تەڭگە باعامى ناۋرىزداعى تۇراقسىزدىقتان كەيىن نىعايىپ كەلەدى - ۇلتتىق بانك
بۇل تۋرالى ق ر ۇلتىق بانكىنىڭ ءتوراعاسى عالىمجان ءپىرماتوۆ ايتتى، دەپ حابارلايدى قازاقپارات ءتىلشىسى.
«ناۋرىزدا بولعان گەوساياسي تاۋەكەلدەر مەن رەسەي ءرۋبلىنىڭ جوعارى قۇبىلمالىعى تەڭگە باعامىنا قىسىم جاسادى. 16 ناۋرىزدا تەڭگە باعامى بيرجادا 1 دوللار ءۇشىن 512,17 تەڭگەگە جەتتى»، - دەدى ۇلتتىق بانك ءتوراعاسى ۇكىمەتتىڭ بۇگىنگى وتىرىسىندا.
ونىڭ ايتۋىنشا، قارجىلىق تۇراقتىلىق تاۋەكەلدەرىن شەكتەۋ ءۇشىن ۇلتتىق بانك جەكەلەگەن كۇندەرى ۆاليۋتالىق ينتەرۆەنتسيالار جۇرگىزدى، ولاردىڭ كولەمى ناۋرىزدا 990,5 ميلليون دوللار بولعان.
«بيۋدجەتكە بەرىلەتىن ترانسفەرتتەر ءۇشىن ۇلتتىق قوردان 891 ميلليون دوللاردى ساتۋى جانە كۆازيمەملەكەتتىك سەكتور سۋبەكتىلەرىنىڭ 233,4 ميلليون دوللار مولشەرىندە ۆاليۋتالىق تۇسىمدەرىن ساتۋى دا تەڭگەگە قولداۋ كورسەتتى. تەڭگە باعامى ناۋرىزدا ەداۋىر قالپىنا كەلدى جانە اي قورىتىندىسى بويىنشا % 5,7 عا نىعايىپ، 1 دوللار ءۇشىن 467,03 تەڭگە بولدى. ۇلتتىق ۆاليۋتا باعامى ءساۋىردىڭ باسىندا نىعايۋىن جالعاستىرىپ، 11-ساۋىردە 449,63 تى كورسەتتى»، - دەپ ءتۇسىندىردى ع. ءپىرماتوۆ.
ءساۋىر ايىنىڭ باسىندا ۇلتتىق بانك تەڭگەنىڭ نىعايۋ سەبەپتەرىن اتاعان ەدى. ۇلتتىق بانك ساراپشىلارىنىڭ پايىمىنشا، الەمدەگى گەوساياسي جاعداي تەڭگە باعامىنا قىسقا مەرزىمدىك سيپاتتا اسەر ەتەدى.
