ەپيدەميولوگتەر كوروناۆيرۋس شتامدارى ءالى دە قاۋىپتى ەكەنىن ەسكەرتتى

الماتى. قازاقپارات - كورشى ەلدەردە كوروناۆيرۋستىڭ قايتا ءورشىپ جاتقان تۇستا الماتىلىق ەپيدەميولوگتار تۇرعىنداردى ۆاكسينا الۋعا شاقىردى، دەپ حابارلايدى قازاقپارات ءتىلشىسى.

الماتى قالاسىنىڭ №7 قالالىق كلينيكالىق اۋرۋحانا ەمحاناسىنىڭ ەپيدەميولوگى گۇلدارحان ءاجىمۇراتوۆانىڭ ايتۋىنشا، كورونوۆيرۋستان ساقتانۋدىڭ جالعىز جولى ۆاكسيناتسيا مەن ريەۆاكسيناتسيا بولىپ تابىلادى.

«قازىر ەلىمىزدە جالپى ەپيدەميولوگيالىق احۋال تۇراقتى. قازىرگى ۋاقىتتا حالىقتىڭ ۇجىمدىق يممۋنيتەتى قالىپتاسقان. ستاتيستيكاعا سايكەس، شامامەن 10.5 ميلليون ادام ۆاكسيناتسيالاندى، سونىمەن قاتار 3,5 ميلليون ادام ريەۆاكسيناتسيادان ءوتتى. دەگەنمەن كوروناۆيرۋستى جۇقتىرۋ ىقتيمالدىعى ءارقاشان بولادى. ءبىز كوروناۆيرۋستىڭ ەشقايدا جوعالماعانىن ءتۇسىنۋىمىز كەرەك، ول ءبىزدىڭ ارامىزدا ءومىر سۇرە بەرەدى، ءبىراق الدىن- الۋ شارالارىن ۇنەمى ۇستانۋىمىز كەرەك. بارلىق كارانتيندىك تالاپتار الىنعانىنا قاراماستان، حالىق كوپ جينالاتىن جەرلەردە بەتپەردە كيگەن دۇرىس. ۆاكسيناتسيا مەن ريەۆاكسيناتسيادان باس تارتۋ ەپيداحۋالعا كەرى اسەر ەتۋى مۇمكىن»، - دەدى دارىگەر.

ونىڭ ايتۋىنشا، كارانتيندىك شارالار مەن شەكتەۋلەردى الىپ تاستاۋ كوروناۆيرۋستىڭ مۇلدە جويىلدى دەگەندى بىلدىرمەيدى. جاڭا مۋتاتسيالار نەمەسە شتامدار بۇكىل الەم ءۇشىن ءالى دە قاۋىپتى.

ايتا كەتەيىك، بۇگىنگى تاڭدا قالا تۇرعىندارى ءۇشىن ۆاكسينالار قولجەتىمدى. مىسالى، 7 ق ك ا ەمحاناسىندا كوروناۆيرۋستىق ينفەكسياعا قارسى ۆاكسيناتسيا ساعات 08:00-18:00 ارالىعىندا جۇرگىزىلەدى. بۇل رەتتە ءاربىر ازامات ەمحاناعا بەكىتىلۋىنە قاراماستان ۆاكسينا الا الادى. تەك بۇل رەتتە وزىڭىزبەن بىرگە جەكە كۋالىگىڭىز بولۋى قاجەت.

اۆتور: دۋمان ارعىنگەلدى