىپتاستىرۋ جانە قولداۋ؛
5) رەگلامەنتتەۋدىڭ وڭتايلىلىعى - مەملەكەتتىك ورگانداردىڭ قىزمەتتەرىن رەگلامەنتتەۋدىڭ وڭتايلى قاجەتتى دەڭگەيىن بەلگىلەۋ، جەتكىلىكتى تۇردە نەگىزدەلمەگەن جاڭا بيۋروكراتيالىق تالاپتاردى، ەسەپتىلىك پەن باقىلاۋ تۇرلەرىن ەنگىزۋگە جول بەرمەۋ.
2. قازاقستان رەسپۋبليكاسىنىڭ ۇكىمەتى وزەكتى سىن- قاتەرلەرگە، فورس- ماجورلىق ءمان- جايلارعا جانە داعدارىستىق جاعدايلارعا جەدەل دەن قويۋ ءۇشىن قۇزىرەتتەرىن، فۋنكتسيالارى مەن وكىلەتتىكتەرىن زاڭنامالىق دەڭگەيدە ارتىق (شامادان تىس) ناقتىلاماي، جۇكتەلگەن مىندەتتەردى ىسكە اسىرۋ ماقساتىندا نورماتيۆتىك قۇقىقتىق اكتىلەردى قابىلداۋ قۇقىعىن مەملەكەتتىك ورگاندارعا بەرۋدى، سونداي- اق نورماتيۆتىك قۇقىقتىق اكتىلەردى، ونىڭ ىشىندە مەملەكەتتىك تىركەۋسىز قابىلداۋدىڭ ەرەكشە ءتارتىبىن ەنگىزۋدى قامتاماسىز ەتسىن.
3. قازاقستان رەسپۋبليكاسىنىڭ ۇكىمەتى 2022 -جىلعى 1-جەلتوقسانعا دەيىن پرەزيدەنت جانىنداعى قازاقستان رەسپۋبليكاسىنداعى سيفرلاندىرۋدى ەنگىزۋ ماسەلەلەرى جونىندەگى كوميسسيانىڭ قىزمەتى شەڭبەرىندە مەرزىمدەر مەن كەزەڭدەردى ەكى ەسەگە جالپى قىسقارتىپ، بيۋدجەت جانە نورما تۇزۋشىلىك پروتسەستەرىنىڭ كەشەندى رەينجينيرينگىن قامتاماسىز ەتسىن.
4. اقپاراتتاندىرۋ سالاسىنداعى ۋاكىلەتتى ورگان ورتالىق جانە جەرگىلىكتى مەملەكەتتىك ورگانداردا سيفرلىق ترانسفورماتسيانى جانە بيزنەس- پروتسەستەردىڭ رەينجينيرينگىن ۇيلەستىرۋگە، سونداي- اق مەملەكەتتىك اقپاراتتاندىرۋ وبەكتىلەرىنىڭ ينتەگراتسياسى ماسەلەلەرى بويىنشا شەشىمدەر قابىلداۋعا جاۋاپتى بولىپ ايقىندالسىن.
5. مەملەكەتتىك ورگانداردىڭ ىشكى جانە ۆەدومستۆوارالىق ءوزارا ءىس- قيمىلى شەڭبەرىندە ءتيىستى مەملەكەتتىك ورگانداردىڭ مەملەكەتتىك اقپاراتتاندىرۋ وبەكتىلەرىندە ورنالاستىرىلعان اقپاراتتى مالىمەتتەردىڭ انىقتىعىن، تەڭتۇپنۇسقالىعىن جانە وزەكتىلىگىن قوسىمشا راستاۋسىز پايدالانۋ قاجەتتىلىگى ايقىندالسىن.
6. مەملەكەتتىك اقپاراتتاندىرۋ وبەكتىلەرىندە ورنالاستىرىلاتىن مالىمەتتەردىڭ انىقتىعى مەن وزەكتىلىگى ءۇشىن جانە انىق ەمەس مالىمەتتەردى پايدالانۋعا بايلانىستى شىعاسىلار ءۇشىن تولىق جاۋاپكەرشىلىك ءتيىستى مەملەكەتتىك ورگانداردىڭ باسشىلارىنا جۇكتەلسىن.
