جامبىلدا جول سالىپ جاتقان قىتايلىق كومپانيانىڭ جۇمىسشىلارى نارازىلىققا شىقتى

تاراز. قازاقپارات - جامبىل وبلىسىندا «مەركى-بۋرىلبايتال» تاسجولىنىڭ قۇرىلىسىن جۇرگىزىپ جاتقان قىتايلىق كومپانيانىڭ جۇمىسشىلارى جالاقىنى ارتتىرۋدى تالاپ ەتىپ، نارازىلىق بىلدىرۋدە، دەپ حابارلايدى قازاقپارات ءتىلشىسى.

نارازى ەڭبەككەرلەردىڭ ايتۋىنشا، سوڭعى ءۇش جىل بويى قىتايلىق كومپانيا ەڭ تومەنگى جالاقى تولەپ كەلگەن.

ەڭبەك جاعدايلارىن جاقسارتۋدى دا تالاپ ەتىپ وتىرعان 80 نەن استام جۇمىسشى جۇمىسقا شىعۋدان باس تارتقان.

«10 ساعاتتىق رەجيمدە جۇمىس ىستەيمىز. جالاقىمىز وعان تاتىمايدى. مۇنداي جاعدايعا شىدامايتىنىمىزدى ەكى ايدان بەرى ايتىپ ءجۇرمىز. مۇندا، ءتىپتى ارنايى كيىم دە جوق»، - دەيدى جۇمىسشى مەرگەنباي دابىلوۆ ارىپتەستەرىنىڭ اتىنان ءسوز الىپ.

رەسپۋبليكالىق ماڭىزى بار تاسجولدىڭ بۇل بولىگىن قىتايلىق «سينسين» كومپانياسى سالىپ جاتىر. قۇرىلىس جۇمىستارى 2019-جىلى باستالعان دەسەك، مۇندا قازىر 200 دەن استام جەرگىلىكتى تۇرعىن جۇمىسپەن قامتىعان.

كومپانيا وكىلى جۇمىسشىلاردىڭ ايلىعى 60 جانە 120 مىڭ تەڭگە ارالىعىندا ەكەنىن ايتادى.

«ءبىز جوبانى 2017-جىلعى باعامەن الدىق. قازىر ءوزىمىز دە شىعىنعا باتىپ جاتىرمىز. قۇرىلىس زاتتارىنىڭ قۇنى دا ەسەلەپ ءوستى. سول سەبەپتى جالاقىنى كوتەرە الماي وتىرمىز»، - دەگەن «سينسين» قۇرىلىس جانە دامىتۋ كومپانياسى» ج ش س باس ينجەنەرى تسيۋان يتسيۋان ماسەلەنى 3 كۇن ىشىندە وزدەرىنىڭ باسشىلىقتارىمەن اقىلداسىپ، كورەتىندەرىن جەتكىزدى.

وسىعان وراي جامبىل وبلىسى اكىمىنىڭ ورىنباسارى نۇرجان كالەندەروۆ كومپانيا باسشىلىعىمەن ارنايى كەزدەسكەن.

«كومپانيا باسشىلىعى ءۇش كۇن ىشىندە قىزمەتكەرلەردىڭ جالاقىسىن كوتەرۋ ماسەلەسى قارالاتىنىن ايتتى»، - دەي كەلە ول جۇمىسشىلاردى سابىرلىققا شاقىردى.

ايتا كەتەيىك، «مەركى - بۋرىلبايتال» تاس جولىنىڭ قۇرىلىسى جامبىل وبلىسىنداعى ماڭىزدى نىسانداردىڭ ءبىرى بولىپ تابىلادى. قازىرگى تاڭدا قۇرىلىس جۇمىستارى شامامەن 90 پايىزعا اياقتالعان. كەلەر جىلعا دەيىن تولىعىمەن اياقتالىپ، كولىك قوزعالىسى اشىلادى دەپ كۇتىلۋدە.