20:25, 11 - ءساۋىر 2022 | GMT +5
دۇنيەجۇزىلىك بانك ۋكرايناداعى جاعدايدىڭ ورتالىق ازيا ەكونوميكاسىنا اسەرىن ايتتى
نۇر-سۇلتان. قازاقپارات - دۇنيەجۇزىلىك بانكتىڭ سايتى ۋكرايناداعى جاعداي ورتالىق ازياداعى پاندەميادان ەس جيىپ ۇلگەرمەگەن دامۋشى ەكونوميكالارعا ۇلكەن سوققى بولىپ ءتيىپ جاتقانىن جازدى، دەپ حابارلايدى قازاقپارات ءتىلشىسى.
«سوعىس ەۋروپا مەن ورتالىق ازيانىڭ پاندەميا سالدارىنان قالىپتاسىپ كەلە جاتقان جانە دامۋشى ەكونوميكالارىنا سوققى بولىپ تيۋدە. رەسەي مەن ۋكراينادان بولەك بەلارۋس، قىرعىز، مولدوۆا رەسپۋبليكالارى مەن تاجىكستاندا رەتسەسسيا كۇتىلىپ وتىر»، - دەپ جازىلعان حابارلامادا.
دۇنيەجۇزىلىك بانكتىڭ دەرەگى بويىنشا، ورتالىق ازيا مەن وڭتۇستىك كاۆكازعا يمپورتتالاتىن ءبيدايدىڭ 75 پايىزدان استامى ۋكراينا مەن رەسەيدىڭ ۇلەسىنە تيەسىلى.
«سونداي-اق، رەسەي كوپتەگەن ەلدەر ءۇشىن ەكسپورتتىڭ نەگىزگى باعىتى بولىپ وتىر. ال رەسەيدەن اۋدارىلاتىن اقشا ورتالىق ازياداعى كەيبىر ەلدەردىڭ (قىرعىز رەسپۋبليكاسى جانە تاجىكستان) جالپى ىشكى ءونىمىنىڭ 30 پايىزىنا جۋىعىن قۇراپ وتىر»، - دەپ جازادى دۇنيەجۇزىلىك بانكتىڭ رەسمي سايتى.