7. قازاقستان رەسپۋبليكاسىنىڭ ۇكىمەتى 2022 -جىلعى 31-جەلتوقسانعا دەيىن قازاقستان رەسپۋبليكاسىنىڭ پرەزيدەنتىنە تىكەلەي باعىناتىن جانە ەسەپ بەرەتىن مەملەكەتتىك ورگاندارمەن بىرلەسىپ، «Smart Data Ukimet» مەملەكەتتىك اقپاراتتىق- تالدامالىق جۇيەسىنىڭ بازاسىنداعى جانە وزگە دە مەملەكەتتىك اقپاراتتاندىرۋ وبەكتىلەرىندەگى ەسەپتەر مەن كورسەتكىشتەردىڭ بارلىق تۇرلەرىن (سالالىق دەرەكتەر) جۇيەلەسىن.
8. مەملەكەتتىك ورگانداردىڭ «Smart Data Ukimet» مەملەكەتتىك اقپاراتتىق- تالدامالىق جۇيەسىندەگى جانە وزگە دە مەملەكەتتىك اقپاراتتاندىرۋ وبەكتىلەرىندەگى قولجەتىمدى مالىمەتتەردى سۇراتۋىنا جانە بەرۋىنە، سونداي- اق وسىنداي سۇراۋ سالۋلارعا جاۋاپ بەرۋىنە تىيىم سالىنسىن.
9. قازاقستان رەسپۋبليكاسى پرەزيدەنتىنىڭ اكىمشىلىگى ءۇش اي مەرزىمدە:
1) ءتيىستى قۇقىقتىق اكتىلەردى قايتا قاراۋدى قامتاماسىز ەتە وتىرىپ، ىشكى بيزنەس- پروتسەستەرگە كەشەندى رەينجينيرينگ جۇرگىزسىن؛
2) قازاقستان رەسپۋبليكاسىنىڭ ۇكىمەتىمەن بىرلەسىپ، قازاقستان رەسپۋبليكاسىنىڭ پرەزيدەنتى مەن قازاقستان رەسپۋبليكاسى پرەزيدەنتىنىڭ اكىمشىلىگى باسشىلىعىنىڭ قولدانىستاعى باقىلاۋداعى تاپسىرمالارىنا قوسارلانۋى جانە وزەكتىلىگى تۇرعىسىنان جاپپاي ريەۆيزيا جۇرگىزسىن؛
3) قۇپيالىلىق گريفى جانە «قىزمەت بابىندا پايدالانۋ ءۇشىن» دەگەن بەلگىسى بار قۇجاتتاردى قوسپاعاندا، قازاقستان رەسپۋبليكاسى پرەزيدەنتى اكتىلەرىنىڭ جوبالارىن قاعاز جەتكىزگىشتەردە ەنگىزۋ، ولارعا ۆيزا قويۋ جانە ءار پاراعىنا قول قويۋ جونىندەگى تالاپتى الىپ تاستاۋدى قامتاماسىز ەتسىن.
