ماۋلەن اشىمبايەۆ وڭدەۋ ونەركاسىبىنىڭ دامۋىن تەجەپ وتىرعان پروبلەمالاردى اتادى
ول بۇل تۋرالى پالاتا جانىنداعى جاس ساراپشىلار كلۋبىنىڭ كەزەكتى وتىرىسىندا ايتتى، دەپ حابارلايدى قازاقپارات.
اتالعان جيىنعا «بايتەرەك» ۇلتتىق باسقارۋشى حولدينگىنىڭ باسقارما ءتوراعاسى قانات شارلاپايەۆ ارنايى شاقىرىلدى. وتىرىستى اشقان ماۋلەن اشىمبايەۆ ەل پرەزيدەنتىنىڭ حولدينگتىڭ كەيبىر ەنشىلەس ۇيىمدارىن رەفورمالاۋ جونىندەگى تاپسىرمالارىنا نازار اۋداردى. سەنات ءتوراعاسى قازىرگى تاڭدا حولدينگ ەكونوميكانىڭ شيكىزاتتىق ەمەس سەكتورلارىن ءارتاراپتاندىرۋ جانە دامىتۋ، كاسىپكەرلىكتى جانە وڭدەۋ ونەركاسىبى ونىمدەرىنىڭ ەكسپورتىن قولداۋ، اگروونەركاسىپتىك كەشەندى وركەندەتۋ جانە حالىقتى تۇرعىن ۇيمەن قامتاماسىز ەتۋ سياقتى ەكونوميكالىق ساياساتتىڭ باعىتتارى بويىنشا بەلسەندى جۇمىس ىستەپ كەلە جاتقانىن اتاپ ءوتتى.
«وڭدەۋ ونەركاسىبىنىڭ دامۋىن تەجەپ وتىرعان ءبىرقاتار پروبلەما بار. ولار - قولجەتىمدى بانكتىك نەسيەلەۋدىڭ بولماۋى، جەكە ينۆەستورلار ءۇشىن جوعارى ۆاليۋتالىق تاۋەكەلدەر جانە وندىرىستىك قۋاتتىڭ ابدەن توزۋى. سونداي- اق بىلىكتى كادرلار دا تاپشى. ىشكى نارىقتى قورعاۋ ءۇشىن تەحنيكالىق جانە تاريفتىك ەمەس رەتتەۋ اياسىندا جۇيەلى جۇمىس جوق. قولجەتىمدى قارجىنىڭ جەتكىلىكسىزدىگى يندۋستريالاندىرۋدى ىسكە اسىرۋعا جانە بيزنەستى دامىتۋعا نەگىزگى كەدەرگى بولىپ قالىپ وتىر. «بايتەرەك» حولدينگىنىڭ قۇرامىنداعى دامۋ ينستيتۋتتارى وسى مىندەتتەردى شەشۋى قاجەت»، - دەدى ماۋلەن اشىمبايەۆ.
وتىرىس بارىسىندا كلۋب مۇشەلەرى دە ءسوز الىپ، حولدينگ قۇرامىنداعى ينستيتۋتتاردىڭ قىزمەتىن جەتىلدىرۋ بويىنشا ءوز ويلارىمەن جانە باستامالارىمەن ءبولىستى. ناقتى ايتقاندا، ساراپشىلار «بايتەرەك» حولدينگىنىڭ كورپوراتيۆتى ورتالىعىنىڭ رولىنە، قازاقستانداعى وڭدەۋ ونەركاسىبىن مەملەكەتتىك قولداۋعا، تۇرعىن ءۇي ساياساتىنا، شاعىن جانە ورتا بيزنەستى مەملەكەتتىك قولداۋ شارالارىنىڭ تيىمدىلىگى مەن قولجەتىمدىلىگىنە جانە تاعى باسقا ماسەلەلەرگە توقتالدى.
