بوزجىرا شاتقالىندا قوناق ءۇي كەشەنى سالىنبايتىن بولدى
بۇل اقپاراتتى ماڭعىستاۋ وبلىسى اكىمدىگىنىڭ باسپا ءسوز قىزمەتى راستادى، دەپ حابارلايدى قازاقپارات ءتىلشىسى.
«جوبا باستاماشىسى - «Tethys Aktau IV « ج ش س- نىڭ اۋىزشا اقپاراتىنا سايكەس، بوزجىرا شاتقالىنداعى قوناق ءۇي كەشەنى مەن ەتنواۋىل قۇرىلىسىنىڭ جوباسى ينۆەستوردىڭ باستاماسىمەن توقتاتىلدى»، - دەپ اتاپ ءوتتى اكىمدىكتەن.
ايتا كەتەيىك، 2021-جىلدىڭ باسىندا وڭىردەگى ەكولوگيالىق تۋريزمدى دامىتۋ ماقساتىندا ينۆەستور ۇسىنعان جوبالاردىڭ ءبىرى قاراقيا اۋدانىنداعى ەتنواۋىل ساپار ورتالىعى بولعان ەدى.
باستاپقىدا ينۆەستور بوزجىرا شاتقالىنداعى جابايۇشقان قورىقشاسىنىڭ اۋماعىندا جوبانى ىسكە اسىرۋدى ۇسىنعان. ءبىراق، اتالعان اۋماق ەرەكشە قورعالاتىن ايماق بولعاندىقتان مەملەكەت باسشىسى ۇكىمەتكە جوبانى جۇزەگە اسىرۋ ورنىن قايتا قاراۋدى تاپسىردى.
ماڭعىستاۋ وبلىسى اكىمدىگى مادەنيەت جانە سپورت، ەكولوگيا، گەولوگيا جانە تابيعي رەسۋرستار مينيسترلىكتەرىمەن بىرلەسىپ، قوعام وكىلدەرىمەن، ارداگەرلەرمەن، ەكوقورعاۋشىلارمەن، عالىمدارمەن، ەكولوگيا، بيولوگيا سالاسىنداعى ساراپشىلارمەن ءبىرقاتار كەڭەستەر مەن كەزدەسۋلەر وتكىزىپ، جوبانى بوزجىرا شاتقالىنان 4 شاقىرىم قاشىقتىقتا، قورىقشادان تىس جەردە جۇزەگە اسىرۋ تۋرالى شەشىم قابىلداندى.
ينۆەستور توپىراقتىڭ گەولوگيالىق جاعدايلارىن انىقتاۋ ءۇشىن ينجەنەرلىك-گەولوگيالىق ىزدەستىرۋ جۇمىستارىن جۇرگىزىپ، قولدانىستاعى گرەيدەر جولدى قالپىنا كەلتىردى.
«بۇعان قوسا، ينۆەستور ماڭعىستاۋ وبلىسىنىڭ ەكولوگيالىق تۋريزم ەرەكشەلىكتەرىن ەسكەرە وتىرىپ، ونى تابىستى جۇزەگە اسىرۋ ءۇشىن جوبا تۇجىرىمداماسىنا كەشەندى وزگەرتۋلەر ازىرلەپ جاتىر. جوبا تۇجىرىمداماسىنا كەشەندى وزگەرتۋلەر ەنگىزۋگە قاتىستى كەيبىر ساتتەردىڭ تۋىنداۋىنا بايلانىستى ونىڭ قۇنى 38,6 ميلليارد تەڭگەدەن 39,8 ميلليارد تەڭگەگە دەيىن اۋىتقىدى. جوبانىڭ ناقتى قۇنى وعان وزگەرىستەر ەنگىزۋمەن بايلانىستى جوعارىدا اتالعان پروتسەدۋرالار اياقتالعان سوڭ ناقتىلانادى»، - دەپ اتاپ وتەدى اكىمدىكتەن.
بۇعان دەيىن ماڭعىستاۋدا «بوزجىرا سافاري» قوناق ءۇيىنىڭ جوبالاۋ جۇمىستارى جۇرگىزىلىپ جاتقانىن حابارلاعان ەدىك.
الايدا ءوڭىر تۇرعىندارىمەن قاتار ەلىمىزدىڭ ەكوبەلسەندىلەرى بۇل قۇرىلىس جۇمىسىنا نارازىلىق تانىتىپ، ىسكە پرەزيدەنت قاسىم-جومارت توقايەۆ ارالاسىپ، ۇكىمەتكە وسى جوبانى قايتا قاراۋ جونىندە تاپسىرما بەرگەن بولاتىن.