10. قازاقستان رەسپۋبليكاسىنىڭ ۇكىمەتى: 1) ەكى اي مەرزىمدە: قازاقستان رەسپۋبليكاسى پرەمەر- ءمينيسترىنىڭ، قازاقستان رەسپۋبليكاسى پرەمەر- ءمينيسترى ورىنباسارلارىنىڭ جانە قازاقستان رەسپۋبليكاسى پرەمەر- ءمينيسترى كەڭسەسى باسشىلىعىنىڭ قولدانىستاعى باقىلاۋداعى تاپسىرمالارىنا قوسارلانۋى جانە وزەكتىلىگى تۇرعىسىنان جاپپاي ريەۆيزيا جۇرگىزسىن؛
ۇكىمەت، ورتالىق جانە جەرگىلىكتى اتقارۋشى ورگاندار جانىنداعى كونسۋلتاتيۆتىك- كەڭەسشى ورگانداردىڭ سانىن ەكى ەسە قىسقارتۋدى قامتاماسىز ەتسىن؛ ازاماتتار مەن بيزنەس نەعۇرلىم تالاپ ەتەتىن ومىرلىك جانە ىسكەرلىك جاعدايلاردى قوسىپ، ولاردىڭ رەينجينيرينگى مەن اۆتوماتتاندىرىلۋىن قامتاماسىز ەتە وتىرىپ، مەملەكەتتىك كورسەتىلەتىن قىزمەتتەر ءتىزىلىمىن قالىپتاستىرۋ تاسىلدەرىن قايتا قاراسىن؛
ازاماتتارمەن كوممۋنيكاتسيا جانە ۆەدومستۆوارالىق جەدەل ءوزارا ءىس- قيمىل جاساۋ ماقساتىندا اشىق كەڭەستەر وتكىزۋ ءۇشىن قولجەتىمدى ونلاين- سەرۆيستەردى پايدالانۋ مۇمكىندىگىن قامتاماسىز ەتسىن؛ ۇكىمەت رەگلامەنتىن جانە باسقا دا نورماتيۆتىك قۇقىقتىق اكتىلەردى، ونىڭ ىشىندە: زاڭنامالىق اكتىلەردى، پرەزيدەنتتىڭ اكتىلەرىن، سونداي-اق قۇپيالىلىق گريفى جانە «قىزمەت بابىندا پايدالانۋ ءۇشىن» دەگەن بەلگىسى بار قۇجاتتاردى قوسپاعاندا، قۇجاتتاردى قاعاز تۇرىندە ەنگىزۋدىڭ، ولارعا ۆيزا قويۋدىڭ جانە ءار پاراعىنا قول قويۋدىڭ كۇشى جويىلۋىن؛ ەگەر نورماتيۆتىك قۇقىقتىق اكتىلەردىڭ جوبالارى، پارلامەنت دەپۋتاتتارىنىڭ تۇزەتۋلەرىنە جانە ولار باستاماشىلىق جاساعان زاڭ جوبالارىنا جانە كەلىسۋدى تالاپ ەتەتىن وزگە دە قۇجاتتارعا ۇكىمەتتىڭ قورىتىندىلارى بويىنشا جاۋاپ بەلگىلەنگەن مەرزىمدە ۇسىنىلماسا، ولاردى «باستاپقى بويىنشا كەلىسۋ» ءتارتىبىنىڭ ەنگىزىلۋىن؛
ەسكەرتۋلەرى بار نورماتيۆتىك قۇقىقتىق اكتىلەردىڭ جوبالارىن پرەمەر- مينيستر كەڭسەسىنە ەنگىزۋگە تىيىم سالۋدىڭ كۇشى جويىلۋىن؛
نورماتيۆتىك قۇقىقتىق اكتىلەردىڭ جوبالارىن كەلىسۋ جانە ولار بويىنشا پرەمەر- مينيستر نەمەسە ونىڭ ورىنباسارلارى دەڭگەيىندە ماسەلەنىڭ ءمانى بويىنشا ناقتى شەشىمدەر قابىلداۋ كەزىندە مەملەكەتتىك ورگاندار اراسىنداعى كەلىسپەۋشىلىكتەردى بەس جۇمىس كۇنى ىشىندە قاراۋدىڭ مىندەتتىلىگىن؛
