دەپۋتاتتار قارجى پيراميداسىن جارنامالاۋشىلاردى جاۋاپقا تارتۋدى ۇسىندى

نۇر-سۇلتان. قازاقپارات - پارلامەنت دەپۋتاتتارى قارجى پيراميداسىن جارنامالاعانداردى قىلمىستىق جاۋاپقا تارتۋدى قاراستىراتىن زاڭ جوباسىنا باستاماشىلىق جاسادى.

بۇل تۋرالى ءماجىلىستىڭ جالپى وتىرىسىندا دەپۋتات يۋري لي ايتتى، دەپ حابارلايدى قازاقپارات ءتىلشىسى.

«بيىل 11- ساۋىردە «MUDARABAH CAPITAL» قارجى پيراميداسىنان زارداپ شەككەندەردىڭ ءبىرى ەلوردادا ءوزىن ورتەپ جىبەردى. بۇل تراگەدياعا نە سەبەپ بولدى؟ زاڭ بويىنشا قارجى پيراميداسىنىڭ قىزمەتىنە تىيىم سالىنعان. الايدا ادامدار جەڭىل اقشانىڭ سوڭىنا ەرىپ، وسىنداي كۇماندى جوبالارعا جيناعان قاراجاتىن سالىپ جاتىر. الاياقتار مىڭداعان قازاقستاندىقتى جيناعان قاراجاتىنان، كولىگىنەن، پاتەرىنەن ايىرىپ، كوبىسىن نەسيە مەن قارىزعا باتىردى. بۇل ءوز كەزەگىندە ءبىزدىڭ ازاماتتاردىڭ قارجىلىق ساۋاتىلىعىنىڭ تومەندىگىمەن بايلانىستى»، - دەدى يۋ. لي قۇزىرلى ورگاندارعا جولداعان ساۋالىندا.

وسى ورايدا ول بۇعان دەيىن جاسالعان دەپۋتاتتىق ساۋالداردىڭ بىرىندە «MUDARABAH CAPITAL» ج ش س قارجى پيراميداسىنىڭ جارناماسىنا قاتىسقانداردى جاۋاپكەرشىلىككە تارتۋ تۋرالى ايتىلعانىن ەسكە سالدى.

«سونىمەن قاتار ءماجىلىس دەپۋتاتتارى ءتيىستى زاڭ جوباسىنا باستاماشىلىق جاسادى. وندا قارجى پيراميداسىنىڭ جارناماسى ءۇشىن قىلمىستىق جاۋاپكەرشىلىكتى ەنگىزۋ ەسكەرىلگەن. ءتيىستى راسىمدەردەن كەيىن، اتالعان زاڭ جوباسىن تالقىلاۋعا كىرىسەمىز»، - دەدى دەپۋتات.

بۇعان دەيىن نۇر-سۇلتان قالاسىندا ءوزىن ورتەگەن ايەلدىڭ اۋرۋحاناعا جاتقىزىلعانىن حابارلاعان ەدىك.

كەيىن الماتى پوليتسياسى ءوزىن ورتەگەن ايەل ايىپتاعان قارجى پيراميداسىنا قاتىستى تۇسىنىك بەردى.