ۇكىمەتتىڭ جانە باسقا دا مەملەكەتتىك ورگانداردىڭ ايرىقشا قۇزىرەتىنە جاتاتىن قىزمەتتىڭ اعىمداعى ماسەلەلەرى بويىنشا قۇجاتتاردى، سونداي- اق مەملەكەتتىك ورگانداردىڭ مۇددەلى مەملەكەتتىك ورگاندارمەن الدىن الا پىسىقتاماي، ماسەلەنى ءمانى بويىنشا شەشۋدى تالاپ ەتەتىن ۇسىنىستارىن پرەزيدەنت اكىمشىلىگىنە ەنگىزۋگە تىيىم سالۋدىڭ ەنگىزىلۋىن؛
پرەزيدەنتتىڭ، پرەمەر- ءمينيستردىڭ، مەملەكەتتىك حاتشىنىڭ، پرەزيدەنت اكىمشىلىگى باسشىسىنىڭ جانە قاۋىپسىزدىك كەڭەسى حاتشىسىنىڭ تىكەلەي تاپسىرمالارىن قوسپاعاندا، ورىندالۋ مەرزىمى ەكى جۇمىس كۇنىنەن از سۇراۋ سالۋلار مەن تاپسىرمالارعا تىيىم سالۋدىڭ ەنگىزىلۋىن؛ پرەمەر- مينيستر كەڭسەسىندە قۇجاتتاردى قاراۋ مەرزىمدەرىنىڭ ەكى ەسەگە قىسقارتىلۋىن؛ اكتىلەردىڭ جوبالارىن جانە كەڭەستەردىڭ حاتتامالارىن، سۇراۋ سالۋلار مەن تاپسىرمالاردى قاراۋ قۇزىرەتىنە تىكەلەي كىرمەيتىن مەملەكەتتىك ورگاندارعا ولاردى جىبەرۋگە، وسىنداي قۇجاتتاردى قاراۋسىز قايتارۋ مۇمكىندىگىن بەرە وتىرىپ، تىيىم سالۋدىڭ ەنگىزىلۋىن؛
مەملەكەتتىك ورگانداردىڭ ءبىرىنشى باسشىلارىنىڭ ۇيىمداستىرۋشىلىق- تەحنيكالىق سيپاتتاعى قۇجاتتارعا قول قويۋ، سونداي-اق ۆەدومستۆوارالىق كەڭەستەرگە قاتىسۋ جانە وندا مەملەكەتتىك ورگاننىڭ ۇستانىمىن ءبىلدىرۋ قۇقىعىن مەملەكەتتىك ورگانداردىڭ قۇرىلىمدىق بولىمشەلەرىنىڭ جەكەلەگەن باسشىلارىنا بەرۋ مۇمكىندىگىن؛
مەملەكەتتىك ورگانداردىڭ ءبىرىنشى باسشىلارىنىڭ جەتەكشىلىك ەتەتىن ورىنباسارلارىنا ءبىرىنشى باسشىلاردىڭ شەشىمى بويىنشا نورماتيۆتىك قۇقىقتىق اكتىلەردىڭ جوبالارىن كەلىسۋ قۇقىعى بەرىلۋىن؛
مەملەكەتتىك ورگاننىڭ ءبىرىنشى باسشىسىنىڭ مىندەتىن اتقارۋشىنىڭ قولىمەن بۇدان بۇرىن ەنگىزىلگەن حات- حابارعا مەملەكەتتىك ورگاننىڭ ءبىرىنشى باسشىسىنىڭ قايتادان قول قويۋى جانە پرەمەر- مينيستر كەڭسەسىنە ەنگىزۋ جونىندەگى تالاپتىڭ الىپ تاستالۋىن؛
ورتالىق مەملەكەتتىك ورگاننىڭ جاڭا ءبىرىنشى باسشىسىنىڭ تاعايىندالۋىنا بايلانىستى نورماتيۆتىك قۇقىقتىق اكتىنىڭ جوباسىن قايتا كەلىسۋگە تىيىم سالۋدىڭ ەنگىزىلۋىن؛
بيلىكتىڭ زاڭ شىعارۋ جانە سوت تارماقتارى ورگاندارىمەن، قازاقستان رەسپۋبليكاسى پرەزيدەنتىنىڭ اكىمشىلىگىمەن حات الماسۋدى، سونداي- اق ۇلتتىق ارحيۆ قورىنا جاتاتىن قۇجاتتاردى قوسپاعاندا، قىزمەتتىك ەلەكتروندىق پوشتانىڭ ورتالىق جانە جەرگىلىكتى اتقارۋشى ورگاندار ءۇشىن كوممۋنيكاتسيا مەن اقپارات الماسۋدىڭ رەسمي قۇرالى رەتىندە پايدالانىلۋىن؛
ۇكىمەت وتىرىستارى مەن ۇكىمەت جانىنداعى كونسۋلتاتيۆتىك- كەڭەسشى ورگاندار وتىرىستارىنىڭ، سونداي- اق پرەمەر- ءمينيستردىڭ ورىنباسارلارى مەن پرەمەر- مينيستر كەڭسەسى باسشىلىعىنىڭ باسقارۋىمەن وتكەن كەڭەستەردىڭ حاتتامالارىن قاتىسقان مەملەكەتتىك ورگاندارمەن كەلىسۋ قاجەتتىلىگىن جويا وتىرىپ، ولارعا قول قويۋ مەرزىمىنىڭ ءۇش كۇنگە دەيىن قىسقارتىلۋىن قامتاماسىز ەتە وتىرىپ، قايتا قاراسىن؛
2) 2022 -جىلعى 31-جەلتوقسانعا دەيىن: مەملەكەتتىك اقپاراتتاندىرۋ وبەكتىلەرىندە قامتىلعان ازاماتتار مەن زاڭدى تۇلعالار تۋرالى مالىمەتتەردى تۇزەتۋدىڭ وڭايلاتىلعان تەتىگىن قامتاماسىز ەتسىن؛ كەڭسە قاعازىنا جانە ونىمەن بايلانىستى تاۋارلارعا ارنالعان بيۋدجەت شىعىستارىن ءۇش ەسەگە قىسقارتۋدى قامتاماسىز ەتسىن؛
ساقتاۋ مەرزىمىن كورسەتە وتىرىپ، مەملەكەتتىك جانە مەملەكەتتىك ەمەس ۇيىمداردىڭ قىزمەتىندە جاسالاتىن ۇلگىلىك قۇجاتتاردىڭ تىزبەسىن وڭتايلاندىرسىن؛ مەملەكەتتىك اقپاراتتاندىرۋ وبەكتىلەرىن قۇرۋ جانە (نەمەسە) دامىتۋ مەرزىمىنىڭ التى ايعا دەيىن قىسقارتىلۋىن قامتاماسىز ەتسىن؛ كەڭەستەردى بەلگىلەۋ مەن وتكىزۋدىڭ نەگىزدەرىن ناقتى رەگلامەنتتەۋ بويىنشا، ونىڭ ىشىندە بارلىق مەملەكەتتىك ورگاندار مەن ۇيىمدار ءۇشىن كەڭەستەردى جوسپارلاۋ مەن جۇيەلەۋ جونىندە ءبىرىڭعاي سيفرلىق شەشىمدى ەنگىزۋدى، سونداي-اق كەڭەستەردى بەينەكونفەرەنتسبايلانىس جانە قولجەتىمدى ونلاين- سەرۆيستەر ارقىلى وتكىزۋدىڭ باسىمدىعىن قامتاماسىز ەتە وتىرىپ، شارالار قابىلداسىن؛ نورماتيۆتىك قۇقىقتىق اكتىلەر جوبالارىنىڭ «اشىق ن ق ا» ينتەرنەت- پورتالىندا ورنالاستىرىلعانى تۋرالى حابارلامالاردى قازاقستان رەسپۋبليكاسىنىڭ ۇلتتىق كاسىپكەرلەر پالاتاسىنا، جەكە كاسىپكەرلىك سۋبەكتىلەرىنىڭ اككرەديتتەلگەن بىرلەستىكتەرىنە، قوعامدىق كەڭەستەرگە جىبەرۋ ءراسىمىنىڭ اۆتوماتتاندىرىلۋىن قامتاماسىز ەتسىن؛
ورتالىق جانە جەرگىلىكتى اتقارۋشى مەملەكەتتىك ورگانداردىڭ جۇمىسى تيىمدىلىگىنىڭ كورسەتكىشتەرى رەتىندە قازاقستان رەسپۋبليكاسى ۇلتتىق دامۋ جوسپارىنىڭ ستراتەگيالىق كورسەتكىشتەر كارتاسىندا بەكىتىلگەن دەكومپوزيتسيالانعان ينديكاتورلاردى پايدالانا وتىرىپ، ولاردىڭ پرەزيدەنت اكىمشىلىگىمەن جانە ۇكىمەتپەن جاسالاتىن مەموراندۋمدارىنىڭ ينستيتۋتىن، سونداي-اق پرەمەر- مينيستر مەن پرەزيدەنت اراسىندا مەموراندۋمدار جاساسۋ پراكتيكاسىن جويسىن؛
ورتالىق مەملەكەتتىك ورگانداردىڭ ساياسي قىزمەتشىلەرىن جانە «ا» كورپۋسىنىڭ اكىمشىلىك قىزمەتشىلەرىن مەملەكەتتىك اقپاراتتاندىرۋ وبەكتىلەرىمەن قاشىقتان جۇمىس ىستەۋگە ارنالعان قۇرىلعىلارمەن قامتاماسىز ەتسىن؛
3) 2023 -جىلعى 31-جەلتوقسانعا دەيىن: قازاقستان رەسپۋبليكاسىنىڭ مەملەكەتتىك قىزمەت ىستەرى اگەنتتىگىمەن بىرلەسىپ، «ە- قىزمەت» اقپاراتتىق جۇيەسىنىڭ بازاسىندا مەملەكەتتىك قىزمەتكە ىرىكتەۋ جانە قابىلداۋ پروتسەسىن تولىقتاي سيفرلاندىرۋدى، سونداي- اق ونى بارلىق مەملەكەتتىك ورگانداردا ەنگىزۋدى جانە كەڭىنەن تاراتۋدى قامتاماسىز ەتسىن؛
مەملەكەتتىك اپپاراتتىڭ ءبىر قۇجات جوباسىمەن بىرلەسىپ جۇمىس ىستەۋ مۇمكىندىگى بەرىلە وتىرىپ، قىزمەتتىك حات- حاباردىڭ ءوتۋىن وڭتايلاندىرۋ، تاپسىرمالاردىڭ قوسارلانۋىن بولدىرماۋ، قۇجات اينالىمى بويىنشا تالدامالىق ەسەپتەردى جەدەل قالىپتاستىرۋ بويىنشا سيفرلىق شەشىمدەرى بار ءبىرىڭعاي ورتالىقتاندىرىلعان بۇلتتى قۇجات اينالىمىنا كوشۋىن قامتاماسىز ەتسىن؛
«قىزمەت بابىندا پايدالانۋ ءۇشىن» دەگەن بەلگىسى بار قۇجاتتاردىڭ ەلەكتروندىق فورماتقا كوشىرىلۋىن قامتاماسىز ەتسىن؛
«ە- زاڭناما» اقپاراتتىق جۇيەسىنىڭ زاڭ شىعارۋ پروتسەسى ءمودۋلىنىڭ ونەركاسىپتىك پايدالانۋعا ەنگىزىلۋىن قامتاماسىز ەتسىن؛ ورتالىق مەملەكەتتىك ورگانداردىڭ ءبىرىڭعاي بۋحگالتەرلىك ەسەپكە الۋ اقپاراتتىق جۇيەسىنىڭ ەنگىزىلۋىن قامتاماسىز ەتسىن؛
4) كۇنتىزبەلىك جىل ىشىندە «E-Otinish» جۇيەسىن جەكە جانە زاڭدى تۇلعالار جولدانىمدارىنىڭ بارلىق تۇرلەرىن قابىلداۋ ءۇشىن «ءبىر تەرەزە» رەتىندە ينستيتۋتسيالاندىرۋدى قامتاماسىز ەتسىن. 11. قازاقستان رەسپۋبليكاسىنىڭ مەملەكەتتىك قىزمەت ىستەرى اگەنتتىگى قازاقستان رەسپۋبليكاسىنىڭ ۇكىمەتىمەن بىرلەسىپ:
1) مەملەكەتتىك قىزمەتشىلەر اراسىندا مەملەكەتتىك اپپارات قىزمەتىن جەتىلدىرۋ جونىندەگى ۇزدىك جوباعا ارنالعان كونكۋرستى جىل سايىن وتكىزۋدى قامتاماسىز ەتسىن؛
2) مەملەكەتتىك قىزمەتتىڭ جاي- كۇيىن مونيتورينگتەۋ جانە مەملەكەتتىك قىزمەتتەردى كورسەتۋ ساپاسىن قوعامدىق مونيتورينگتەۋ راسىمدەرى شەڭبەرىندە جىل سايىن بيۋروكراتيادان ارىلتۋ جونىندەگى سۇراۋ سالۋ جۇرگىزۋدى قامتاماسىز ەتسىن.
12. قازاقستان رەسپۋبليكاسىنىڭ ۇكىمەتى مەملەكەتتىك ورگانداردى بيۋروكراتيادان ارىلتۋ جانە ولاردىڭ تيىمدىلىگىن ارتتىرۋ بويىنشا ۇسىنىستاردى جيناۋ ءۇشىن تۇراقتى جۇمىس ىستەيتىن ونلاين- رەسۋرستى ىسكە قوسۋدى قامتاماسىز ەتسىن. قازاقستان رەسپۋبليكاسىنىڭ ستراتەگيالىق جوسپارلاۋ جانە رەفورمالار جانە مەملەكەتتىك قىزمەت ىستەرى اگەنتتىكتەرى قازاقستان رەسپۋبليكاسىنىڭ سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىمەن بىرلەسىپ، ونلاين- رەسۋرسقا تۇسەتىن ۇسىنىستارعا تۇراقتى نەگىزدە تالداۋ جۇرگىزسىن.
13. قازاقستان رەسپۋبليكاسىنىڭ ۇكىمەتى زاڭنامالىق اكتىلەرگە نورمالاردىڭ زاڭنامالىق جاعىنان ارتىق (شامادان تىس) رەگلامەنتتەلۋى تۇرعىسىنان رەۆيزيا جۇرگىزسىن، ولاردى ۇكىمەت نەمەسە مەملەكەتتىك ورگاندار جەدەلدىلىك ماقساتىندا زاڭعا تاۋەلدى نورماتيۆتىك قۇقىقتىق اكتىلەردە ايقىنداۋعا ءتيىس.
14. قازاقستان رەسپۋبليكاسىنىڭ مەملەكەتتىك قىزمەت ىستەرى اگەنتتىگى مەملەكەتتىك اپپاراتتى بيۋروكراتيادان ارىلتۋ ماسەلەلەرى بويىنشا مونيتورينگ پەن تالداۋدى، ونىڭ ىشىندە مەملەكەتتىك ورگانداردىڭ ىشكى اكىمشىلىك راسىمدەرىن زەردەلەپ، سونداي- اق ولاردىڭ ناتيجەلەرىن جارتىجىلدىق نەگىزدە قازاقستان رەسپۋبليكاسى پرەزيدەنتىنىڭ اكىمشىلىگىنە ەنگىزە وتىرىپ، قامتاماسىز ەتسىن.
15. قازاقستان رەسپۋبليكاسىنىڭ ۇكىمەتى ون جۇمىس كۇنى ىشىندە وسى جارلىقتى ىسكە اسىرۋ جونىندەگى ءىس- قيمىل جوسپارىن بەكىتۋدى قامتاماسىز ەتسىن.
16. قازاقستان رەسپۋبليكاسىنىڭ ۇكىمەتى وسى جارلىقتان تۋىندايتىن وزگە دە شارالاردى قابىلداسىن. 17. وسى جارلىقتىڭ ورىندالۋىن باقىلاۋ قازاقستان رەسپۋبليكاسى پرەزيدەنتىنىڭ اكىمشىلىگىنە جۇكتەلسىن.
18. وسى جارلىق قول قويىلعان كۇنىنەن باستاپ قولدانىسقا ەنگىزىلەدى.
قازاقستان رەسپۋبليكاسىنىڭ پرەزيدەنتى ق. توقايەۆ
نۇر-سۇلتان، اقوردا، 2022 -جىلعى 13-ءساۋىر № 872